اپتا باسىندا ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ وسى سالاداعى بىرقاتار نىساندى ارالادى. ۆەدومستۆو باسشىسىنىڭ جۇمىس ساپارى KUNDE CAFE-سىنە بارۋدان باستالدى. بۇل مەنتالدى دامۋ ەرەكشەلىكتەرى بار قازاقستاندىقتارعا تاۋەلسىز ءومىر سۇرۋگە ۇيرەنۋگە جانە دوس تابۋعا كومەكتەسەتىن بىرەگەي جوبا. دامحاناعا جۇمىسقا تۇرۋ مۇگەدەكتىگى بار ادامدارعا ءومىر ءسۇرۋ ساپاسىن جاقسارتۋىنا, بازالىق داعدىلاردى ۇيرەنۋىنە جانە تابىس تابۋىنا كومەكتەسىپ قانا قويماي, دەنساۋلىقتارىنا دا وڭ اسەر ەتتى – قوعامدا الەۋمەتتەنۋ 30 ادامدى ەمدەۋگە جاتقىزۋ سانىنىڭ 5 ەسەگە قىسقارۋىنا سەپتىگىن تيگىزگەنىن ەرەكشە اتاپ وتۋگە بولادى.
مينيستر بارعان كەلەسى نىسان مۇگەدەكتىگى بار ادامدار جۇمىس ىستەيتىن «جىبەك» تىگىن تسەحى بولدى. سونىمەن قاتار س.شاپكەنوۆ پسيحيكالىق اۋىتقۋلارى بار بالالاردى (اسب, كپد, پسك, نجگب, الاليا, ديسلەكسيا جانە ت.ب.) تۇزەتۋ مەن دامىتۋعا, سونداي-اق مەكتەپكە بارار الدىنداعى جانە مەكتەپكە باراتىن جاستان كىشى بالالاردى دامىتۋعا باعىتتالعان ABAQUS-DARYN جەكە تۇزەتۋ-دامىتۋ ورتالىعىنىڭ جۇمىسىمەن تانىستى.
ABAQUS-DARYN-دا بالالارمەن پسيحولوگتار, دەفەكتولوگتەر, لوگوپەدتەر, ەدش ترەنەرى, تاربيەشىلەر, اۆا-تەراپەۆتەر, ەرگوتەراپەۆتەر, باستاۋىش سىنىپ مۇعالىمدەرى جۇمىس ىستەيدى. ساباقتار جەكە جانە توپتاردا وتكىزىلەدى, ءار بالانىڭ جەكە وقۋ باعدارلاماسى بار. ورتالىق جۇمىسىنىڭ نەگىزگى ءادىسى – اۆا-تەراپيا. بۇل – مىنەز-ق ۇلىق تەحنولوگيالارى مەن وقىتۋ ادىستەرىنە نەگىزدەلگەن قارقىندى وقىتۋ باعدارلاماسى. ونىڭ كومەگىمەن مىنەز-قۇلىقتى تۇزەتۋگە, ءوزىن ءوزى كۇتۋ داعدىلارىن ۇيرەتۋگە جانە سويلەۋ داعدىسىن دامىتۋعا بولادى. سونداي-اق ورتالىقتا اتا-انالارعا بالالارىمەن ءوز بەتىنشە جۇمىس ىستەۋ جانە ءۇي تاپسىرماسىن ورىنداۋ ءۇشىن اۆا-تەراپيا نەگىزدەرىن تەگىن ۇيرەتەدى. ABAQUS-DARYN ورتالىعىندا جۇمىس ىستەگەن ۋاقىت ىشىندە 500-دەن استام بالا دامۋ جانە وقىتۋ كۋرسىنان ءوتتى. بارلىعىنىڭ جاقسى ناتيجەلەرى بار.
جوعارىدا اتالعان بيزنەس-جوبالاردىڭ قۇرىلتايشىلارىمەن اڭگىمەلەسۋ بارىسىندا مينيستر ولاردىڭ جۇرگىزىپ جاتقان جۇمىستارىنىڭ جانە جالپى الەۋمەتتىك كاسىپكەرلىكتى دامىتۋدىڭ ماڭىزىن اتاپ ءوتتى.
