«ىشكى نارىقتى ديزەل وتىنىمەن قامتاماسىز ەتۋ ماقساتىندا بۇگىندە مۇناي ونىمدەرىن اۆتوموبيل كولىگىمەن اكەتۋگە تىيىم سالىندى, بيىل ءساۋىر ايىنان باستاپ ديزەلدى ەكسپورتتاۋ توقتاتىلدى جانە اتىراۋ مۇناي وڭدەۋ زاۋىتىنا جوندەۋ جۇمىستارى 2022 جىلعا اۋىستىرىلدى. سونداي-اق, اتىراۋ مۇناي وڭدەۋ زاۋىتى مەن پەتروقازاقستانويلپروداكتس (پكوپ) جشس-عا 100 مىڭ توننا مۇناي جانە 29 مىڭ توننا ديزەل وتىنى جەتكىزىلدى. ودان بولەك, پاۆلودار مۇناي-حيميا زاۋىتىنا جۇرگىزىلەتىن جوندەۋ جۇمىسى كەيىنگە شەگەرىلىپ, قازاننىڭ العاشقى 10 كۇنىندە اتالعان ونەركاسىپ 30 مىڭ توننا ديزەل وتىنىن ءوندىردى», دەدى اسەت ماعاۋوۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
مينيستر ورىنباسارىنىڭ مالىمەتىنشە, بيىل 1 قىركۇيەك پەن 1 قازان ارالىعىندا رەسەيدەن 65,7 مىڭ توننا ديزەل وتىنى جەتكىزىلدى. ال 1-10 قازان كۇندەرى كورشى ەلدەن تاعى 22,2 مىڭ توننا ديزەل اكەلىنگەن.
ونىڭ ايتۋىنشا, 11 قازانداعى جاعدايعا سايكەس ەل كولەمىندە 214,9 مىڭ توننا ديزەل بار.
