ال جەكە تۇلعالارعا بەرىلىپ, بىراق تولەنبەگەنىنە ءۇش ايدان اسىپ, قاۋىپتى نەسيەلەر قاتارىنا كىرگەن قارىز مولشەرى – لومباردتار پورتفەلىنىڭ 5 پايىزىن قۇرايدى. 2021 جىلدىڭ ەكىنشى توقسانى سوڭىنداعى جەكە تۇلعالارعا بەرىلگەن ميكرونەسيە كولەمى – 131 ملرد تەڭگە. بۇل رەتتە سالىستىرا كەتەيىك, بيىل ەكىنشى توقسان سوڭىندا جالپى ميكروقارجى ۇيىمدارىنىڭ جەكە تۇلعالارعا بەرگەن قارىزى 542,2 ملرد تەڭگەنى قۇراسا, ەكىنشى دەڭگەيلى بانكتەردىڭ تۇتىنۋشىلىق نەسيەلەرىنىڭ كولەمى 5,1 ترلن تەڭگەگە جەتىپ جىعىلعان.
لومباردتاردىڭ جەكە تۇلعالارعا بەرگەن ميكرونەسيەسىنىڭ 93,8 ملرد تەڭگەسى – تازا, ياعني تولەمى كەشىكپەگەن قارىزدار. ال 37,2 ملرد تەڭگە, ياعني بۇكىل زايمنىڭ 28,4 پايىزىنا نەگىزگى قارىز نەمەسە قوسىلعان سىياقى بويىنشا تولەمنىڭ كەشىگىپ جاتقانى بايقالادى. كەشىكتىرىلگەن ميكرونەسيەلەردىڭ كوپ بولىگى – 1-30 كۇن ارالىعىندا كەشىگىپ جاتقان تولەمدەر. ونىڭ كولەمى – 22,9 ملرد تەڭگە. ال تولەنبەگەنىنە 31-دەن 60 كۇنگە دەيىن ۇزاپ كەتكەن تولەمدەر – 5,1 ملرد تەڭگە بولسا, ءۇش اي بويى ۇمىتىلعان قارىز مولشەرى 2,6 ملرد تەڭگەنى ماڭايلايدى. ال 90 كۇننەن اسىپ تولەنبەگەن زايمدار مولشەرى – 6,5 ملرد تەڭگە. بۇل قارىز جەكە تۇلعالارعا بەرىلگەن ميكروزايمدار كولەمىنىڭ 5 پايىزىن قۇرايدى.
قارجى نارىعىن رەتتەۋ جانە دامىتۋ اگەنتتىگىنىڭ دەرەگىنشە, بيىل ەكىنشى توقسان سوڭىندا ەلدە 594 لومبارد جۇمىس ىستەگەن. ميكرونەسيە پورتفەلى كولەمى بويىنشا «م-لومبارد» (18,1 ملرد تەڭگە) كوش باستايدى, ەكىنشى ورىندا – «مك-لومبارد» (12,7 ملرد تەڭگە), ءۇشىنشى ورىندا – «استرا-لومبارد» (11,2 ملرد تەڭگە). سونداي-اق جەكە تۇلعالاردى نەسيەلەۋ بويىنشا «سەيف لومبارد» (11 ملرد تەڭگە), «مك-زولوتو لومبارد» جانە «سەنىمدى ىرگەتاس» (8,4 ملرد تەڭگەدەن) لومباردتارىنىڭ دا ۇلەسى جوعارى.
Ranking مالىمەتى بويىنشا, ءبىرىنشى جارتىجىلدىقتا ەلدەگى لومباردتار 19 ملرد تەڭگەدەن استام تازا جيىنتىق پايدا تاپقان. بۇل رەتتە 116 لومبارد شىعىنعا باتقان. جاقىندا ۇلتتىق بانك نەسيە سەرىكتەستىكتەرى جانە لومباردتار بويىنشا قارجى سەكتورىنىڭ كورسەتكىشتەرىن جاريالاۋدى باستادى. اقپارات ۇلتتىق بانك سايتىندا توقسانارالىق نەگىزدە جاريالانىپ وتىرماق.
قاڭتار-ماۋسىم ارالىعىندا لومباردتاردىڭ جيىنتىق تابىسى 68 ملرد تەڭگەدەن اسىپتى. ونىڭ 43,7 ملرد تەڭگەسى سىياقى الۋ ارقىلى پايدا بولعان تابىستان تۇسكەن. ال قاڭتار-ماۋسىم ارالىعىنداعى شىعىن 46,2 ملرد تەڭگەنى قۇرايدى. ونىڭ 16,2 ملرد تەڭگەسى – وپەراتسيالىق شىعىندار. سونىمەن قاتار لومباردتاردىڭ كورپوراتيۆتىك تابىس سالىعىنىڭ جيىنتىق كولەمى 2,8 ملرد تەڭگەگە شىققان. كورپوراتيۆتىك سالىق تولەنگەنگە دەيىنگى تازا تابىس ءبىرىنشى جارتىجىلدىقتا 21,8 ملرد تەڭگەگە جەتسە, سالىق تولەنگەن سوڭ ونىڭ كولەمى 19 ملرد تەڭگە بولعان.