«مۇگەدەكتىگى بار ادامداردى الەۋمەتتىك قولداۋ جانە ءومىر ءسۇرۋ ساپاسىن ارتتىرۋ – مەملەكەتتىك ساياساتتىڭ باستى باعىتتارىنىڭ ءبىرى. سونىمەن بىرگە ەڭبەك جانە حالىقتى الەۋمەتتىك قورعاۋ مينيسترلىگىنىڭ ءبىرىنشى كەزەكتەگى مىندەتتەرىنىڭ قاتارىنا جاتادى. 2020 جىلى الەۋمەتتىك تولەمدەرگە, تەحنيكالىق قۇرالدارمەن جانە وڭالتۋ قىزمەتتەرىمەن قامتاماسىز ەتۋگە مەملەكەتتىك بيۋدجەتتەن 455 ملرد تەڭگە ءبولىندى. بيىل وسى ماقساتتارعا 486 ملرد تەڭگە كوزدەلگەن. مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋ جونىندەگى ۇلتتىق جوسپاردى ىسكە اسىرۋ اياسىندا تىنىس-تىرشىلىكتىڭ بارلىق باعىتى بويىنشا شارالار كەشەنى قابىلدانۋدا. الۋشىلارعا ىڭعايلى بولۋ, وڭالتۋ قۇرالدارىمەن جانە قىزمەتتەرىمەن قامتاماسىز ەتۋدى جاقسارتۋ ءۇشىن 2020 جىلى الەۋمەتتىك قىزمەتتەر پورتالى (aleumet.egov.kz) ىسكە قوسىلدى. قاڭتار ايىنان باستاپ وڭالتۋدىڭ تەحنيكالىق قۇرالدارىنىڭ بارلىق 55 ءتۇرى پورتالعا كوشىرىلدى. وتكەن اپتادا پارلامەنت ازاماتتاردىڭ جەكەلەگەن ساناتتارىن, ونىڭ ىشىندە مۇگەدەكتىگى بار ادامداردى الەۋمەتتىك قورعاۋ دەڭگەيىن ارتتىرۋعا باعىتتالعان زاڭ قابىلدادى. مۇمكىندىكتەرى شەكتەۋلى ادامدار ءۇشىن مەديتسينالىق-الەۋمەتتىك ساراپتامانىڭ راسىمدەرى مەن مەرزىمدەرىن وڭتايلاندىرۋ ماقساتىندا مۇگەدەكتىكتى سىرتتاي بەلگىلەۋدى ەنگىزۋ بويىنشا جۇمىس جۇرگىزىپ جاتىرمىز. وسى ايدىڭ وزىندە جوبا قازاقستاننىڭ 6 وڭىرىندە پيلوتتى تۇردە ىسكە قوسىلادى. ونى ىسكە اسىرۋ كەلەشەكتە مۇگەدەكتىگى بار ادامداردىڭ ينستانتسيالارعا بارۋىن جانە كورسەتىلەتىن قىزمەتتى بەرۋشىمەن تىكەلەي بايلانىس جاساۋىن بولدىرماۋعا مۇمكىندىك بەرەدى. مۇگەدەكتىگى بار ادامداردىڭ ءومىر ءسۇرۋ ساپاسىن ارتتىرۋ پروتسەسىندە كەدەرگىسىز ورتا قۇرۋمەن قاتار ولاردىڭ قوعامعا الەۋمەتتەنۋى وتە ماڭىزدى ماسەلە بولىپ سانالادى. بۇل باعىتتا الەۋمەتتىك كاسىپكەرلىكتىڭ ماڭىزى زور. جۇمىستارىڭىز ءۇشىن العىسىمدى بىلدىرەمىن, بيزنەستەرىڭىزدىڭ ودان ءارى تابىستى بولۋىنا جانە دامۋىنا تىلەكتەسپىن. قازاقستاندا وسىنداي جوبالار جىل سايىن كوبەيە بەرسىن», دەدى س.شاپكەنوۆ.
