«ۇكىمەت ەڭبەك ادامىنىڭ بەدەلىن ارتتىرىپ, تابىسىن كوتەرۋگە باعىتتالعان كەشەندى ناقتى جۇمىستاردى ىسكە اسىرىپ جاتىر. بىرىنشىدەن, الەۋمەتتىك ساياساتتا قاراپايىم ەڭبەك ادامىنىڭ تابىسىن ارتتىرۋعا باسىمدىق بەرىلىپ وتىر. اتاپ ايتقاندا, بيىل ەڭبەكاقى تەڭسىزدىگىن بولدىرماۋعا باعىتتالعان جۇمىستار اياسىندا ەلىمىزدە 900-گە جۋىق كاسىپورىندا 600 مىڭنان استام جۇمىسكەردىڭ جالاقىسى ورتا ەسەپپەن 25 پايىزعا ارتتى. ازاماتتىق قىزمەتشىلەر جالاقىسى ورتا ەسەپپەن 19-دان 45 پايىزعا دەيىن كوتەرىلدى. بۇدان بولەك, مەملەكەت باسشىسىنىڭ شەشىمىمەن كەلەسى جىلدان باستاپ ەڭ تومەنگى جالاقى مولشەرى ارتاتىن بولادى. ناتيجەسىندە, 1,7 ملن جۇمىسكەردىڭ تابىسى وسەدى», دەدى ە.توعجانوۆ.
ونىڭ ايتۋىنشا, جاڭا جۇمىس ورىندارىن اشۋ باعىتىندا جۇيەلى شارالار قابىلدانىپ جاتىر. ناتيجەسىندە, جىل باسىنان بەرى 1 ملن-نان استام ادام جۇمىسپەن قامتۋ ءىس-شارالارىنا تارتىلىپ وتىر.
«جۇمىسسىزدىق دەڭگەيىن اينالامىزداعى جاعدايعا, پاندەمياعا قاراماستان, 4,9 پايىز دەڭگەيىندە ساقتاپ قالۋعا مۇمكىن بولدى. ناقتى قابىلدانعان شارالاردىڭ ارقاسىندا وسى دەڭگەيدە قالىپتاستى. سونىمەن قاتار, 12 قازاندا ۇكىمەت وتىرىسىندا بەكىتىلگەن ۇلتتىق جوبالار اياسىندا 2025 جىلعا دەيىن 1,7 ملن جاڭا جۇمىس ورىندارىن قۇرۋ جوسپارلانىپ وتىر», دەدى ۇكىمەت باسشىسىنىڭ ورىنباسارى.
