«NHK Music Special» – ءار اي سايىن بەلگىلى ورىنداۋشىلار مەن مۋزىكانتتار شاقىرىلاتىن تانىمال باعدارلاما. ونىڭ قاراشاداعى كەيىپكەرى – جاپوندىق ءانشى كودجي تاماكي. ول جاپوندىق مۋزىكا يندۋسترياسىنداعى ۇزدىك ورىنداۋشى. ءارتىستىڭ تەلەديداردان كورىنبەي, سۇحبات بەرمەگەنىنە ءبىراز بولعان, سوندىقتان ونىڭ قاتىسۋىمەن وتەتىن بۇل شىعارىلىم ەرەكشە بولماق.
بىلتىر كودجي تاماكي «Rural» وركەسترىمەن شىعىپ, 24 جىلدا العاش رەت Kouhaku Uta Gassen مۋزىكالىق فەستيۆالىنە قاتىسقان. ونىڭ تاماشا انشىلىك قابىلەتى مەن وركەسترمەن بىرىگىپ ونەر كورسەتۋى جاپونيادا تالقىلانعان ۇلكەن تاقىرىپقا اينالعان. كودجي تاماكي وركەسترمەن 2015 جىلى ونەر كورسەتە باستاعان. ولار جاپوندىق اۋديتوريانىڭ قوشەمەتىنە بولەندى. 11 قاراشادا ءارتىس «NHK» تەلەارناسىنا ەكسكليۋزيۆتى سۇحبات بەرگەن.
سونداي-اق باعدارلاماعا ونلاين رەجيمدە قازاقستاندىق ورىنداۋشى ديماش قۇدايبەرگەن قاتىسادى.
ديماش 2017 جىلى قىتايدا وتكەن «I am Singer» بايقاۋىندا كودجي تاماكيدىڭ «Autumn Strong» (تۇپنۇسقا اتاۋى «Don’t Go») ءانىن ورىنداعان ەدى. باعدارلاما بارىسىندا قازاقستاندىق ءانشى شاعىن سۇحبات بەرىپ, بۇل كومپوزيتسيانىڭ ەرەكشەلىگى جايلى بايانداپ بەرەدى.
«NHK Music Special» 11 قاراشا كۇنى نۇر-سۇلتان ۋاقىتىمەن ساعات 19:30-دا كورسەتىلەدى. رەترانسلياتسيا 16 قاراشا كۇنگى ساعات 21:48-دە وتەدى.
ەسكە سالا كەتسەك, قازاقستاندىق ءانشى ديماش قۇدايبەرگەننىڭ Fly Away سينگلى Billboard Hot Trending Songs چارتىنىڭ ۇزدىك «جيىرمالىعىنا» كىرگەن.
