قازاقستان رەسپۋبليكاسى ۇلتتىق بانكىنىڭ توراعاسى قايرات كەلىمبەتوۆ:«قازاقستاندىق بانكتەردىڭ بارلىعىندا ۇلتتىق جانە شەتەلدىك ۆاليۋتا قورى جەتكىلىكتى»

قازاقستان رەسپۋبليكاسى ۇلت­تىق بانكىنىڭ توراعاسى قايرات كە­لىمبەتوۆ اتالمىش بانكتىڭ الماتى قالاسىنداعى باس عيما­راتىندا بۇقارالىق اقپارات قۇرالدارىنىڭ وكىلدەرىمەن كەزدەستى. سوڭعى از عانا ۋاقىت ىشىندە جۋرناليستەر قاۋىمىمەن ءتورتىنشى مارتە جۇزدەسىپ وتىرعاندىعىن جانە بۇل جاعداي ەلدەگى قارجى ماسەلەسىن كۇردەلەندىرگىسى كەلەتىن مۇددەلىلىكتىڭ سالدارىنان ەكەنىن جەتكىزگەن باس بانكير قازاق قوعا­مىندا وتاندىق بانكتەرگە قاتىستى بولىپ جاتقان وقيعالارعا تۇسىنىك بەردى. «كەشە استانا قالاسىندا قازاقستان رەسپۋبليكاسى پرەزي­دەن­تىنىڭ جانىنداعى ورتالىق كوم­مۋنيكاتسيالار قىزمەتى عيما­راتىندا باق وكىلدەرىنە شۇ­عىل مالىمدەمە جاساۋعا ءماجبۇر بولدىق. سەبەبى, 18 اقپان كۇنى ءبىر­قا­تار عالامتور پاراقشالارى مەن وتانداستارىمىزدىڭ جەكە قالتا تەلەفوندارىنا «قازاقستاندىق ءبىر­نەشە بانكتىڭ بانكروتتىق جا­ريا­­لاۋ تۋرالى شەشىم قابىل­دا­عا­­نى» جونىندە اقپاراتتار تارا­تىلعان. وسى وقيعاعا بايلانىستى قازاقستان رەسپۋبليكاسىنىڭ ۇلتتىق بانكى اتالمىش ماعلۇماتتىڭ نەگىزسىز ەكەندىگىن جانە بۇل ەلىمىزدەگى بانكتىك جۇيەنى شايقالتۋعا باعىتتالعان ارەكەت ەكەندىگىن مالىمدەيدى» - دەدى قايرات نەمات ۇلى. ەستەرىڭىزگە سالا كەتسەك, 18 اقپان كۇنى اۋەلى عالامتور بەتتەرىندە, سوسىن جەكە ادامداردىڭ ۇيالى تەلەفوندارىندا پايدا بولعان «شۇعىل اقپارات» كوپتەگەن سالىمشىلار مەن قولدا بار اقشاسىن شەتەل ۆاليۋتاسىنا اۋىستىرعىسى كەلەتىن ازاماتتاردىڭ اراسىندا اجەپتاۋىر دۇربەلەڭ تۋعىزدى. ەلىمىزدىڭ ءىرى قالالارى مەن وبلىس ورتالىقتارىندا ورنالاسقان بانك عيماراتتارى كەلۋشىگە لىق تولىپ, ۆاليۋتا ايىرباستاۋ بەكەتتەرى ءبىر كۇندىك قارجى وپەراتسياسىن بىرەر ساعاتتىڭ ىشىندە اتقارىپ تاستادى. ناتيجەسىندە, قر ۇلتتىق بانك توراعاسى ەل الدىنا شىعىپ بۇل دۇربەلەڭنىڭ قولدان جاسالعان ارانداتۋ نيەتى ەكەندىگىن, ۇيىمداستىرۋشىلارمەن قۇقىق قورعاۋ قىزمەتى اينالىساتىندىعىن ايتقان. «ءبىزدىڭ قازاقستاندىق بانكتەردىڭ بارلىعىندا ۇلتتىق جانە شەتەلدىك ۆاليۋتا قورى جەتكىلىكتى. قانداي جاعداي بولماسىن, ۇلتتىق بانك ەلدەگى وزگە بانكتەردىڭ بارلىعىنا قول ۇشىن بەرۋگە مۇددەلى ءارى دايىن, - دەي كەلىپ قايرات كەلىمبەتوۆ ارانداتۋ ارەكەتىن ۇيىمداستىرعان كىسىلەردى تابۋ جانە زاڭ تالابىنا ساي شارا قولدانۋ ءۇشىن قر باس پروكۋراتۋراسىنا ءوتىنىش تۇسىرگەندىكتەرىن, وتاندىق سالىمشىلاردىڭ جەكەلەگەن بانكتەردە ساقتاعان قاراجاتى ۇلتتىق جانە شەتەلدىك ۆاليۋتا تۇرىندە دە زاڭعا سايكەس قامسىزداندىرىلاتىنىنا مەملەكەت كەپىل ەكەندىگىن, سونداي-اق باق قىزمەتى ەلدەگى تۇراقتىلىقتى ساقتاۋ ماقساتىندا الىپقاشپا نەگىزسىز اقپاراتتاردى انىقتاپ بارىپ حالىققا تاراتۋىن سۇراندى. ءباسپاسوز ءماسليحاتىنان كەيىن باس بانكير جۋرناليستەردىڭ قويعان بىرقاتار سۇراقتارىنا جاۋاپ بەردى. قانات ەسكەندىر, «ەگەمەن قازاقستان». الماتى.