مەملەكەت باسشىسىنىڭ باستامالارى قالاي ىسكە اسىپ جاتقانىنان حابار بەرەتىن «ايتىلدى – ورىندالدى» ايدارىمەن بەرىلەتىن اقپاراتتىڭ بۇل جولعى دەرەكتەرى «كولەڭكەلى» ەكونوميكامەن كۇرەسكە ارنالدى. پرەزيدەنت بۇل ماسەلەنى بيىلعى جولداۋىندا ەرەكشە نازارعا العان بولاتىن.
«سالىق جانە كەدەن سالاسىن تسيفرلاندىرۋ «كولەڭكەلى ەكونوميكانىڭ» كەز كەلگەن كورىنىستەرىمەن كۇرەسۋگە ايتارلىقتاي كومەكتەسەدى. ءتىپتى, «كولەڭكەلى ەكونوميكا» سىبايلاس جەمقورلىققا جول اشىپ وتىرعانى جاسىرىن ەمەس. سوندىقتان ەكونوميكالىق تەرگەۋ قىزمەتىنىڭ جۇمىسىن نەگىزىنەن «كولەڭكەلى ەكونوميكامەن» كۇرەسۋگە بەيىمدەۋدى تاپسىرامىن», دەگەن بولاتىن مەملەكەت باسشىسى.
بەرىك ءۋالي كەلتىرگەن دەرەك بويىنشا, جىل باسىنان بەرى 1508 ەكونوميكالىق قۇقىقبۇزۋشىلىق انىقتالعان. ونىڭ 803-ءى اۋىر جانە اسا اۋىر قىلمىستارعا جاتادى.
«36 ۇيىمداسقان قىلمىستىق توپتىڭ جولى كەسىلدى. ونىڭ ىشىندە 27 توپ جالعان شوت-فاكتۋرا جاساۋمەن, قولما-قول اقشا الۋمەن اينالىسقان جانە سالىقتان جالتارعان. «زاڭ بۇزۋ ىقتيمالدىعى جوعارى تۇلعالار رەەسترىنە» قولما-قول اقشا بەرۋشى فيرمالارمەن ءوزارا ەسەپ ايىرىسقان 2,8 مىڭنان استام زاڭدى تۇلعا ەنگىزىلدى. 1 مىڭنان استام كومپانيانىڭ بانكتەگى شوتتارى بويىنشا قارجى جۇمساۋ وپەراتسيالارى ۋاقىتشا توقتاتىلدى», دەپ جازدى پرەزيدەنتتىڭ ءباسپاسوز حاتشىسى.
ونىڭ ايتۋىنشا, قارجى پيراميدالارىنىڭ بەلگىلەرىن الدىن الا انىقتاۋ جۇمىستارى كۇشەيتىلدى.
«وسى ارادا جالپى مولشەرى 4,1 ملرد تەڭگە قارجى سالۋ بويىنشا 30 دەرەك انىقتالدى. سالىق جانە كەدەندىك باسقارۋدى ودان ءارى جەتىلدىرۋگە, قولما-قول اقشاسىز تولەم جاساۋدى دامىتۋعا, قولايلى بيزنەس ورتا قالىپتاستىرۋعا باعىتتالعان جاڭا كەشەندى جوسپار بەكىتىلدى. سوڭعى 4 جىلدىڭ ىشىندە ەلىمىزدەگى «كولەڭكەلى» ەكونوميكانىڭ دەڭگەيى 29 پايىزدان 20 پايىزعا دەيىن تومەندەدى», دەپ جازدى بەرىك ءۋالي.
