وسىمەن ءتورتىنشى مارتە ءوتىپ وتىرعان اۋقىمدى شارانىڭ ماقساتى – ادامزاتتىڭ بەيبىت ءومىر سۇرۋىنە كەدەرگى كەلتىرەتىن كەلەڭسىزدىكتەرمەن بىرلەسە كۇرەسۋ ءھام بۇگىنگى جانە كەلەشەك ۇرپاقتى ادامزاتقا ورتاق قۇندىلىقتار ارقىلى ىنتىماققا ۇيىستىرۋ. ءومىر ءسۇرۋ سالتى ءبىر-بىرىمەن مۇلدە قابىسپايتىن ءتۇرلى حالىقتاردى مادەنيەتتەر توعىسى ارقىلى بىرىكتىرۋدى كوزدەگەن جوبا وزىق بىلىمگە اپاراتىن ۇزدىك يدەيالاردى الەم جۇرتىنىڭ يگىلىگىنە باعىتتاۋدى كوزدەيدى.
– ادامزات بالاسىنىڭ الدىنان كۇن سايىن شەشىمى كۇردەلى ماسەلەلەر كولدەنەڭدەپ شىعىپ جاتىر. بۇدان مۇقالماي ءوتۋ ءۇشىن رۋحاني بىرلىك كەرەك. ءبىلىم – ادامدى شىرقاۋ بيىككە كوتەرەتىن ۇلى كۇش. الەم جاستارى ادامي اسىل-قاسيەتتەردىڭ ءنارىن مادەنيەتتەر بايلانىسى ارقىلى سىڭىرەدى. ولاردى ىزگىلىككە بەيىلدەندىرۋ, ءبىر-ءبىرىن قۇرمەتتەۋگە ۇيرەتۋ ءۇشىن ورتاق الاڭ كەرەك. ءبىزدىڭ نەگىزگە الىپ وتىرعان ماقساتىمىز دا وسى. جىل سايىن كەڭەستىڭ اۋقىمى ارتىپ, الەم حالقىن الاڭداتقان وزەكتى پروبلەمالار, تاريح پەن مادەنيەت تاقىرىپتارى تالقىلانىپ ءجۇر, – دەيدى حالىقارالىق مادەنيەتتەردى جاقىنداستىرۋ ورتالىعىنىڭ ديرەكتورى, ايتۋلى اقىن ولجاس سۇلەيمەنوۆ.
كونفەرەنتسيانىڭ «سانالى ءوزارا تاۋەلدىلىك جانە پلانەتارلىق سانا» دەپ اتالعان بولىمىندە مادەني ارتۇرلىلىكتى ساقتاۋ, بوستاندىق, تەڭدىك, ىنتىماقتاستىق, توزىمدىلىك, الەۋمەتتىك ينتەگراتسيا جانە تابيعاتتى قورعاۋ سىندى ماڭىزدى تاقىرىپتار تالقىلاندى. ال «تۇراقتى دامۋدا ماڭىزدى ديالوگكە قولداۋ ءبىلدىرۋ» سەكتسياسىندا ادامزات دامۋىنىڭ ەتيكالىق, تاريحي, الەۋمەتتىك جانە مادەني اسپەكتىلەرى, سونداي-اق مادەني پليۋراليزم مەن عىلىمداعى ديالوگتى قولداۋ ماسەلەلەرى قارالدى.
جاھاندىق باسقوسۋدا مادەنيەتتەردىڭ شىنايى جاقىنداسۋىنا قولداۋ بىلدىرۋدەگى ءبىلىم بەرۋ مەن باق-تىڭ ءرولى, الەۋمەتتىك جەلىلەردىڭ ۇلەسى سىندى زەرتتەۋ تاقىرىپتارى دا نازاردان تىس قالعان جوق.
– الەم وزگەردى. ادامداردىڭ ءومىر ءسۇرۋ داعدىسى دا بۇرىنعىداي ەمەس. تەحنوكراتيا سالتانات قۇرعان داۋىردە كوپ جەتىستىككە جەتكەنىمىزبەن, رۋحاني قۇندىلىقتار قۇلدىراي باستادى. ايداي الەمگە اۋىز سالعان پاندەميا ادامزاتتى ۇرەي قۇشاعىنا الدى. بۇل سوعىستان كەيىنگى بەتپە-بەت كەلگەن ۇلكەن قاسىرەت. ەرتەڭگى كۇنگە سەنىم السىرەپ, ادامداردىڭ بولاشاققا دەگەن ءۇمىت اتموسفەراسى تۇماندانا ءتۇستى. ناق وسى كەزدە الەمدى قۇتقاراتىن قۇدىرەتتى كۇش – رۋحاني بىرلىك پەن مادەني ىنتىماقتاستىق. وسى الاڭ ارقىلى ءار ەلدىڭ مادەنيەتى مەن تاريحى تانىستىرىلىپ, وتكەن كۇندەر ەنشىسىندە بۇدان دا اۋىر, بۇدان دا قيىن كەزەڭدەر وتكەنىنە وي جۇگىرتۋ ارقىلى بۇگىنگى جاعدايدى ساراپتاي الامىز. ادامزاتتىڭ تۇپكى مۇراتى باقىتتى ءومىر ءسۇرۋ. حالىقارالىق مادەنيەتتەردى جاقىنداستىرۋ ورتالىعى الەم ەلدەرىن باقىتتى تىرشىلىك كەشۋگە, شىنايى ءومىر سۇرۋگە ۇندەيتىن جوبا دەپ ەسەپتەيمىن, – دەيدى كونفەرەنتسيا قاتىسۋشىلارىمەن رەسەيدەن ونلاين بايلانىسقا شىققان م.ۆ.لومونوسوۆ اتىنداعى ممۋ-ءنىڭ ءبىرىنشى پرورەكتورى يگور ابىلگازيەۆ.
جاستاردىڭ بويىنا ادامزاتتىڭ تۇراقتى دامۋىنا باستايتىن قايرات قۇيىپ, ءبىلىم مادەنيەتىن قالىپتاستىرۋدىڭ ماڭىزى زور. سەبەبى ادامزات وركە-نيەتىنىڭ ورلەۋىنە ۇلەس قوساتىن ەتيكالىق جانە ازاماتتىق كوزقاراسى جوعارى ۇرپاق قانا وسى بايلانىستى جالعاي الادى. ساراپشىلار بۇل ءۇشىن ءداستۇرلى كەڭەستە كوتەرىلگەن ماسەلەلەردى زەرتتەپ-زەردەلەپ, مادەني ىنتىماقتاستىققا باستايتىن جوبالاردى جانداندىرا بەرۋ قاجەت دەپ ەسەپتەيدى.
بىرىككەن ۇلتتار ۇيىمىنىڭ باس اسسامبلەياسى 2013-2022 جىلدار ارالىعىن مادەنيەتتەردى جاقىنداستىرۋدىڭ حالىقارالىق ونجىلدىعى دەپ جاريالاعانى امبەگە ايان. ولجاس سۇلەيمەنوۆ جەتەكشىلىك ەتەتىن الماتىداعى مادەنيەتتەردى جاقىنداستىرۋ ورتالىعى مۋزەي قۇندىلىقتارى مەن تاريحي-مادەني مۇرانى انىقتاۋ, تولىقتىرۋ, زەرتتەۋ جانە ناسيحاتتاۋ جۇمىستارىمەن اينالىسىپ كەلەدى.
