ءوزىنىڭ «ىستىق. قىسقى. سەنىكى» دەگەن باستى ۇرانىنا ساي, سوچيدە قازىر, تۋرا ماعىناسىندا دا, جاناما ماعىناسىندا دا, شىنىمەن كۇن قىزىپ تۇر. بۇعان ءبىر جاعىنان جەرگىلىكتى جەردىڭ كليماتى اسەر ەتسە, ەكىنشى جاعىنان جارىس جولدارىندا باسەكە كورىگىن كۇن اسقان سايىن قىزدىرىپ كەلە جاتقان سپورتشىلار سەبەپ بولۋدا. سوندىقتان شىعار, بايگەنىڭ تورىندەگى تالاس ءبىر ءسات تولاس تاپپاي, ونىڭ كەستەسىنە دەمىل-دەمىل وزگەرىستەر ەنىپ جاتىر.
تارتىستىڭ قىزعانىن مىنادان دا ءبىلىڭىز: بۇرناعى كۇنى تۇندە سەگىزىنشى التىن مەدالىن جەڭىپ الىپ, ءبىرىنشى ورنىن نىعىزداي تۇسكەن گەرمانيا قۇراماسىنان كەيىنگى قاتاردا تۇرعان رەسەي, گوللانديا, اقش, نورۆەگيا, شۆەيتساريا جانە بەلارۋس ەلدەرى ءاربىرىنىڭ قورجىنىندا بەس-بەستەن وسىنداي جوعارى ناگرادا بار. مۇنىڭ ءوزى وسى قۇرامالاردىڭ ەندىگى باسقان ءاربىر ءساتتى قادامى بۇلاردىڭ كەستەدەگى ورنالاسۋ ساپىنا تۇزەتۋلەر ەنگىزە بەرەتىنىن بىلدىرەدى. الداعى كۇندەردە ورىن الۋعا ءتيىستى بۇل وزگەرىستەر مەن تۇزەتۋلەردىڭ اربىرىندە اتان تۇيە تارتا الماس اۋىر جۇك جاتادى.
ەندى ءبىز نەگىزگى اڭگىمەنىڭ ارقاۋى ەتىپ الىپ وتىرعان 17 اقپان, دۇيسەنبى كۇنى سپورتتىڭ 6 ءتۇرى بويىنشا جارىستار ءوتىپ, سولاردىڭ بەسەۋىندە جۇلدەگەرلەر بەلگىلى بولدى. حوككەيشى قىزدار فينالدا ءوزارا كىمدەردىڭ كەزدەسەتىنىن انىقتادى. قازاقستاندىقتار بۇل سايىستاردىڭ ەكەۋىنە قاتىسۋعا ءتيىس ەدى, بىراق...
دومراچەۆا – «بەلارۋس باتىرى»
اڭگىمەنى جوعارىداعى «بىراقتان» باستايىق. ءبىز بۇرىن ءۇمىت كۇتكەن جارىستاردىڭ ءبىرى بياتلونشى ايەلدەردىڭ 12,5 شاقىرىمدىق قاشىقتىقتاعى ماسس-ستارتى ەدى. باستاپقى ەسەپتە وعان ءتورت قىزىمىز قاتىسۋى ءتيىس-ءتىن. بىراق, بۇعان سوڭعى سايىسىندا العاشقى وتىزدىققا كىرگەندەر عانا جىبەرىلەدى. سوندىقتان 15 شاقىرىمدىق جەكە جۇگىرىستە 40 پەن 65-ورىندار اۋماعىنان اسا الماعان ءتورت بياتلونشىمىز دا بۇل «تويعا» «شاقىرۋ بيلەتىن» الا المادى.
دەگەنمەن, بۇعان قاراپ, جارىستىڭ جەلكەنى كەرىلمەي قالعان جوق. قايتا الەم تاپ وسى جولى وليمپيادا تاريحىندا وتە سيرەك كەزدەسەتىن وقيعالاردىڭ ءبىرىنىڭ كۋاسى بولدى. اتاپ ايتقاندا, ۆانكۋۆەردە ءبىزدىڭ ەلەنا حرۋستالەۆادان كەيىنگى ءۇشىنشى بەلەستەن كورىنگەن بەلورۋس ارۋى داريا دومراچەۆا وسى ويىنداردا ءۇشىنشى مارتە چەمپيون اتانىپ, ايدى اسپاننان ءبىر-اق شىعاردى. سوچيدە بۇعان قايران قالىپ, رازى بولماعان ادام كەمدە-كەم. جارىستىڭ ءتۇن جارىمىنا تاياۋ ۋاقىتتا اياقتالعانىنا قاراماستان, جاعىمدى جاڭالىق جاھان ءجۇزىن سول ساتتەن باستاپ-اق كەزىپ الا جونەلدى.
