شەكارالىق «ترانزيت» ءىس-شاراسى جالعاسۋدا

«ترانزيت» بىرىككەن شەكارالىق ءىس-شاراسىنا قازاقستاندىق شەكاراشىلار بەلسەندىلىكپەن قاتىسۋدا. اتالعان ءىس-شارا وتكەن جىلدىڭ 30 قازانىندا قر ۇقك شەكارا قىزمەتىنىڭ وكىمى نەگىزىندە وڭتۇستىك باعىتتا باستالىپ, وعان ۇقك, ءىىم, ەكونوميكالىق جانە سىبايلاس جەمقورلىققا قارسى كۇرەس اگەنتتىگىنىڭ, كەدەندىك باقىلاۋ كوميتەتىنىڭ اۋماقتىق بولىمشەلەرى دە قاتىسۋدا. ءىس-شارانىڭ باس­تى ماقساتى – ءوز ۋاقىتىندا مەملەكەتتىك شەكارا, ونىڭ رەجىمىن, باقىلاۋ بەكەتتەرىندەگى رەجىمىن بۇزۋشىلىقتارىنىڭ جولىن كەسۋ. ءىس-شارا باستالعالى بەرى شەكارا ساقشىلارى 720-دان استام شەكارا زاڭدىلىعىن بۇزۋشىلاردى انىق­تادى. ولاردىڭ 155-ءى قازاقستان رەسپۋب­ليكاسىنىڭ ازاماتتارى بولسا, 40 شاقتىسى – رەسەي فەدەراتسياسىنىڭ, 90-نان استامى وزبەكستان, 370-تەن استامى قىرعىزستاننىڭ, 23-ءى تۇركيا, 10-ى تاجىكستان, 5-ەۋى ازەربايجان, 3-ەۋى قىتاي, 2 ادامنان اۆستراليا, گەر­مانيا, گرۋزيا, موڭعوليا, ۋكراينا, بەلا­رۋس ازاماتتارى, ءبىر-بىردەن اقش, ۇلىبريتانيا, يزرايل, مولدوۆا, پول­شا, اۋعانستان جانە ارمەنيادان كەلگەندەر بار. سونداي-اق, ءىس-شارا كەزىندە 2 كيلوگرامم 300 گرامم گەروين, 170 گرامم گاشيش, زاڭسىز وتكىزىلمەك بولعان 35 تون­ناداي حالىق تۇتىناتىن تاۋارلار, 16 تۇيىنشەك كيىم-كەشەك, 6 دانا اۆتوموبيل, 3 توننادان استام ديزەل جانارمايى, 10 توننادان استام قۇس ەتى, 38 باس ءمۇيىزدى ءىرى قارا, 8 باس ۇساق مال, 36 باس جىلقى جانە 12 تۇيە ۇستالدى. سونىمەن قاتار, ءدارى-دارمەكتەر, بالالار تاعامى, ىرىمشىك پەن ماي ونىمدەرىنىڭ دە زاڭسىز وتۋىنە جول بەرىلمەدى. جاسىرىن جولمەن وتكىزىلمەك بولعان 240 دانا رۇق­ساتسىز ديسكىلەر, دەكلاراتسيالانباعان 17 000 اقش دوللارىنىڭ, 1000 ەۋرونىڭ, قىرعىز سومدارى مەن تەڭگەنىڭ جولى كەسىلدى. «ترانزيت» بىرىككەن شەكارالىق ءىس-شاراسى ءالى دە جالعاسۋدا, دەپ حابارلادى قر ۇقك شق-نىڭ ءباسپاسوز قىزمەتى.