قازاقستاننىڭ ۆاكتسينالاۋ پاسپورتىن مويىنداعان مەملەكەتتەردىڭ ىشىندە ارمەنيا, ارگەنتينا, بەلارۋس, ۆەنگريا, گرۋزيا, يران, قىرعىزستان, مولدوۆا, موڭگوليا, سان-مارينو, تايلاند, تۇركيا مەن ەستونيا بار.
وسىلايشا, قازاقستاندىقتار دا, وسى ەلدەردىڭ ازاماتتارى دا مەملەكەتتىك شەكارانى كارانتيندىك شەكتەۋسىز وتە الادى. ول ءۇشىن كوروناۆيرۋسقا قارسى ۆاكتسينالاۋ پاسپورتىن كورسەتسە جەتكىلىكتى.
پتر-تەست تاپسىرىپ, كارانتيندە وتىرۋدىڭ دا قاجەتى جوق. قازاقستان ازاماتىنىڭ قانداي ەكپە سالدىرعانى دا ماڭىزدى ەمەس. ەڭ باستىسى, ۆاكتسينالاۋ پاسپورتى بولۋى شارت.
ال مىسىر مەن ومان قازاقستاندىقتاردىڭ ۆاكتسينالاۋ پاسپورتىن بىرجاقتى رەتپەن تانىدى. ول جاققا بارعان وتانداسترىمىزعا دا پتر-تەست تاپسىرۋ جانە كارانتيندە وتىرۋ تالابى قويىلمادى.
قازىرگى كەزدە رەسەي, ازەربايجان, يوردانيا, يندونەزيا, ماروككو, وزبەكستان, فيليپپين جانە تاعى باسقا مەملەكەتتەرمەن ۆاكتسينالاۋ پاسپورتىن ءوزارا تانۋ بويىنشا كەلىسسوزدەر جۇرگىزىلىپ جاتىر.
قازاقستان مويىنداعان ەلدەردە كوروناۆيرۋسقا قارسى ۆاكتسينانىڭ ءتۇر-ءتۇرى ەگىلەدى. سونىڭ ىشىندە QazVac (قازاقستاندىق ۆاكتسينا), «سپۋتنيك V» (رەسەيلىك ۆاكتسينا), «سپۋتنيك لايت» (رەسەيلىك ۆاكتسينا), Vero Cell, CoronaVac (قىتايلىق ۆاكتسينالار), AstraZeneca (اعىلشىن-شۆەد ۆاكتسيناسى), Novavax, Pfizer, Moderna, Johnson&Johnson (امەريكالىق ۆاكتسينالار), COVIran Barakat (يراندىق ۆاكتسينا).
ايتا كەتەرى, ۆاكتسينالاۋ پاسپورتىن ءوزارا تانۋ شارالارىمەن سىرتقى ىستەر مينيسترلىگى اينالىسادى. الدىمەن كەلىسسوزدەر جۇرگىزىلەدى. ودان كەيىن ەكى مەملەكەت نوتا الماسىپ, ۆاكتسينالاۋ پاسپورتىن تانۋعا كەلىسەدى. بۇدان بولەك, باس مەملەكەتتىك سانيتار دارىگەر وزگە ەلدە بەرىلگەن ۆاكتسينالاۋ پاسپورتىن تانۋعا رۇقسات بەرە الادى.