ەسكە سالا كەتەيىك, داريا مۇنىڭ الدىندا, 11 اقپان كۇنى 10 شاقىرىمدىق پاسيۋتتە, 14 اقپاندا 15 شاقىرىمدىق جەكە جارىستا الدىنا جان سالماعان ەدى. ال 12,5 شاقىرىمدىق قاشىقتىقتى 35 مينۋت 25,6 سەكۋندتا قيىپ ءوتىپ, تاعى دا الدىنا ەشكىمدى تۇسىرمەدى. ەكىنشى ورىنعا چەح قىزى گابريەلا سوۋكالوۆا شىقسا, ءۇشىنشى تۇعىر نورۆەگيا وكىلى تيريل ەكحوففقا بۇيىردى. سول سياقتى كەلەسى بەلورۋس سپورتشىسى نادەجدا سكاردينو كومبەگە 16-شى بولىپ كەلگەنىمەن, وسىمەن قاتارىنان 22 وتتى شەپتە, ياعني نىسانادا بىردە-ءبىر وقتى ءمۇلت جىبەرمەي, الەمدەگى كەزەكتى رەكوردقا قول جەتكىزدى.
دەگەنمەن, بۇكىل ويىندار اۋماعى ءۇشىن بۇل كۇننىڭ باستى قاھارمانى داريا دومراچەۆا بولدى. ول ايەلدەر اراسىندا بياتلوننىڭ بارلىق جەكە جارىستارىندا جەڭىسكە جەتىپ, وليمپيادانىڭ ءۇش دۇركىن چەمپيونى اتاعىنا قول جەتكىزگەن ءبىرىنشى سپورتشى اتاندى. ول, سونىمەن بىرگە, بەلارۋس قۇراماسىنىڭ قىسقى ويىنداردا التىن مەدالدى ەڭ كوپ العان سايىپقىرانى دا بولىپ وتىر. ال ەلىن وسىنشالىقتى اسقاق بيىككە كوتەرىپ تاستاعان ساڭلاق سپورتشىنىڭ تۋعان وتانى – بەلارۋستە بۇل كۇنى تۇندە ناعىز ۇلتتىق مەيرام باستالىپ كەتكەن سياقتى. ونىڭ باسىن بەلورۋس ليدەرى الەكساندر لۋكاشەنكو باستاپ بەردى. ول ءوزىنىڭ دارياعا ارناپ جولداعان جەدەلحاتىندا: «قىمباتتى داشا! بۇل – وراسان زور تابىس! سەن جارايسىڭ! ءبۇكىل بەلارۋس سەنىڭ جاڭا تابىسىڭا ءتانتى بولىپ جاتىر. وليمپيا ويىندارىنىڭ ءۇش ءدۇركىن چەمپيونى اتاعىنا قول جەتكىزىپ, سەن ءۇلكەن ەرلىك جاسادىڭ», دەپ اتاپ كورسەتىپتى. سودان كەيىن مەزگىلدىڭ كەش بولىپ قالعانىنا قاراماستان, پرەزيدەنت داريا دومراچەۆاعا «بەلارۋس باتىرى» اتاعىن بەرۋ تۋرالى جارلىققا قول قويىپتى. مىنە, شىن مانىندە حالىقتىڭ ماقتانىشى, قالاۋلى پەرزەنتى دەگەن وسىنداي-اق بولار!
بۇرناعى كۇنى بەلورۋس سپورتشىلارى وليمپياداداعى بەسىنشى التىنىنا قول جەتكىزدى. بۇلاردىڭ ۇشەۋى دومراچەۆاعا تيەسىلى بولسا, ءتورتىنشىسى فريستايلدىڭ اكروباتيكاسى بويىنشا اللا تسۋپەردىڭ ەنشىسىندە ەدى. ال بەسىنشىسىن 17 اقپان كۇنى تۇندە ەرلەردىڭ فريستايلشى اكروباتى انتون كۋشنير قوستى. ەكىنشى ورىنعا اۆستراليالىق دەۆيد مورريس, ءۇشىنشى ورىنعا قىتاي زونيان تسزيا تابان تىرەگەن بۇل دودادا وسى كۇنى قازاقستاندىقتار ساپىنان جارىسقا شىققان ەكەۋ – سەرگەي بەرەستوۆسكي مەن باعلان ىڭكاربەك تە كۇش سىناستى. وكىنىشكە قاراي, بۇلار وسىنىڭ الدىندا سايىستىڭ وسى ءتۇرى بويىنشا جاپ-جاقسى جەتىستىككە جەتكەن ەكى قىزىمىزدىڭ دەڭگەيىنە جەتە المادى.
