قوعام • 20 قازان، 2021

Nur Otan: ءبىلىم جانە دەنساۋلىق ساقتاۋ نىساندارىنا بولىنەتىن قاراجات ماقساتسىز جۇمسالادى

60 رەت كورسەتىلدى

قۇرىلىس، ءبىلىم بەرۋ جانە دەنساۋلىق ساقتاۋ نىساندارىن جوندەۋ جانە جاڭعىرتۋ سالاسىنداعى ءتۇيىندى ماسەلەلەر «Nur Otan» پارتياسى پارتيالىق باقىلاۋ كوميتەتىنىڭ وتىرىسىندا قارالدى، دەپ حابارلايدى Egemen.kz.

پارتيانىڭ ءباسپاسوز قىزمەتى حابارلاعانداي، «Nur Otan» سايلاۋالدى باعدارلاماسىندا وسى جىلى 200 جاڭا مەكتەپ سالۋ جانە جۇمىس ىستەپ تۇرعان 1000 مەكتەپتى جاڭعىرتۋ قاراستىرىلعان. الايدا، پارتيالىق باقىلاۋ كوميتەتى مۇشەلەرىنىڭ پىكىرىنشە، رەسپۋبليكالىق جانە وڭىرلىك جول كارتالارىنىڭ كەيبىر تاراۋلارى ورىندالماي قالۋى مۇمكىن.

«بۇل جەردە ءبىر عانا ءبىلىم جانە عىلىم مينيسترلىگىنىڭ جۇمىسى جەتكىلىكسىز. اكىمدىكتەر دە بەلسەندىلىك تانىتۋى ءتيىس. قازىر جەرگىلىكتى اتقارۋشى ورگاندار تاراپىنان بيىل بولىنگەن بيۋدجەت قاراجاتىن يگەرۋدىڭ قارقىنى تومەن ەكەنى بايقالادى»، دەدى ۆيتسە-مينيستر بيبىگۇل اسىلوۆا.

پارتيانىڭ سايلاۋالدى ۋادەلەرىندە بەلگىلەنگەن تاعى ءبىر ماڭىزدى مىندەت – دەنساۋلىق ساقتاۋ نىساندارىن سالۋ جانە جوندەۋ.

پارتيالىق باقىلاۋ كوميتەتى جۇمىس توبىنىڭ قورىتىندىسىنا سايكەس، قازىرگى ۋاقىتتا بارلىق وڭىرلەردە ءبىلىم بەرۋ جانە دەنساۋلىق ساقتاۋ نىساندارىن سالۋعا، كۇردەلى جوندەۋگە جانە جاڭعىرتۋعا بولىنەتىن قاراجاتتى ماقساتسىز پايدالانۋ ماسەلەلەرى بار.

وسى رەتتە سالىنىپ جانە جوندەلىپ جاتقان ءبىلىم بەرۋ مەن دەنساۋلىق ساقتاۋ نىساندارىن ساپاسىز جوسپارلاۋ جانە جوبالاۋ، قۇرىلىس ساپاسىن ءتيىمدى باقىلاۋدىڭ بولماۋى، سمەتالىق قۇنىن نەگىزسىز كوتەرۋ، ورىندالماعان جۇمىس كولەمى ءۇشىن اقى تولەۋ، بالالاردى اپاتتىق جاعدايداعى عيماراتتاردا وقىتۋ جانە ت. ب. فاكتىلەر اتاپ ءوتىلدى.

وتىرىس قورىتىندىسى بويىنشا پارتيالىق باقىلاۋ كوميتەتى ءبىلىم جانە دەنساۋلىق ساقتاۋ مينيسترلىكتەرىنە 1 جەلتوقسانعا دەيىن ءار وڭىردەگى بارلىق ءبىلىم بەرۋ جانە دەنساۋلىق ساقتاۋ مەكەمەلەرىنە تولىق تەكسەرۋ جۇرگىزۋدى، قۇرىلىستى قارجىلاندىرۋ ادىستەمەسىن قايتا قاراۋدى جانە ءمجا شەڭبەرىندە سالىنىپ جاتقان نىساندار ءۇشىن مەملەكەتتىك ۇلگى ستاندارتتار مەن جوبالاردى بەكىتۋدى مىندەتتەدى.

