الەۋمەتتىك جەلىلەردە سوت ورىنداۋشىسى لاۋازىمدىق مىندەتتەرىن ورىنداۋ كەزىندە سوققىعا جىعىلعانى بەينەلەنگەن ۆيدەو تارادى.
جەكە سوت ورىنداۋشىلار پالاتاسىنىڭ مالىمەتىنشە, سوت ورىنداۋشىسى ا.ا.ەرمەكوۆكە شابۋىل الماتىنىڭ بوستاندىق اۋدانىنداعى نىساندى بۇزۋ كەزىندە جاسالعان.
3 قىركۇيەكتە ءۇي يەسىنە اتقارۋشىلىق ءىس جۇرگىزۋ قوزعالعانى تۋرالى حابارلاما جىبەرىلىپ, 4 قازان كۇنى سوت ورىنداۋشىسى ءادىل ەرمەكوۆ ەكى پوليتسيا قىزمەتكەرىمەن بىرگە ءوز جۇمىسىن ورىنداۋ ءۇشىن وقيعا ورنىنا كەلگەن. الايدا اينالاداعى ادامدار وعان قىسىم جاساي باستاعان. الدىمەن سوت ورىنداۋشىسىن تۇنشىقتىرۋعا تىرىسىپ, كەيىن قابىرعاسى مەن وكپە تۇسىنان ۇرعان.
«سوت ورىنداۋشىسى ۇرىپ-سوعۋ فاكتىسى بويىنشا قىلمىستىق ءىس قوزعاۋ تۋرالى ارىز جازدى, الايدا پوليتسيا قىزمەتكەرلەرى قىلمىسكەردى ۇستاۋعا تولىقتاي ارەكەت ەتپەي, ارىزدى قابىلداۋدان باس تارتتى», دەلىنگەن جەكە سوت ورىنداۋشىلارىنىڭ رەسپۋبليكالىق پالاتاسىنىڭ مالىمدەمەسىندە.
جەكە سوت ورىنداۋشىسىن ۇرعان ەر ادام مۇنىمەن توقتاماي بوكستان الەم چەمپيونى جانقوش تۇراروۆتى «كومەككە» شاقىرعان. وقيعا ورنىنا كەلگەن بوكسشى سوت ورىنداۋشىسىنان پوليتسياعا تۇسىرگەن ارىزىن الۋدى تالاپ ەتكەن. تالاپتاردى ورىنداماعان جاعدايدا كۇش قولداناتىنىن دا ايتقان.
ناتيجەسىندە سوت ورىنداۋشىسى ءوز جۇمىسىن ورىنداي المادى.
الماتى قالاسىنىڭ جەكە سوت ورىنداۋشىلار پالاتاسىنىڭ مالىمەتىنشە, ءادىل ەرمەكوۆ دارىگەرلەرگە جۇگىنگەن. قازىرگى ۋاقىتتا ول جۇمىستا ەمەس.
الماتى پوليتسياسى ءۇي يەسىن پوليتسيا باسقارماسىنا جەتكىزگەنىن حابارلادى.
«سوت ورىنداۋشىسى ءۇي يەسىنە ارىز جازدى, سونىڭ نەگىزىندە ءتيىستى ساراپتامالار تاعايىندالدى, ولاردىڭ ناتيجەلەرى بويىنشا پروتسەسسۋالدىق شەشىم قابىلدانادى», دەلىنگەن حابارلامادا.