ءۇش دۇركىن ۇزدىكتەر
جالپى, قىسقى وليمپيا ويىندارى تاريحىندا تاپ وسىلايشا ءۇش مارتە چەمپيون اتانىپ, ءوز ەلىنىڭ باتىرى اتاعىن قوسا العان سپورتشىلار بۇدان بۇرىن دا بولعان. ءبىر قىزىعى, سونداي دارەجەگە جەتكەن ەكەۋ دە رەسەي قۇراماسىنىڭ شاڭعىشى قىزدارى ەكەن. ءبىرىنشى رەت مۇنداي قۇرمەتكە 1994 جىلى ليۋبوۆ ەگوروۆا بولەندى. ول الدىمەن 1992 جىلى فرانتسۋزدىڭ البەرۆيل قالاسىندا وتكەن ويىنداردا ءۇش دۇركىن چەمپيون اتانعان. بۇلاردىڭ ەكەۋىن جەكە جۇگىرىستە السا, ۇشىنشىسىنە ەستافەتا ارقىلى قول جەتكىزگەن. سودان سوڭ 1994 جىلى نورۆەگتىڭ ليللەحاممەر شاھارىندا وسى تابىستى قايتالاعان. كەلەسى ساڭلاق – لاريسا لاگۋتينا 1998 جىلى جاپوننىڭ ناگانو قالاسىندا جوعارىداعى ارىپتەسىندەي ەكى جەكە جۇگىرىستە جانە ەستافەتادا التىن مەدال العانى ءۇشىن ەلىنىڭ ەڭ جوعارى ماراپاتىنا يە بولعان. ول مۇنىڭ الدىنداعى ليللەحاممەر وليمپياداسىندا تاعى ەكى التىن مەدال العان. ال ءبىر وليمپيا ويىندارىندا جەكە جۇگىرىستە ءتورت التىن مەدالدى ەنشىلەگەن جالعىز ايەل زاتى اتاقتى كونكيشى ليديا سكوبليكوۆا عانا بولاتىن. ول 1964 جىلى ينسبرۋكتە (اۆستريا) وسى اسۋدى ءبىرىنشى بولىپ باعىندىردى. سول ءۇشىن وعان «قۇرمەت بەلگىسى» وردەنى بەرىلدى. ونىڭ الدىنداعى سكۆو-ۆەللي وليمپياداسىندا ل.سكوبليكوۆا ەكى التىن مەدال العان ەدى.
ءسوزدىڭ رەتى كەلگەندە, سوچيدە كۇنى بۇگىنگە دەيىن ەكى دۇركىن چەمپيون بولىپ ۇلگەرگەن باسقا دا سپورتشىلاردىڭ ەسىمدەرىن اتاي كەتەيىك. ولاردىڭ اراسىندا ترامپليننەن شاڭعىمەن سەكىرۋشى پولياك كاميل ستوح, شۆەيتساريالىق شاڭعىشى داريو كولونيا, فرانتسۋز بياتلونشىسى مارتەن فۋركاد بار. بۇلاردىڭ تىزبەگىنە, سونداي-اق, مانەرلەپ سىرعاناۋدان اۋەلى كوماندالىق جارىستا التىن مەدال الىپ, سوڭىنان جەكە وزدەرىنىڭ سپورتتىق جۇپتارى بويىنشا تاعى دا چەمپيون اتانعان رەسەيلىك تاتيانا ۆولوسوجار مەن ماكسيم ترانكوۆتى دا قوسۋعا بولادى.
تازا وليمپيا رەكوردتارى جايىنا كەلسەك, بۇگىنگى تاڭعا ونىڭ تورتەۋى تىركەلدى. ءبىر قىزىعى, ولاردىڭ ءبارى كونكيشىلەر سايىسىندا تىركەلدى. الدىمەن ەرلەردىڭ 5000 مەترگە جۇگىرۋىندە گوللاند سۆەن كرامەر ءوزىنىڭ ۆانكۋۆەردەگى رەكوردىن جاڭارتتى. سوسىن ايەلدەردىڭ 1500 مەترلىك ديستانتسياسىندا ونىڭ وتانداسى يورين تەر مورس تاعى ءبىر ۇزدىك كورسەتكىشتى تىركەدى. قالعان ەكى رەكوردتى كورەي قىزى سانگ-حۆا لي ءوز ەنشىسىنە جازدى. ول بۇلاردى 500 مەترگە جۇگىرۋدىڭ ءبىرىنشى ديستانتسياسى مەن قوسسايىسى قورىتىندىسىندا جاسادى.