سونىمەن قاتار، ءبىلىم جانە عىلىم مينيسترلىگىنە 15 قاراشاعا دەيىن انىقتالعان ماسەلەلەردى كورسەتە وتىرىپ، ينتەرناتتاردىڭ مونيتورينگ ناتيجەلەرىن تالداۋ جانە اكىمدىكتەرگە جىبەرۋ، وسى پروبلەمالاردى شەشۋدىڭ ناقتى مەرزىمدەرى مەن جولدارىن قامتيتىن 2021-2025 جىلدارعا ارنالعان ينتەرنات مەكەمەلەرىن سالۋ مەن جوندەۋدىڭ ەگجەي-تەگجەيلى جوسپارىن ازىرلەۋ ۇسىنىلدى.

«پارتيانىڭ وڭىرلىك فيلالدارى الەۋمەتتىك نىسانداردى سالۋ جانە جوندەۋ بويىنشا جوبالاردىڭ ىسكە اسىرىلۋىنا مۇقيات تالداۋ جۇرگىزۋى كەرەك. ءتۇرلى جونسىزدىك فاكتىلەرى انىقتالعان جاعدايدا، كىنالى جاۋاپتى تۇلعالارعا – پارتيا مۇشەلەرىنە پارتيالىق جازالاۋ شارالارىن قولدانۋ قاجەت»، دەپ تۇيىندەدى كوميتەت توراعاسى ارتۋر پلاتونوۆ.

پارتيا ءباسپاسوز قىزمەتىنىڭ مالىمەتىنشە، بيۋدجەت قاراجاتىن ءتيىمسىز جۇمساۋ فاكتىلەرىنە جول بەرگەنى ءۇشىن «سوگىس» تۇرىندەگى پارتيالىق جازالاۋ شاراسىنا الماتى وبلىسى دەنساۋلىق ساقتاۋ باسقارماسىنىڭ باسشىسى ومىرزاق نيازبەكوۆ، قىزىلوردا وبلىسى ءبىلىم باسقارماسىنىڭ باسشىسى اقزيرا قاسىموۆا جانە دەنساۋلىق ساقتاۋ باسقارماسىنىڭ باسشىسى ءسابيت پازىلوۆ، ال «ەسكەرتۋ» تۇرىندەگى جازاعا قوستاناي وبلىسى ءبىلىم باسقارماسىنىڭ باسشىسى زاۋرە بايمەنوۆا جانە قوستاناي اۋدانىنىڭ اكىمى جانسۇلتان تاۋكەنوۆ تارتىلادى.

پارتيالىق باقىلاۋ كوميتەتى سۇراتقان رەسمي اقپاراتتى ۋاقىتىندا ۇسىنباعانى ءۇشىن پاۆلودار وبلىسى اكىمى اپپاراتىنىڭ باسشىسى نۇرلان دۇيسەمبينوۆكە جانە اقتوبە وبلىسى اكىمى اپپاراتىنىڭ باسشىسى قايرات رايىمقۇلوۆقا «ەسكەرتۋ» بەرىلەدى.

 

سوڭعى جاڭالىقتار

جەكپە-جەكسىز وتكەن العاشقى جىل

كاسىپقوي بوكس • بۇگىن، 09:08

«دينامودان» جەڭىلدى

حوككەي • بۇگىن، 07:34

كرەاتيۆتى كىتاپ دۇكەنى

ايماقتار • بۇگىن، 07:33

جانبوتا جاراپ تۇر

سپورت • بۇگىن، 07:27

اقىن تۇتىنعان كەسە

تاريح • بۇگىن، 07:24

ۇلى جامبىل مۇراسى ۇلىقتالدى

رۋحانيات • بۇگىن، 00:33

ۇقساس جاڭالىقتار