تۇساۋكەسەردە وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى اسقاربەك ەسجانوۆ ەلباسىنىڭ « ۇلى دالانىڭ جەتى قىرى» ماقالاسىنداعى «دالا فولكلورى مەن مۋزىكاسىنىڭ مىڭ جىلى» جوباسى اياسىندا وبلىس اكىمدىگىنىڭ قولداۋىمەن جۇزەگە اسقان باستاما جايلى تاراتا ايتىپ, ءتورت استانا تۋ تىككەن ءوڭىردىڭ وتكەنىنەن دەرەك جيناعان عالىمدار جۇمىسىنا ساتتىلىك تىلەدى.
فيلولوگيا عىلىمدارىنىڭ دوكتورى, پروفەسسور, قورقىت اتا اتىنداعى قىزىلوردا ۋنيۆەرسيتەتى «قورقىتتانۋ جانە ولكە تاريحى» عىلىمي-زەرتتەۋ ينستيتۋتىنىڭ ديرەكتورى باعدات كارىبوز ۇلى جەتەكشىلىك ەتكەن جوبانىڭ العاشقى كەزەڭى باتىرلار جىرىنا ارنالىپ, ۋنيۆەرسيتەت عالىمدارى مەن ستۋدەنتتەردەن جاساقتالعان ەكسپەديتسيا اۋدانداردان ەپوستىق جىرلار, داستاندار, جەر-سۋ اتتارىنا بايلانىستى مالىمەتتەر مەن كونە قولجازبالار جيناقتاعان. وسىنداي ەڭبەكتىڭ ارقاسىندا جارىققا شىققان «جانقوجا باتىر» جيناعىنا مۇساباي جىراۋ, لۇقپان كەنجە ۇلى, قارمان سۇلتان ۇلى, جەكەي شاڭعىتباي ۇلى نۇسقالارى توپتاستىرىلدى. ارۋاقتى ەر جايلى بۇل تاريحي جىرلاردىڭ دەنى بۇرىن-سوڭدى باسپا ءجۇزىن كورمەگەن. جيناققا باتىردىڭ بار ءومىرىن قامتيتىن جىرلاردان بولەك ەل اۋزىنان جازىپ الىنعان اڭىز-اڭگىمەلەر دە ەنگىزىلىپ وتىر.
كىتاپحانادا وتكەن جيىندا فولكلوردىڭ جازبا ادەبيەتپەن قاتار دامىپ كەلە جاتقانىنا توقتالعان جوبا جەتەكشىسى باعدات كارىبوز ۇلى ەكىنشى تومعا اڭىز-اڭگىمەلەر, ال ءۇشىنشى تومعا سىر سۇلەيلەرى جىرلاعان, سيرەك ورىندالاتىن قيسسا-داستاندار توپتاستىرىلاتىنىن ايتىپ ءوتتى.