گوللاندتىڭ ءبىر بيىگى
ويىنداردا قازىر «گوللاندتىڭ ءبىر بيىگى» دەگەن ۇعىم پايدا بولدى. دىبىستىق جاعىنان از عانا وزگەرىسى بار بۇل باعامنىڭ كىشى ازيا تۇبەگىندەگى ءبىر اتاۋعا ۇقساستىعى ونىڭ وزگەرمەلىگى مەن توسىن جايلارعا تولىلىعىندا بولىپ تۇر.
جۇلدەسىنىڭ باسىم بولىگىن, دالىرەك ايتقاندا, جيناعان 17 مەدالىنىڭ 16-سىن كونكي سپورتىنان كەلتىرگەن, 1 عانا قولا مەدالدى شورت-ترەكتەن قورجىنعا سالعان نيدەرلاند ەلىنىڭ ساڭلاقتارى مۇندا 5 التىن, 5 كۇمىس جانە 6 قولا جۇلدەنى مويىندارىنا تاعىپ ۇلگەردى. مۇنداعى تاڭعالاتىن نارسە جالعىز بۇل ەمەس, «كۇرەكتەي مۇزدى توڭدىرعان» گوللاند ۇشقىرلارى وسى جارىس جولدارىندا جۇلدەگەرلەر تۇعىرىن ءۇش رەت تۇگەل وزدەرى جاۋلاپ الدى. ماسەلەن, ەرلەر بۇعان دەيىن 500 جانە 5000 مەترگە جۇگىرۋدە تەپكىشەك تورىنەن تومەنگە قاراي تۇگەل وزدەرى قول بۇلعاپ تۇرعان بولسا, سوڭعى مەزەتىندە بۇل ەرلىكتى قىزدار قايتالادى. بۇل جولى ولار جىگىتتەردەن دە اسىپ ءتۇسىپ, 1500 مەتر قاشىقتىققا جۇگىرۋدە العاشقى ءتورت ورىندى تولىق يەلەندى.
وسىدان كەيىن گوللاندتىقتار جالپى مەدالدار سانى جاعىنان دا ءبىرىنشى ورىنعا شىقتى. بۇل جونىندەگى كورسەتكىش بويىنشا كەلەسى ورىنعا 16 مەدال قورىمەن رەسەي جانە اقش سپورتشىلارى جايعاستى.
مىنە, ءار ەلدىڭ اڭگىمە وتەر ءوز بيىگى بار. ءبىز جالعىز قولا جۇلدەنىڭ وزىنە شۇكىرشىلىك ەتىپ جۇرگەنىمىزدە, نورۆەگيانىڭ جانكۇيەر قاۋىمى ەستافەتادان مەدال الا الماي قالعان ەرلەرى مەن ايەلدەرىنىڭ شاڭعىشىلار قۇراماسىنا ەلگە كەلگەندەرىندە ەسىكتەن كىرگىزبەيتىندەي بولىپ تالاقتارى تارس جارىلىپ وتىر. ولارعا سوسىن سوچيگە 14 اقپان كۇنى ءوز سپورتشىلارى ءۇشىن جانكۇيەرلىك جاساۋعا كورولەۆا سيلۆيانى ەرتە كەلگەن شۆەتسيا كورولى كارل XVI گۋستاۆ كەشە باسۋ ايتىپتى. «شۆەدتەر مەن نورۆەگتەر – ەجەلدەن ءبىر-ءبىرىمەن تۋىس حالىقتار. ەندەشە, مەدالدى دا ءوزارا باۋىرلاستارشا بولىسەيىك. ىلعي ءبىر جاقتىڭ الا بەرگەنى قىزىق بولمايدى», دەپتى ول. جوعارى مارتەبەلى اعزامنىڭ بۇلايشا بىتىمگە شاقىرۋىنىڭ ءجونى بار. سەبەبى, بۇل ەكى باۋىرلاس ەل سپورتشىلارىنىڭ «ماڭگى بىتپەس» شاڭعى باسەكەسىندە وسىعان دەيىن نورۆەگتەر باسىم بولىپ كەلىپ ەدى. ال سوڭعى ەكى كۇندە شۆەدتەر ايەلدەردىڭ 4ح5 شاقىرىمدىق ەستافەتاسىندا دا, ەرلەردىڭ 4ح10 شاقىرىمدىق ەستافەتاسىندا دا ءبىرىنشى ورىن الىپ, نورۆەگتەر, ءتىپتى, مەدالدەردىڭ اۋىلىنا جەتە الماي قالعان.
