ۇيسىزدىك – كۇيسىزدىكتىڭ باسى. تاپقان اقشاڭا پاتەر جالداپ, قوجايىننىڭ قاس-قاباعىنا جالتاڭداۋ توزاقتىڭ توزاعى. «كىسىدەگىنىڭ كىلتى اسپاندا» دەگەندەي, شىجىناعان شىلدە مەن ازىناعان اقپاندا دالادا قالىپ, تاعدىرىڭنىڭ تاس-تالقان بولۋى دا ونىڭ ءبىر اۋىز سوزىمەن شەشىلەدى. ياعني ادام ادامعا كىرىپتار...
ۇيسىزدىكتەن تالاي ادامنىڭ, تالاي وتباسىنىڭ زارداپ شەككەنى بەلگىلى, ءالى باسىن سۇعار تۇراقتى پانا تابا الماي, قينالىپ جۇرگەندەر قانشاما؟! قۇرىلىستار توقتاپ-توقىراعان جىلداردىڭ زاردابى وسىلاي بولعان ەدى, قازىر تۇيتكىلدىڭ ءتۇيىنى تارقاتىلا باستاعانى انىق. باسقا وڭىرلەردى ايتپاعاندا, ءبىر عانا اقتاۋ قالاسىنىڭ وزىندە ورنى بەلگىلەنگەنى بار, شارباقپەن قورشالعانى بار, قازىعى قاعىلعانى بار, ىرگەتاسى قالانعانى بار, قابىرعاسى كوتەرىلگەنى بار, شاتىرى جابىلعانى بار قاۋلاعان قۇرىلىس... مەكتەپ, بالاباقشا, دۇكەن-دۇڭگىرشەك, ءتۇرلى قىزمەت كورسەتۋ ورىندارىنان بولەك كوڭىل قۋانتاتىنى – تۇرعىن ۇيلەردىڭ كوپتەپ سالىنۋى. بۇل, ارينە, «حالىقتىڭ ءال-اۋقاتىنىڭ ارتۋى – مەملەكەت دامۋىنىڭ نەگىزى» دەپ ساناپ, حالىقتىڭ تۇرمىس-تىرشىلىگىن جاقسارتۋدى بىرتە-بىرتە شەشۋدى جولعا قويعان مەملەكەتتىك مۇددەنىڭ شاپاعاتى. تالاي وتباسىنىڭ ءۇيلى بولۋىنا «قولجەتىمدى تۇرعىن ءۇي-2020» مەملەكەتتىك باعدارلاماسى سەبەپكەر بولعاندىعىن ەشكىم جوققا شىعارا الماس. باعدارلامادا مەجەلەنگەن مىندەتتەر مەن جۇكتەلگەن تاپسىرمالاردى جۇزەگە اسىرۋ ارقىلى اقتاۋ قالاسىندا قوردالانعان تۇرعىن ءۇي ماسەلەسىن ءبىراز سەرپىلتىپ تاستاۋدى ويلاعان جەرگىلىكتى باسشىلىق ىسكە مىقتاپ كىرىسكەندەي. قۇرىلىس جۇمىستارى قىزۋ ءجۇرىپ جاتقاندىعىنىڭ دالەلى سول, اقتاۋدىڭ كولەمى جىلدامىقپەن ۇلعايىپ كەلەدى. ءتىپتى, تۇتاستاي شاعىن اۋداندار قاتارعا قوسىلىپ جاتىر دەۋگە بولادى. جەردى تۇگەندەپ, يگىلىكتى ىسكە جۇمساۋ بارىسىندا مەملەكەتكە قايتارىلعان جەر تەلىمدەرى تۇرعىن ۇيلەر سالۋ ءۇشىن پايدالانىلۋدا. ماڭعىستاۋ وبلىسىندا 2013 جىلى 532 مىڭ شارشى مەتر تۇرعىن ءۇي پايدالانۋعا بەرىلسە, بيىلعى جىل دا ەكپىنمەن باستالدى.
وتكەن اپتادا وبلىس ورتالىعىنداعى جاڭا شاعىن اۋداننان «قولجەتىمدى تۇرعىن ءۇي-2020» باعدارلاماسى بويىنشا جاس وتباسىلارعا ارنالعان 100 پاتەرلى تۇرعىن ءۇيدىڭ كىلتتەرى ءوز يەلەرىنە تابىستالدى. ءۇي ماڭىنان بالالارعا ارنالعان شاعىن ورتالىق ءوز تۇساۋىن كەسەتىن بولادى.
وبلىس باسشىسى ا.ايدارباەۆ, اقتاۋ قالاسىنىڭ اكىمى ە.جاڭبىرشين باستاعان سالتاناتتى ساتتە الداعى ۋاقىتتا سالىناتىن ۇيلەر تۋرالى دا ايتىلدى. جۋىق ارادا بۇل ۇيلەرمەن كورشىلەس تاعى دا 40 پاتەرلى 5 تۇرعىن ءۇي پايدالانۋعا بەرىلەدى دەگەن جاڭالىق كوپشىلىكتى جادىراتتى. وسى ورايدا 40 پاتەرلى تۇرعىن ءۇيدىڭ ىرگەتاسى قالانىپ, ونىمەن قاتار تاعى دا 60 پاتەرلى تۇرعىن ءۇيدىڭ قۇرىلىسى جۇرمەك. سونداي-اق, 120 پاتەرلى 5 ءۇيدىڭ, 100 پاتەرلى 3 ءۇيدىڭ جوبالىق-سمەتالىق قۇجاتتارى جاساقتالۋ ۇستىندە ەكەن. جالپى, جاقىن بولاشاقتا 32ا دەپ اتالاتىن جاڭا شاعىن اۋداننىڭ وزىندە 3000-نان استام پاتەر سالۋ جوسپارلانعان.
باسپانامەن قامتۋعا بولىنگەن كوڭىل مەن باسپانا سالۋداعى قارقىن اقتاۋ قالاسىندا ءۇي ءۇشىن كەزەكتە تۇرعان 5 مىڭنان استام وتباسىنىڭ ارمانىن ورىنداۋدى الىسقا اپارماي, تاياۋ جىلدارى شەشىپ بەرۋى مۇمكىن دەگەن جاقسى بولجامدى العا تارتادى.
گۇلايىم شىنتەمىرقىزى, «ەگەمەن قازاقستان».ماڭعىستاۋ وبلىسى.
––––––––––––––––––––––
سۋرەتتەردى تۇسىرگەن سەرىك مايەمەروۆ.
