باعۋ مەرزىمى اياقتالعانىمەن ۇقىپتى شارۋا اۋا رايى جايلى بولسا جايىلىمىن ەرتە جەپ قويماس ءۇشىن مالىن ەندى ەركىن جايىلىمعا جىبەرەدى. مۇندايعا اسىرەسە بيىلعى كۇز قولايلى بولىپ تۇر. قاراشا تۋىپ قالعانىمەن كۇن ءالى قوڭىرجاي, جەر ءالى قاتقان جوق. جازدىڭ جارتىسىنان اسىپ بارىپ جاۋعان جاۋىن-شاشىن دا مالدىڭ وتىن دا ابدەن جەتىلدىرگەن. قازىر ورماننىڭ قويناۋلارى تۇگىل اشىق دالانىڭ ءشوبى تۇنىپ تۇر. مۇندايدا سولتۇستىكتىك شارۋا «دالانىڭ وتى تۇنىپ تۇرعان قىزىل ىڭىردەن مالدى قالاي قوراعا قاماپ وتىرايىن» دەپ سويلەيدى. الايدا ول بوس جۇرگەن مالدىڭ كوبىنەسە قولدى بولاتىنىن ويلامايدى. ونىڭ ۇستىنە مۇنداي مال جول-كولىك وقيعاسىنىڭ تۋىنا دا سەبەپ بولادى. اسىرەسە اۋا رايىنىڭ جاۋىندى, جول كورىنىسى انىق بولمايتىن تۇنگى مەزگىلدە, تۇماندى كۇندەرى اۋىر سالدارعا سوقتىرادى. ونداي وقيعالار ءجيى بولىپ تۇرادى. وسىنداي كەلەڭسىزدىكتەردىڭ الدىن الۋ ءۇشىن وبلىستىق پوليتسيا دەپارتامەنتى «ەركىن جايىلىم» اتتى جەدەل-پروفيلاكتيكالىق شارا وتكىزدى. ونىڭ بارىسىندا الدىن الۋ ءىس-شاراسىن ۇيىمداستىرۋشىلار اۋىل اكىمىنىڭ قاتىسۋىمەن جەرگىلىكتى تۇرعىندارمەن كەزدەسىپ, قاراۋسىز بوس جۇرگەن مالدىڭ قولدى بولاتىنىن نەمەسە جول-كولىك وقيعاسىنا سەبەپ بولاتىنىن ءتۇسىندىرىپ, سوعان بايلانىستى جاۋاپكەرشىلىك جۇكتەلەتىنىن ەسكەرتتى.
مامليۋت اۋدانىنداعى وسىنداي شاراعا اۋداندىق پروكۋراتۋرا وكىلدەرى دە قاتىستى. «وسى ءىس-شارانىڭ ەكى كۇنىندە مالدىڭ قاراۋسىز بوس جايىلۋىنىڭ 17 فاكتىسى انىقتالدى. يەلەرى انىقتالعانعا دەيىن قاراۋسىز جايىلعان 42 باس ءىرى قارا ارنايى قاشالارعا قامالدى», دەيدى اۋداندىق پب باستىعى, پوليتسيا پولكوۆنيگى پيوتر كليموۆ.
قازىر پوليتسيا قىزمەتكەرلەرى جەدەل-پروفيلاكتيكالىق جۇمىستى وبلىستىڭ بارلىق اۋداندارىندا جۇرگىزۋدە. جىل باسىنان بەرى وبلىستا تىركەلگەن 31 مال ۇرلىعىنىڭ 22-ءسى قاراۋسىز قالدىرعاندىقتان ورىن العان. سونداي-اق 7 جاعدايدا قاسكويلەر مالدى قورادان, 2 جاعدايدا اشىق قاشادان ۇرلاعان. ازىرشە ەكى مال ۇرلىعى اشىلماعان, قالعان 29 انىقتالدى. ونىڭ 24 ءىس بويىنشا ءوندىرىس اياقتالدى, ال قالعاندارى بويىنشا تەرگەۋ امالدارى جۇرگىزىلۋدە.
سولتۇستىك قازاقستان وبلىسى