شىركىن, ءبىر توبەنىڭ توزاڭىن ءبىر توبەگە قوساتىن ەڭكۋ-ەڭكۋ جەر شالعان ەرلەرىمىز كوپ بولىپ, تاپ وسىنداي باسەكە تۋدىرعان بالسىنىستەر ءبىزدىڭ اۋىلدار جاقتان دا بۇرقىراپ كورىنىپ جاتسا عوي!
كەشە ءبىزدىڭ سپورتشىلارىمىز جارىستىڭ ءۇش ءتۇرى بويىنشا سورەگە شىقتى.
سپورتشىلار وليمپيادا جايلى نە دەيدى؟
اقپاننىڭ 6-سىندا باستالعان قىسقى ويىندارعا قاتىسۋشىلاردىڭ كوپشىلىگى وزدەرىنىڭ الەۋمەتتىك جەلىلەرىندە مۇنداعى احۋال تۋرالى ويلارىن ءتۇسىرىپ جاتىر. ولاردىڭ ءبىرازى تومەندەگىدەي پىكىرلەر بىلدىرەدى. ولا ۆيگەن حاتتەستاد (نورۆەگيا), شاڭعى جارىسىنىڭ ەركىن ءادىسى بويىنشا سوچيدەگى وليمپيا ويىندارىنىڭ چەمپيونى: – ۇيىمداستىرۋشىلار وتە جاقسى ەڭبەك ەتىپتى: بىزگە ىڭعايلى بولۋى ءۇشىن جۇرەتىن جەرلەرىمىزدىڭ قارلارىنا دەيىن كۇرەپ قويعان. مەن, ءتىپتى, بۇدان ارتىق نە ىستەۋ كەرەك ەكەنىن دە بىلمەيمىن. سيدني كروسبي (كانادا), حوككەيشى: – ءبىز قالاشىقتا تاماشا تۇرىپ جاتىرمىز. ءبارى جاپ-جاقىن, مۇز ايدىنىنا دەيىن جاياۋ بارا سالامىز. جالپى, مۇنداعىلاردىڭ ءبارى رازى, ويىن ىرعاعىنا ەندى كىرىپ كەلەمىز. پەرنەلل كارل سۋببان (كانادا), حوككەيشى: – ءبارى تاماشا. كەرەمەت ورنالاستىق, بولمەلەرى وتە جاقسى. جىگىتتەر مۇنداعى جاعدايدىڭ تۋريندەگىدەن ارتىق ەكەنىن ايتىپ جاتىر. اۋا رايى دا تاڭعاجايىپ بولىپ تۇر. بىزگە وسىنداي ىڭعايلى جاعداي جاساپ بەرگەن سوچي مەن رەسەي تۇرعىندارىنا العىس ايتقانىمىز ءلازىم. داچيري شەرپا (نەپال), تاۋ شاڭعىشىسى: – العان اسەرلەرىمىز بارىنشا جاقسى. قالاشىقتاعى ۆولونتەرلەر سپورتشىلارعا ىلعي جايدارى جۇزبەن قارايدى, ءبارى ءبىر-بىرىمەن امانداسىپ تۇرادى.وباما اقش حوككەيشىلەرىن قۇتتىقتادى
اقش پرەزيدەنتى باراك وباما اق ءۇيدىڭ رەسمي تۆيتتەرىندە رەسەي كومانداسىن بۋلليتتەن ۇتقان ءوز ەلىنىڭ حوككەيشىلەر قۇراماسىن جانە وسى جەڭىسكە جەتكىزگەن تي دجەي ءوشيدى قۇتتىقتادى. ەسكە سالا كەتەيىك, سەنبى كۇنى امەريكالىق كوماندا وليمپيا ويىندارى تۋرنيرىندە الاڭ يەلەرىن بۋلليت بويىنشا 3:2 ەتىپ ۇتقان بولاتىن. نەگىزگى ۋاقىت پەن وۆەرتايم جەڭىمپازدى انىقتاي المادى. ەسەپ – 2:2. ال فورۆارد تي دجەي وشي ويىننان كەيىنگى التى ءبۋلليتتىڭ تورتەۋىن ءتيىمدى پايدالانا ءبىلدى.ەڭبەك سىڭىرگەن شەبەرلەر اتاندى
