ەنەرگەتيكا ءمينيسترى ءوز سوزىندە «تەڭىز – اتىراۋ – نوۆوروسسيسك پورتى» باعىتى قازاقستاندىق مۇناي ەكسپورتى ءۇشىن ەڭ ءتيىمدى جانە قاۋىپسىز بولىپ تابىلاتىنىن اتاپ ءوتتى.
«قازاقستاننان ەكسپورتتىق مۇناي قۇبىرىن سالۋ ءۇشىن كوپتەگەن نۇسقالار قارالدى. مۇنايدى ەكسپورتقا تاسىمالداۋدىڭ 10-نان استام باعىتى ۇسىنىلدى, ونىڭ ىشىندە رەسەي ارقىلى قارا تەڭىزگە, يران ارقىلى پارسى شىعاناعىنا, باكۋ – دجەيحان ارقىلى جەرورتا تەڭىزىنە. سايىپ كەلگەندە, ساراپشىلار ەڭ ءتيىمدى جانە قاۋىپسىز باعىتتى انىقتادى: تەڭىز – اتىراۋ – نوۆوروسسيسك پورتى. وعان قوسا, بۇل ەڭ قىسقا ەكسپورتتىق باعىت بولدى», دەدى م.مىرزاعاليەۆ.
ەنەرگەتيكا ءمينيسترى سونداي-اق جوبانى قۇرۋ پروتسەسىندە قازاقستاننىڭ تۇڭعىش پرەزيدەنتىنىڭ ءوزى شەشۋشى ءرول اتقارعانىن ەرەكشە اتاپ ءوتتى.
«ەلباسى نۇرسۇلتان ءابىش ۇلى نازارباەۆ ءوزىنىڭ تاباندىلىعىمەن جانە بەدەلىمەن كاسپي قۇبىر كونسورتسيۋمىن قۇرۋعا قول جەتكىزىپ, وعان بارلىق مۇددەلى تاراپتاردى تارتا الدى. ... بۇگىندە جوبا تابىستى كوپجاقتى ىنتىماقتاستىقتىڭ جارقىن مىسالى بولىپ تابىلادى. قازاقستان مەن رەسەي اۋماعى ارقىلى ءوتىپ, كاسپي مەن قارا تەڭىزدىڭ ەكى تەڭىز جاعالاۋىن جالعاي وتىرىپ, ول ۇلىبريتانيا, يتاليا, اقش, رەسەي مەن قازاقستاننىڭ كوپتەگەن اكتسيونەرلەرىن بىرىكتىردى», دەپ اتاپ ءوتتى مينيستر.
2001 جىلى مۇناي قۇبىرى پايدالانۋعا بەرىلگەن ساتتەن باستاپ بۇگىنگى كۇنگە دەيىن قازاقستان 745 ملن.توننادان استام مۇناي ەكسپورتتادى. وسى باعىت بويىنشا ەكسپورتقا جەتكىزىلەتىن قازاقستان مۇنايىنىڭ ۇشتەن ەكىسىنەن استامى وتەدى. كقك قۇرىلىسى تەڭىز, قاراشىعاناق سياقتى ءىرى كەن ورىندارىندا مۇناي ءوندىرۋ كولەمىن ەداۋىر ۇلعايتۋعا, سونداي-اق قاشاعاندى يگەرۋدى باستاۋعا مۇمكىندىك بەردى.
«بۇگىنگى تاڭدا كقك-نى كەزەڭ-كەزەڭىمەن كەڭەيتۋ مۇناي قۇبىرىنىڭ وتكىزۋ قابىلەتىن جىلىنا 67 ملن.تونناعا دەيىن جەتكىزدى. بۇل رەتتە جىلىنا 80 ملن. تونناعا دەيىن مۇناي وتكىزۋ قابىلەتىن كەڭەيتۋ مىندەتى قويىلىپ وتىر», دەدى ەنەرگەتيكا ءمينيسترى.
