سقو سوتىنىڭ مالىمەتىنشە, اقشالاي ءوندىرىپ الۋ پەتروپاۆل قالالىق اكىمدىگىنىڭ وكىلىنە قولدانىلدى. وبلىستىق مامانداندىرىلعان اۋدانارالىق اكىمشىلىك سوتى اكىمشىلىك ءىس بويىنشا الدىن الا تىڭداۋدا بۇل جازانى مۇددەلى تۇلعاعا مىندەتتى ورىنداماعانى ءۇشىن قولداندى.
«قر اكىمشىلىك راسىمدىك-پروتسەستىك كودەكسى نورمالارىنا سايكەس اقشالاي ءوندىرىپ الۋ جەكە, لاۋازىمدى ادامعا, زاڭدى تۇلعاعا نە ونىڭ وكىلىنە قولدانىلادى. بۇل جازاعا سوت بەلگىلەگەن مەرزىمدى دالەلسىز سەبەپتەرمەن بۇزا وتىرىپ, سوتتىڭ سۇراۋ سالۋىن ورىنداماعان جاعدايدا تارتىلادى. ويتكەنى قۇجاتتاردى مەرزىمىندە ۇسىنباۋ الدىن الا تىڭداۋ كەزەڭىندە ءىستى قاراۋدىڭ سوزىلۋىنا اكەلەدى», دەلىنگەن حابارلامادا.
سوت ۇيعارىمىمەن اقشالاي ءوندىرىپ الۋ مولشەرى - 10 اەك, بۇل 29 170 تەڭگەنى قۇرايدى. سقو مامانداندىرىلعان اۋدانارالىق اكىمشىلىك سوتى جۇمىسىن باستاعان 2021 جىلدىڭ 1 شىلدەسىنەن باستاپ سوت تالاپتارىن ورىنداماعانى ءۇشىن بارلىعى 8 ادامعا اقشالاي ءوندىرىپ الۋ قولدانىلدى.
