بيىل ەكىنشى مارتە وتكىزىلىپ جاتقان حالىقارالىق دودانى مادەنيەت جانە سپورت مينيسترلىگى, ۇلتتىق وليمپيادا كوميتەتى مەن نۇر-سۇلتان قالاسى اكىمدىگىنىڭ قولداۋىمەن «دەنيس تەن قورى» قوعامدىق قورى ۇيىمداستىردى. 2019 جىلى تۇڭعىش رەت دەنيس تەن تۋىپ-وسكەن الماتى قالاسىندا تۇساۋى كەسىلگەن بايراقتى باسەكە بيىل ءبىرىنشى مارتە ەلوردادا ءوتتى. سەبەبى وسى تۋرنير ءوتۋى كەرەك بولعان الماتىداعى «حالىق ارەنا» سپورت كەشەنى قازىرگى تاڭدا كوروناۆيرۋسپەن اۋىرعان ناۋقاستاردى ەمدەۋ ورتالىعىنا اينالعان. سوندىقتان ۇيىمداستىرۋشىلار جارىستىڭ ءوتۋ ورنىن اۋىستىرۋعا ءماجبۇر بولدى. ال بىلتىرعى تۋرنير كوروناۆيرۋس پاندەمياسىنا بايلانىستى وتپەي قالعان ەدى.
وسى جىلدان باستاپ مانەرلەپ سىرعاناۋدان «چەللەندجەر» (ISU Challenger Series) ساناتىنداعى جىلدىڭ 7-ءشى جارىس كەزەڭىنە قوسىلعان بيىلعى Denis Ten Memorial Challenge تۋرنيرىندە 16 ەلدەن كەلگەن 100-دەن استام سپورتشى باق سىنادى. ولاردىڭ قاتارىندا بيىلعى الەم چەمپيوناتىنىڭ جۇلدەگەرلەرى, بەيجىڭدە وتەتىن قىسقى وليمپيا ويىندارىنا جولداما جەڭىپ العان بىرقاتار تاجىريبەلى مانەرلەپ سىرعاناۋشىلار دا بار.
ال قازاقستاندىق سپورتشىلاردان بۇل سىندا ەل نامىسىن ەرلەر اراسىندا راحات برالين, ميحايل شايدوروۆ, دياس جيرەنباەۆ, قىزدار باسەكەسىندە اناستاسيا لوبانوۆا, بوگدانا راكيشەۆا, ياسمينا تەكيك جانە جۇپتاسىپ ونەر كورسەتۋدە گاۋھار ناۋرىزوۆا/بويانسانگۋر داتيەۆ پەن ماكسين ۋەزەربي/تەمىرلان ەرجانوۆ جۇبى قورعادى.
Denis Ten Memorial ءتۋرنيرى جاس مانەرلەپ سىرعاناۋشىلارعا ءوز باقتارىن حالىقارالىق ارەنالاردا سىناپ كورۋگە مۇمكىندىك بەرەتىن جارىس سانالادى. ماسەلەن, 2019 جىلى قازاقستاندىق ماكسين ۋەزەربي مەن تەمىرلان ەرجانوۆ جۇبى الماتىدا وتكەن حالىقارالىق جارىستا قولا مەدالعا يە بولىپ, 2020 جىلعى الەم چەمپيوناتىنا جولداما العان ەدى.
بيىلعى باسەكەگە توقتالار بولساق, ەرلەر اراسىنداعى سىندا جۇلدەلى ءۇش ورىندى دا رەسەي سپورتشىلارى جەڭىپ الدى. اتاپ ايتقاندا, پەتر گۋمەننيك باس جۇلدەنى يەلەنسە, كۇمىس پەن قولا مەدال مارك كوندراتيۋك پەن اندرەي موزالەۆكە بۇيىردى. ال 2019 جىلعى قازاقستان چەمپيونى جانە گدانسكىدە (پولشا) وتكەن جاسوسپىرىمدەر اراسىنداعى گران-پري كەزەڭىنىڭ جۇلدەگەرى اتانعان ميحايل شايداروۆ بۇل جولى ۇزدىكتەر قاتارىنان كورىنە الماي, جارىستى نەبارى توعىزىنشى ورىنمەن قورىتىندىلادى.
2019 جىلعى مەموريالدا جاسوسپىرىمدەر ساناتىندا ونەر كورسەتىپ, سول كەزدە 4-ءشى ورىنعا يە بولعان راحات برالين بيىل 12-ءشى ساتىعا تابان تىرەدى. ال 17 جاستاعى مانەرلەپ سىرعاناۋشى دياس جيرەنباەۆ جارىستى 10-ورىنمەن تۇيىندەدى.
قىزدار اراسىنداعى باسەكەدە بەلارۋس وكىلى ۆيكتوريا سافونوۆا توپ جاردى. كۇمىس جانە قولا جۇلدەلەردى ازەربايجاندىق ەكاتەرينا ريابوۆا مەن ۋكراينالىق اناستاسيا شابوتوۆا ءوزارا ءبولىستى. قازاقستاندىق اناستاسيا لوبانوۆا, ياسمين تەكيك, بوگدانا راكيشەۆا 8-دەن 10-عا دەيىنگى ورىندارعا تۇراقتادى.
جۇپتىق سىندا رەسەيلىك اناستاسيا سكوپتسوۆا-كيريلل الەشين جانە ەليزاۆەتا حۋدايبەرديەۆا-ەگور بازين التىن جانە قولا جۇلدەنى جەڭىپ السا, ۋكراينالىق الەكساندرا نازاروۆا مەن ماكسيم نيكيتين جۇبى 2-ورىندى يەلەندى. وتاندىق مانەرلەپ سىرعاناۋشىلار گاۋھار ناۋرىزوۆا مەن بويسانگۋر داتيەۆ ۇزدىك جەتى سپورتشىنىڭ قاتارىنان كورىندى.
