ەلباسى • 26 قازان، 2021

ەلباسى اكادەميك سەرىك قيراباەۆتىڭ تۋىستارىنا كوڭىل ايتۋ جەدەلحاتىن جولدادى

69 رەت كورسەتىلدى

ەلباسى اكادەميك سەرىك قيراباەۆتىڭ قايتىس بولۋىنا بايلانىستى مارقۇمنىڭ وتباسى مەن تۋعان-تۋىستارىنا كوڭىل ايتۋ جەدەلحاتىن جولدادى، دەپ حابارلايدى Egemen.kz.

نۇرسۇلتان نازارباەۆ كورنەكتى ادەبيەتتانۋشى، سىنشى، فيلولوگيا عىلىمىنىڭ دوكتورى، ۇلتتىق عىلىم اكادەمياسىنىڭ اكادەميگى سەرىك سمايىل ۇلى قيراباەۆتىڭ دۇنيەدەن وتۋىنە بايلانىستى اۋىر قايعىعا ورتاقتاسىپ، كوڭىل ايتتى.

«سانالى عۇمىرىن ءباسىبۇتىن عىلىمي-پەداگوگيكالىق قىزمەتكە ارناعان سەرىك سمايىل ۇلى وتاندىق ادەبيەتتانۋ سالاسىن دامىتۋعا قوماقتى ۇلەسىن قوسقان ءىرى عالىم بولاتىن. ول وتكەن عاسىردىڭ ەلۋىنشى جىلدارىنان باستاپ ورتا مەكتەپكە ارنالعان وقۋلىقتار مەن وقۋ باعدارلامالارىن جازۋ جانە جەتىلدىرۋ ىسىنە ايانباي اتسالىسقان زور پاراسات يەسى، ۇلاعاتتى ۇستاز ەدى. ۇنەمى ازاماتتىق ايقىن ۇستانىمىن تانىتىپ، قاجىرلى قايراتكەرلىگىمەن ەلىمىزدىڭ ءوسىپ-وركەندەۋىنە اتسالىسىپ، كوپتىڭ سىي-قۇرمەتىنە بولەندى، سوڭىنا كوپتەگەن ءماندى عىلىمي زەرتتەۋلەرى مەن ءىزباسار شاكىرتتەرىن قالدىردى»، دەلىنگەن جەدەلحاتتا.

ەلباسى سەرىك سمايىل ۇلىنىڭ عيبراتتى عۇمىرى مەن جارقىن بەينەسى جۇرتشىلىق جادىندا ءاردايىم ساقتالاتىنىنا سەنىم ءبىلدىردى.

سوڭعى جاڭالىقتار

ۇقساس جاڭالىقتار