ەلباسىنىڭ قامداعانى – ەلگە قامقورلىق
تاۋەلسىزدىكتىڭ العاشقى جىلدارىندا ەلىمىزگە شەتەل ينۆەستيتسياسىن سالۋعا ىنتا تانىتقان ينۆەستوردىڭ ءبىرى – «شەۆرون» كورپوراتسياسى. ەل ۇكىمەتى مەن اتالعان ينۆەستوردىڭ قاتىسۋىمەن قۇرىلعان «تەڭىزشەۆرويل» ءبىرلەسكەن كاسىپورنىنىڭ «تەڭىز» كەنىشىن يگەرگەنىنە 20 جىلدان استى. وسى كەزەڭدە تەك مۇناي ءوندىرىپ قانا قويماي, ءوڭىردىڭ الەۋمەتتىك ماسەلەلەرىنىڭ وڭ شەشىلۋىنە دە كەڭىنەن اتسالىسىپ كەلەدى. «الەۋمەتتىك سالاعا ينۆەستيتسيا بولۋدەگى نەگىزگى ۇستانىم بيزنەستىڭ الەۋمەتتىك جاۋاپكەرشىلىگى مەن ەتيكاسىن ساقتاي وتىرىپ, جەرگىلىكتى كاسىپكەرلىك پەن قاۋىمداستىقتى بارىنشا قولداۋ», دەپ تۇسىندىرەدى «تەڭىزشەۆرويل» بىرلەسكەن كاسىپورنىنىڭ باس ديرەكتورى تيم ميللەر. «تەڭىزشەۆرويل» 2009 جىلدان بەرى الەۋمەتتىك سەرىكتەستىككە نەگىزدەلگەن الەۋمەتتىك ينۆەستيتسيالاردىڭ ادەتتەگى فيلانتروپيالىق مودەلىنەن باس تارتىپ, بۇل كۇندەرى الەۋمەتتىك ماڭىزدى ماسەلەلەردى شەشۋدە تاجىريبەسى مول ۇكىمەتتىك ەمەس ۇيىمدارمەن جۇمىسىن جالعاستىرۋدا. وسى ورايدا جىلدىق بيۋدجەتى 1 ميلليون اقش دوللارىن قۇرايتىن الەۋمەتتىك ينۆەستيتسيالار باعدارلاماسى دەنساۋلىق ساقتاۋ, ءبىلىم بەرۋگە باعىتتالعان جوبالاردى تابىستى جۇزەگە اسىرۋعا مۇمكىندىك بەرۋدە. دەگەنمەن, بىرلەسكەن كاسىپورىننىڭ الەۋمەتتىك ينۆەستيتسياسى كەز كەلگەن باعدارلامانى قارجىلاندىرۋعا جۇمسالمايدى.
كاسىپورىن بولىمدەرىنىڭ بىلىكتى ماماندارىنان قۇرالعان الەۋمەتتىك ينۆەستيتسيالر جونىندەگى كەڭەس جىل سايىن ۇكىمەتتىك ەمەس ۇيىمداردىڭ جوبالارىن تەرەڭ تالقىلاپ, جەرگىلىكتى حالىققا بەرەر پايداسىنا, ءوڭىردىڭ وزەكتى الەۋمەتتىك ماسەلەلەرىن شەشۋگە وڭ ىقپال ەتەتىندىگىنە بايلانىستى تۇپكىلىكتى شەشىم قابىلدايدى.
سوڭعى جىلدارى بىرلەسكەن كاسىپورىننىڭ وسى سالاداعى جوبالارى ماڭىزدىلىعىمەن ەرەكشەلەندى. ماسەلەن, قازاقستاننىڭ وتباسىلىق دارىگەرلەر اسسوتسياتسياسىمەن بىرلەسكەن جوبادا قان قىسىمىنىڭ جوعارىلاۋىنىڭ ءتۇرلى سەبەپتەرىنە تالداۋ جاسالدى. ال اكادەميك ز.قابدولوۆ قورىمەن بىرلەسە وتكىزىلگەن «مەن قازاقشا بىلەمىن!» اتتى جوباعا وڭىردەگى وزگە ۇلتتىڭ وكىلدەرى كوپتەپ قاتىسىپ, مەملەكەتتىك ءتىلدى مەڭگەرۋدەگى قادامىنا قولداۋ جاسالدى.
وسىنداي جوبالارىمەن ەلدىڭ, ۇلتتىڭ ساۋلىعى مەن مۇددەسىن كوزدەگەن بىرلەسكەن كاسىپورىن 1993 جىلدان بەرى اتىراۋ وبلىسىنداعى ءارتۇرلى الەۋمەتتىك جوبالارعا 860 ميلليون اقش دوللارىنان استام قارجى جۇمسادى. ەندى بيىلعى جىلى دا مۇنايلى ءوڭىردىڭ دەنساۋلىق ساقتاۋ جانە ءبىلىم بەرۋ سالالارىنا قولداۋ كورسەتۋ ماقساتىمەن الەۋمەتتىك ينۆەستيتسيالار باعدارلاماسىنا 1 ميلليون اقش دوللارى كولەمىندە قوماقتى قارجى سالعالى وتىر.