وليمپيادانىڭ العاشقى اپتاسىندا رەسەيدىڭ مەدالدار جەڭىپ العان 10 ساڭلاعى «رف ەڭبەك سىڭىرگەن سپورت شەبەرى» اتاعىنا يە بولدى. ولاردىڭ تىزىمىنە كونكيشى ولگا گراف, بياتلونشى ولگا ۆيلۋحينا, فريستايلشى الەكساندر سمىشلياەۆ, مانەرلەپ سىرعاناۋشىلار ەكاتەرينا بوبروۆا, ەلەنا يلينىح, نيكيتا كاتسالاپوۆ, فەدور كليموۆ, يۋليا ليپنيتسكايا, دميتري سولوۆەۆ جانە كسەنيا ستولبوۆا ەندى. وسى كۇندەردە وليمپيادا جۇلدەلەرىنە قول جەتكىزگەن ەۆگەني پليۋششەنكو, ماكسيم ترانكوۆ جانە تاتيانا ۆولوسوجار سىندى سپورتشىلاردا مۇنداي اتاق بۇرىننان بار بولاتىن.اۋرۋ بالالارعا سنوۋبوردتارىن سىيلادى
سوچي وليمپياداسىندا چەمپيوندىق اتاعىن قورعاي الماي قالعان امەريكالىق سنوۋبوردشى شون ۋايت قاتەرلى ىسىك اۋرۋلارىمەن اۋىراتىن بالالارعا وزىمەن بىرگە اكەلگەن بارلىق سنوۋبوردتارىن سىيعا تارتتى. بۇعان دەيىن ەكى رەت وليمپيا ويىندارىنىڭ چەمپيونى بولىپ ۇلگەرگەن شون ۋايت سوچيدەگى ويىنداردا ءساتسىز ونەر كورسەتىپ, حافپايپتا 4-ورىندى قاناعات تۇتقان ەدى. «ءوزىنىڭ تاقتايشالارىن ۋايت قاتەرلى ىسىكپەن كۇرەسىپ جۇرگەن بالالارعا سىيلادى. بالالار مۇندا قايىرىمدىلىق شارالارى باعدارلاماسى اياسىندا وزدەرى ءپىر تۇتاتىن سپورتشىنى كورۋ ءۇشىن ارنايى ۇشىپ كەلگەن ەدى», دەپ اتاپ ءوتتى سوچي-2014 سايتى.سوچيدە مەكتەپ اشپاقشى
سوچيدە ەكى دۇركىن الەم چەمپيونى اتاعىن جەڭىپ العان رەسەيلىك مانەرلەپ سىرعاناۋشىلار تاتيانا ۆولوسوجار مەن ماكسيم ترانكوۆ 2018 جىلعى وليمپيا ويىندارىندا دا ەل نامىسىن قورعاۋعا دايىن ەكەندەرىن جەتكىزدى. بۇدان بولەك, ولار سوچيدە وزدەرىنىڭ مانەرلەپ سىرعاناۋ مەكتەبىن اشقىلارى كەلەتىندەرىن دە ءبىلدىردى. رەسەيلىك «تۆ-تسەنتر» تەلەارناسى وسى رەتتە ماكسيم ترانكوۆتىڭ سوزىنەن: «ءبىز تانيا ەكەۋمىز وسى جەردەن ءوزىمىزدىڭ مانەرلەپ سىرعاناۋ مەكتەبىن اشىپ, وعان جاس جاتتىقتىرۋشىلاردى تارتقىمىز كەلەدى. سپورتتىق مانسابىمىزدى ازىرگە توقتاتقىمىز كەلىپ وتىرعان جوق. بىزگە ويىنداردان كەيىن كوپتەگەن سپورت نىساندارىنىڭ, سونىڭ ىشىندە مانەرلەپ سىرعاناۋشىلار ءۇشىن جاسالعان مۇز ارەناسىنىڭ سول قالپىندا قالاتىنى ايتىلدى. ەندى ءبىزدىڭ وسىندا جاتتىعىپ, وسىندا تۇرعىمىز كەلەدى», دەگەن دايەكتەمە كەلتىردى. سەرىك ءپىرنازار, «ەگەمەن قازاقستان» – سوچيدەن.
