قازاقستان رەسپۋبليكاسى باس پروكۋراتۋراسىنىڭ مالىمدەمەسى: «جالعان اقپاراتتارعا تىيىم سالىنادى»

كەشە ەلىمىزدىڭ باس پروكۋ­را­تۋراسى قايسىبىر بانكتەردىڭ بانكروت الدىنداعى جاعدايى تۋرالى جالعان اقپاراتتىڭ ەشبىر نەگىزى بولماعاندىعى جانە بولۋى مۇمكىن ەمەستىگى تۋرالى مالىمدەمە جاسادى. سوڭعى كۇندەرى ءارتۇرلى كوم­مۋ­نيكاتسيا قۇرالدارى ارقىلى (الەۋمەتتىك جەلىلەردى قوسا العان­دا ينتەرنەت-حابارلامالار, سمس) «تسەنتر كرەديت» بانكى, «كاسپي بانكى» جانە «اليانس بانكىنىڭ» بان­كروت بولۋ مۇمكىندىگى تۋرالى اق­پارات تارالا باستاعانى ءمالىم بولدى. وسى حابارلامالار اتالعان بان­كىلەردىڭ سالىمشىلارىن ءدۇر­لىك­تىرىپ, ولاردى بانكتىك شوتتارداعى قاراجاتتارىن جاپپاي الۋعا يتەرمەلەۋدە. ناتيجەسىندە, بۇل ارەكەتتەر جۇيە قۇراۋشى بانكتەرگە ايتارلىقتاي زيانىن تيگىزدى, قو­عام­داعى الەۋمەتتىك شيەلەنىستىڭ وسۋىنە اكەلىپ سوقتى, سونداي-اق ەلدە­گى قارجى ينستيتۋتتارىنا دەگەن تۇرعىنداردىڭ سەنىمىنە نۇقسان كەلتىردى. اتالعان بانكتەردىڭ بانكروت الدىنداعى جاعدايى تۋرالى جالعان اقپاراتتىڭ ەشبىر نەگىزى بولماعاندىعى جانە بولۋى مۇمكىن ەمەستىگى انىقتالدى. سايكەسىنشە, تاراتىلىپ جاتقان مالىمەتتەر كورىنەۋ جالعان بولعان جانە بانكتىك سالاداعى احۋالدى تۇراقسىزداندىرۋعا باعىتتالعان. قازىرگى ۋاقىتتا قۇقىق قورعاۋ ورگاندارى ءتيىستى ارىزداردىڭ نەگىزىندە بانكتەردىڭ قارجىلىق احۋالى جونىندەگى جالعان اقپاراتقا قاتىسى بار بارلىق تۇلعالاردى انىقتاۋ جونىندەگى جەدەل-ىزدەستىرۋ شارالارىن كەشەندى تۇردە جۇرگىزۋدە. بىرقاتار تۇلعالار انىقتالدى جانە ولارعا قاتىستى قاجەتتى تەكسەرۋ شارالارى جۇرگىزىلۋدە. تالاپ ارىزدار بەرىلدى. قازىر قىلمىستىق ءىس قوزعاۋ جونىندەگى ماسەلە شەشىلۋدە. باس پروكۋراتۋرا جالعان حابارلامالاردى تاراتۋعا كىنالى تۇلعالاردىڭ بارلىعى قىلمىستىق قۋدالانۋمەن قوسا, ماتەريالدىق جانە زاڭمەن بەلگىلەنگەن وزگە دە جاۋاپكەرشىلىكتەرگە تارتىلاتىندىعىن جاۋاپكەرشىلىكپەن مالىمدەيدى. باق وكىلدەرىنەن قارالىپ جاتقان وقيعالاردى جاريا ەتۋ كەزىندە تەك تەكسەرىلگەن فاكتىلەرگە سۇيەنۋگە جانە شىندىققا سايكەس كەلمەيتىن اقپاراتتىڭ جاريالانۋىنا جول بەرمەۋدى سۇرايمىز, دەيدى قازاقستان رەسپۋبليكاسىنىڭ باس پروكۋراتۋراسى.