سونىمەن قاتار, «تەڭىزشەۆرويل» ءوز قىزمەتكەرلەرىن الەۋمەتتىك تۇرعىدان قولداۋدى باستى قاعيدا رەتىندە ۇستانادى. وسىعان دالەل رەتىندە ءار جىل سايىن ءار قىزمەتكەردىڭ جالاقىسىنا ۇستەمە قوسىلاتىنىن ايتا الامىز. ال بيىلعى اقپان ايىنان باستاپ بىرلەسكەن كاسىپورىننىڭ ورتاق تابىسىنا ءوز ۇلەسىن قوسقان قىزمەتكەرلەر جالاقىسى 10 پايىزعا ءوسىرىلدى. «تەڭىزشەۆرويلدىڭ» باس ديرەكتورى تيم ميللەردىڭ ايتۋىنشا, ۇجىمنىڭ ءار مۇشەسىنە ءاردايىم قولداۋ كورسەتىلىپ كەلەدى. مۇنداي الەۋمەتتىك ماڭىزدى قولداۋ الداعى ۋاقىتتا دا جالعاستىرىلا بەرمەك. باس ديرەكتور ت.ميللەر ۇجىم مۇشەلەرىن الداعى 1 ساۋىردەن باستاپ قىزمەتكەرلەردىڭ باسىم بولىگى ءۇشىن جالاقى 9 نەمەسە ودان دا ارتىق پايىزعا وسەتىندىگىمەن قۋانتىپ وتىر. وسىلايشا, «تەڭىزشەۆرويل» بىرلەسكەن كاسىپورنى جىل باسىنان بەرى ءوز قىزمەتكەرلەرىنىڭ جالاقىسىن ەكىنشى رەت ءوسىرۋدى قولعا الماق.
– وتكەن اپتادا قازاقستان پرەزيدەنتى نۇرسۇلتان نازارباەۆ ءىرى كومپانيالارعا ءوز قىزمەتكەرلەرىنىڭ جالاقىلارىن 10 پايىزعا ارتتىرۋعا ۇسىنىس جاسادى. مەملەكەت باسشىسىنىڭ بۇل ۇسىنىسى «تەڭىزشەۆرويل» باسشىلىعى تاراپىنان كەڭ قولداۋ تاۋىپ, قىزمەتكەرلەر جالاقىسىن ءوسىرۋگە شەشىم قابىلدادىق. ءبىزدىڭ كاسىپورىن وسى شەشىمى ارقىلى پرەزيدەنت تاپسىرماسىن العاشقىلاردىڭ قاتارىندا ورىنداپ وتىر, – دەدى باس ديرەكتور ت.ميللەر.
باس ديرەكتور جالاقىعا قوسىلعان 10 پايىزدىق ارتتىرۋ, كەيىنگى ءساۋىر ايىنداعى جوسپارلانعان جالاقى مولشەرىن كوتەرۋ «تەڭىزشەۆرويل» باسشىلىعىنىڭ ەڭ ۇزدىك مۇناي جانە گاز ءوندىرۋشى كاسىپورىندارىنىڭ قاتارىنا قوسۋداعى قىزمەتكەرلەردىڭ تىنىمسىز ەڭبەگىن ورىندى باعالاپ, ولاردىڭ الدىنداعى مىندەتتەمەسىن ورىنداپ وتىرعاندىعى, دەپ اتاپ ءوتتى.
«تەڭىزشەۆرويلدىڭ» ءوز قىزمەتكەرلەرىنە قاجەتتى قولداۋ كورسەتۋدى كوزدەگەن باعدارلامالارى كوپ. سولاردىڭ قاتارىندا تۇرعىن ءۇيدى نەسيەلەۋ مەن ءبىلىم گرانتتارىن, فيتنەس-كلۋب جارنالارى جانە كوپتەگەن بونۋستىق باعدارلامالاردى ايتۋعا بولادى. مۇنىڭ بارلىعى «تەڭىزشەۆرويلدىڭ» قىزمەتكەرلەرىنە باسەكەگە ساي جالاقى مەن الەۋمەتتىك پاكەت ۇسىنا الاتىنىن, سونىمەن بىرگە, وسىنداي باعدارلامالار ارقىلى ءوز ءوندىرىسىنە قاجەتتى ەڭ ۇزدىك جانە جوعارى بىلىكتى مامانداردى جۇمىسقا تارتۋدى قامتاماسىز ەتۋگە قابىلەتتى ەكەنىن بايقاتادى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.
