قازاقستان • 19 قازان، 2021

اۋىل تۇرعىندارىنىڭ ءومىر ءسۇرۋ ساپاسى قاشان جاقسارادى؟

80 رەت كورسەتىلدى

ۇكىمەت وتىرىسىندا «اۋىل - ەل بەسىگى» جوباسىنىڭ ىسكە اسىرىلۋ بارىسى تالقىلاندى، دەپ حابارلايدى Egemen.kz Primeminister.kz-كە سىلتەمە جاساپ.

ۇكىمەت وتىرىسىندا ۇلتتىق ەكونوميكا ءمينيسترى اسەت ەرعاليەۆ، پاۆلودار وبلىسىنىڭ اكىمى ابىلقايىر سقاقوۆ، قوستاناي وبلىسىنىڭ اكىمى ارحيمەد مۇحامبەتوۆ، الماتى وبلىسىنىڭ اكىمى اماندىق باتالوۆ بايانداما جاسادى.

2019 جىلى باستاۋ العان «اۋىل - ەل بەسىگى» جوباسىنىڭ نەگىزگى ماقساتى - اۋىلداعى ءومىر ءسۇرۋ ساپاسىن جاقسارتۋ، اۋىلدىق اۋماقتاردىڭ ينفراقۇرىلىمىن جاڭعىرتۋ، ولاردى جاڭا وڭىرلىك ستاندارتتارعا دەيىن جەتكىزۋ.

3561 پەرسپەكتيۆالى اۋىل ىرىكتەلىپ الىندى، وندا 6،9 ميلليون ادام نەمەسە اۋىل حالقىنىڭ 89 پايىزى تۇرادى. 2019-2020 جىلدارى تكش، كولىك، ءبىلىم بەرۋ، دەنساۋلىق ساقتاۋ، مادەنيەت جانە سپورت سالالارىندا «اۋىل - ەل بەسىگى» جوباسى شەڭبەرىندە، سونداي-اق جۇمىسپەن قامتۋدىڭ جول كارتاسى، «نۇرلى جول» جانە «نۇرلى جەر» باعدارلامالارىن ەسكەرە وتىرىپ، 618 ميلليارد تەڭگە سوماسىنا 12 مىڭ جوبا ىسكە اسىرىلدى.

بيىل «اۋىل - ەل بەسىگى» جوباسىن ىسكە اسىرۋ شەڭبەرىندە پاۆلودار، قوستاناي، جامبىل، شىعىس قازاقستان وبلىستارى كوش باستاپ تۇر. الماتى، قىزىلوردا جانە اتىراۋ وبلىستارى جوبالاردى ىسكە اسىرۋدىڭ تومەن قارقىنىن كورسەتىپ وتىر.

الداعى 5 جىلدا «اۋىل - ەل بەسىگى» جوباسىن قارجىلاندىرۋ كولەمى 800 ميلليارد تەڭگەگە دەيىن ۇلعايتىلدى، ال بارلىق كوزدەردى ەسكەرە وتىرىپ، اۋىلداردى جاڭعىرتۋعا 1،3 تريلليون تەڭگە جوسپارلانعان.

2025 جىلى اۋىلدىق جەرلەردە سۋمەن جابدىقتاۋ قىزمەتتەرىمەن 100 پايىزدىق قامتاماسىز ەتۋگە قول جەتكىزۋ جوسپارلانۋدا. ۇكىمەتتە اتاپ وتكەندەي، 10 مىڭ شاقىرىم كەنتىشىلىك جولداردىڭ جاعدايى جاقساردى، 12 مىڭ شاقىرىم ينجەنەرلىك جەلىلەر، بىرنەشە مىڭ الەۋمەتتىك ينفراقۇرىلىم نىساندارى سالىنىپ، جوندەلدى، 5 مىڭ اۋىل مەكتەبى جاڭعىرتىلدى.

اوك سالاسىندا 4،5 تريلليون تەڭگە سوماعا 1 مىڭعا جۋىق جوبانى ىسكە اسىرۋ جوسپارلانىپ وتىر. اۋىل شارۋاشىلىعىنداعى ەڭبەك ونىمدىلىگى جوسپار بويىنشا 2،5 ەسە ارتۋى ءتيىس، سونداي-اق قايتا وڭدەلگەن ءونىمنىڭ ۇلەسىن 70 پايىزعا دەيىن جەتكىزە وتىرىپ، اوك ونىمدەرىنىڭ ەكسپورتى دا ۇلعايادى دەپ كۇتىلۋدە. ۇكىمەتتە ميلليون اۋىل تۇرعىنى ءوز تابىسىن ارتتىرادى، اۋىل شارۋاشىلىعىندا 500 مىڭ جۇمىس ورنى قۇرىلادى دەپ كۇتىلۋدە.

«اۋىل - ەل بەسىگى» جوباسىنىڭ ءىس-شارالارىن ىسكە اسىرۋ اۋىل حالقىنىڭ ءومىر ءسۇرۋ ساپاسىن ەداۋىر جاقسارتادى جانە اۋىلدىڭ دامۋىنا جاڭا سەرپىن بەرەدى»، دەدى اسقار مامين.

ۇكىمەت باسشىسى اۋىلدىق اۋماقتاردى دامىتۋدىڭ كەشەندى جانە بىرىڭعاي ءتاسىلىن، 2025 جىلعا قاراي نىسانالى ينديكاتورلارعا قول جەتكىزۋدى، سونداي-اق اۋىلدىق جەرلەردە كرەديت قاراجاتىنا قاجەتتىلىكتىڭ ۇلعايۋىن ەسكەرە وتىرىپ، اوك-ءنى تۇراقتى قارجىلاندىرۋدى قامتاماسىز ەتۋدى تاپسىردى.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار