ۇكىمەت • 18 قازان، 2021

كەزەكتى سەنات وتىرىسىنىڭ كۇن ءتارتىبى بەكىتىلدى

84 رەت كورسەتىلدى

سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا دەپۋتاتتار 21 قازاندا وتەتىن سەنات وتىرىسىنىڭ كۇن ءتارتىبىن بەكىتتى، دەپ حابارلايدى Egemen.kz.

الداعى پالاتا وتىرىسىندا سەناتورلار «رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ مۇشەسىن قىزمەتىنە تاعايىنداۋ تۋرالى» ۇسىنىمدى قارايدى.

سونىمەن قاتار كۇن تارتىبىندە ەكى زاڭ جوباسى قارالادى. ولاردىڭ ءبىرى – «كاسپي تەڭىزىنىڭ تەڭىز ورتاسىن قورعاۋ جونىندەگى نەگىزدەمەلىك كونۆەنتسياعا كاسپي تەڭىزىن جەرۇستى كوزدەرىنەن جانە قۇرلىقتا جۇزەگە اسىرىلاتىن قىزمەت ناتيجەسىندە لاستانۋدان قورعاۋ جونىندەگى حاتتامانى راتيفيكاتسيالاۋ تۋرالى» زاڭ جوباسى.

اتالعان قۇجات تەڭىز ورتاسىنىڭ جەرۇستى كوزدەرىنەن لاستانۋىن بولدىرماۋعا جانە ازايتۋعا ىقپال ەتەدى. ودان بولەك، حاتتامانى راتيفيكاتسيالاۋ ەڭ وزىق قولجەتىمدى تەحنولوگيا مەن تابيعاتتى قورعاۋ تاجىريبەسىن پايدالانۋعا مۇمكىندىك بەرەدى.

سونداي-اق دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك ساتىپ الۋ، جەر قويناۋىن پايدالانۋشىلار مەن تابيعي مونوپوليالار سۋبەكتىلەرىنىڭ ساتىپ الۋى، بايلانىس، اۆتوموبيل كولىگى جانە قورعانىس ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا قارايدى.

زاڭ جوباسى مەملەكەتتىك ساتىپ الۋدى ەرەكشە جاعدايلاردا عانا تىكەلەي شارت جاساسۋ ارقىلى ءبىر كوزدەن الۋ تاسىلىمەن جۇزەگە اسىرۋدى كوزدەيدى.

بيۋرو وتىرىسىندا بۇعان دەيىن ماجىلىستەن كەلىپ تۇسكەن «2004 جىلعى 22 جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» عارىش ايلاعىندا «بايتەرەك» عارىش زىمىران كەشەنىن قۇرۋ تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى جۇمىس ءۇشىن سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنە بەرىلدى.

سوڭعى جاڭالىقتار

ۇقساس جاڭالىقتار