ۇكىمەت باسشىلارى ساۋدا-ەكونوميكا, قارجى-ينۆەستيتسيا, ترانزيتتىك-كولىك, اۋىل شارۋاشىلىعى, مۇناي-گاز حيمياسى, ەنەرگەتيكا, عارىش سالالارىنداعى قازاقستان-رەسەي ىنتىماقتاستىعىن ودان ءارى ارتتىرۋ پەرسپەكتيۆالارىن, سونداي-اق ونەركاسىپتىك كووپەراتسيا اياسىنداعى جوبالاردى تالقىلادى.
ەۋرازيالىق ەكونوميكالىق وداق فورماتىنداعى ءوزارا ءىس-قيمىلدىڭ وزەكتى ماسەلەلەرى, سونداي-اق COVID-19 تارالۋىنا قارسى كۇرەس جانە ەكى ەلدىڭ ەكونوميكالارى ءۇشىن پاندەميا سالدارىن جويۋ جونىندەگى بىرلەسكەن شارالار قارالدى.
ا. مامين ەكى ەلدىڭ ۇلتتىق ەكونوميكالارىنىڭ بەلسەندى قالپىنا كەلۋى اياسىندا قازاقستان مەن رەسەي اراسىنداعى ساۋدا-ەكونوميكالىق قاتىناستار مەن ينۆەستيتسيالىق ىنتىماقتاستىق دامۋىنىڭ جوعارى قارقىنىن اتاپ ءوتتى.
وسى جىلدىڭ 8 ايىندا ەلدەر اراسىنداعى تاۋار اينالىمى $14,7 ملرد دەيىن 27%-عا ءوستى. 2021 جىلدىڭ قورىتىندىسى بويىنشا تاراپتار بۇل كورسەتكىشتى $20 ملرد دەيىن جەتكىزۋگە نيەتتى.
2021 جىلدىڭ ءبىرىنشى جارتىسىندا رف-نىڭ قر ەكونوميكاسىنا تىكەلەي ينۆەستيتسيالارىنىڭ كولەمى 17%-عا ارتىپ, $704,9 ملن قۇرادى. قازاقستاندا رەسەي كاپيتالىنىڭ قاتىسۋىمەن 10 مىڭنان استام كاسىپورىن جۇمىس ىستەيدى, بۇل شەتەلدىك قاتىسۋى بار كاسىپورىنداردىڭ جالپى سانىنىڭ 36,1%-ىن قۇرايدى. ونەركاسىپتىك كووپەراتسيا سالاسىندا $1,7 ملرد سوماسىنا 8 بىرلەسكەن ءىرى جوبا ىسكە اسىرىلىپ جاتىر.
رف ۇكىمەتىنىڭ ۇيلەستىرۋ ورتالىعىندا ا. مامين مەن م. ميشۋستين كولىك ينفراقۇرىلىمىنىڭ وزىق دامۋى, ەكى ەلدىڭ ترانزيتتىك الەۋەتىن جانە ايماقتىق كولىكتىك ءوزارا بايلانىسىن نىعايتۋ, ونىڭ ىشىندە «باتىس ەۋروپا – باتىس قىتاي», «سولتۇستىك – وڭتۇستىك» دالىزدەرى جانە ەاەو كەڭىستىگىندەگى باسقا دا باعىتتار شەڭبەرىندە نىعايتۋ ماسەلەلەرىن تالقىلادى. قر يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك قاماليەۆتىڭ, رف كولىك ءمينيسترى ۆيتالي ساۆەلەۆتىڭ, «قازاقستان تەمىر جولى» ۇك» اق باسقارما توراعاسى نۇرلان ساۋرانباەۆتىڭ جانە «رتج» ااق باس ديرەكتورى – باسقارما توراعاسى ولەگ بەلوزەروۆتىڭ باياندامالارى تىڭدالدى.
بيىلعى جىلدىڭ 9 ايىندا قازاقستان مەن رەسەي ارقىلى ورتالىق ازيا, ەۋروپا, قيىر شىعىس باعىتتارىنا 599,5 مىڭ جفە تاسىمالداندى, بۇل 2020 جىلدىڭ سايكەس كەزەڭىندەگى كورسەتكىشتەن 37%-عا ارتىق. قىتاي – ەۋروپا – قىتاي باعىتىنداعى ترانزيتتىك كونتەينەرلىك تاسىمالدار كولەمى 493,5 مىڭ جفە (+38%) قۇرادى.
كەلىسسوزگە قر-نىڭ رف-داعى ەلشىسى ەرمەك كوشەرباەۆ, ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى قايرات كەلىمبەتوۆ, ساۋدا جانە ينتەگراتسيا ءمينيسترى باقىت سۇلتانوۆ, ەنەرگەتيكا ءمينيسترى ماعزۇم مىرزاعاليەۆ, «سامۇرىق-قازىنا» اق باسقارما توراعاسى الماسادام ساتقاليەۆ جانە ت. ب. قاتىستى.
