ارمانىمىزدىڭ اسقارى, باقىتىمىزدىڭ باستاۋى بولعان تاۋەلسىز ەلىمىزدىڭ تىرەگى – تاتۋلىق, بىرلىك, ءوزارا كەلىسىم. ءبىز – «بىرلىك بار جەردە تىرلىك بار» دەگەن تەكتى بابالاردىڭ ۇلاعاتىن ساناعا سىڭىرگەن ۇرپاقپىز. ەلباسىنىڭ ءداستۇرلى جولداۋىندا ايتىلعان نەگىزگى وي, ورتاق يدەيا وسىعان سايادى.
جولداۋ جانە بىرلىك
ماڭگىلىك ەل يدەياسىنىڭ استارىنا ۇڭىلسەك, ول ءبىزدىڭ ءداستۇرىمىز, ادەبيەتىمىز بەن مادەنيەتىمىزدىڭ قايتا تۇلەپ, جاڭعىرۋى, ءدىنىمىز بەن ءتىلىمىزدىڭ وركەندەۋى. پرەزيدەنتىمىز بارشا قازاقستاندىقتاردى وسىناۋ يگى ءىستى, ورتاق ماقساتتى جۇرت بولىپ جۇمىلىپ جۇزەگە اسىرۋعا ۇندەدى.
شىن مانىندە, ماڭگىلىك ەل يدەياسى – تەرەڭنەن تولعانىپ, ارىدەن ويلانىپ قابىلدانعان شەشىم. نۇرسۇلتان نازارباەۆتىڭ بيىلعى جولداۋى حالقىمىزعا قانات ءبىتىرىپ, جاستارىمىزدىڭ جىگەرىن وياتتى. ەلباسى ءبىزدىڭ باعدارىمىز – بىرلىك ەكەنىن وسى جولداۋدا تاعى دا شەگەلەپ ايتتى. يسلام ءدىنى ادامدار اراسىندا الاۋىزدىققا جول بەرمەيدى. ءبىزدىڭ ءاربىر جەتىستىگىمىز اللانىڭ قالاۋىمەن تاۋەلسىزدىگىمىزدىڭ ارقاسىندا جۇزەگە اسۋدا. بۇل – ءبىزدىڭ بىرلىگىمىزدىڭ جەمىسى.
جولداۋ جانە قايىرىمدىلىق
پايعامبارىمىز مۇحاممەد (س.ع.س.) ۇمبەتىنە وسى ءومىردى رۋحاني قۇندىلىقتاردى بايىتۋعا, ادامدار اراسىندا مەيىرىمدىلىكتى جايۋعا, كەشىرىم جولىن ۇستانىپ, عۇمىرىمىزدى ىزگىلىككە ارناۋدى وسيەت ەتكەن. ەلباسى ءبىر سوزىندە مۇگەدەكتەردى جۇمىسپەن قامتۋ ماسەلەسىن ايتىپ ءوتتى. وسى باعىتتا مەشىت يمامدارى قايىرىمدىلىق شارالارىن ۇيىمداستىرىپ كەلەدى. ءدىني باسقارما 2014 جىلى ءۇش باعىت بويىنشا جۇمىستارعا باسىمدىق بەرمەك. ءبىرىنشى – بىرلىگىمىزگە سىنا ءتۇسىرىپ, ب ۇلىك شىعارىپ جۇرگەن ءدىني اعىمداردىڭ ارەكەتىنە توسقاۋىل قويۋ. ەكىنشى – ۋاعىز-ناسيحات جۇمىسىن جانداندىرۋ. ءۇشىنشى – قايىرىمدىلىق ءىس-شارالاردى ۇيىمداستىرۋ. 2014 جىلى بارلىق مەشىتتەردە قايىرىمدىلىق اكتسيالارى ۇيىمداستىرىلادى.جولداۋ جانە سالاماتتى ءومىر
بارشاڭىزعا بەلگىلى, ەلباسى نۇرسۇلتان ءابىش ۇلى نازارباەۆ بيىلعى ءداستۇرلى جولداۋىن «ءبىر ماقسات, ءبىر مۇددە, ءبىر بولاشاق» دەپ اتادى. حالقىمىزدى بىرلىك پەن ىنتىماققا, ءوزارا تۇسىنىستىك پەن كەلىسىمگە, پاتريوتيزم مەن ءبىلىم الۋعا ۇندەگەن جولداۋدا بىرقاتار ماسەلەلەر كوتەرىلدى. جولداۋ – باعدارلامالىق قۇجات. سوندىقتان وندا ايتىلعان ءاربىر ءسوزدىڭ ءمانى مەن مازمۇنى تەرەڭ. ال جولداۋعا قولداۋ ءبىلدىرىپ, ونى ورىنداۋ – بارشاعا ورتاق يگى ءىس. پرەزيدەنتىمىز 90 مينۋت بايانداعان جولداۋدىڭ سالاماتتى ءومىر سالتىن قالىپتاستىرۋعا قاتىستى ايتىلعان باستامالارعا توقتالۋدى ءجون كورىپ وتىرمىن. ەلباسى بيىلعى جولداۋدا: «سالاماتتى ءومىر سالتىنىڭ ورنىعۋى, مەديتسينانىڭ دامۋى قازاقستاندىقتاردىڭ ءومىر ءسۇرۋ ۇزاقتىعىن 80 جاسقا دەيىن ارتتىرادى. قازاقستان مەديتسينالىق ءتۋريزمنىڭ جەتەكشى ەۋرازيالىق ورتالىقتارىنىڭ بىرىنە اينالادى. وزىق جانە باسەكەگە قابىلەتتى ۇلتتىق ءبىلىم بەرۋ جۇيەسىن قۇرۋ اياقتالادى», دەپ اتاپ ءوتتى. ءيا, ەلباسى جاستارعا ءاردايىم سپورتپەن شۇعىلدانۋدى ناسيحاتتاپ كەلەدى. ول ءۇشىن ەڭ الدىمەن ءوزى ۇلگى بولىپ, شاڭعى تەبۋ مەن تەننيس ويناۋدىڭ قىر-سىرىن سۇحباتتارىندا ءجيى ءسوز ەتەدى. 1 جەلتوقسان – تۇڭعىش پرەزيدەنت كۇنىندە وتاندىق تەلەارنالاردان ەلباسى جايلى كوركەم فيلم كورسەتىلدى. ەلباسى جايلى تۇسىرىلگەن فيلمدە پرەزيدەنتىمىزدىڭ سپورتتى وزىنە سەرىك ەتىپ, سالاماتتى ءومىر سالتىن قالىپتاستىرۋعا ەڭ الدىمەن ءوزى باستاماشىل بولعانى بارشاعا ايان. نۇرسۇلتان نازارباەۆتىڭ جۇمىس كەستەسى ونىڭ سپورتپەن شۇعىلدانۋىمەن باستالاتىنى كوركەم فيلمدە جاريا ەتىلدى. پرەزيدەنت ءبىر سۇحباتىندا: «سپورت ادامعا سەرگەكتىك سىيلايدى. سەرگەك ادام جۇمىستى ءوندىرىپ ىستەيدى», دەگەن بولاتىن. پايعامبارىمىز مۇحاممەد (س.ع.س.) ءوز ۇمبەتىنە, ياعني ءسىز بەن بىزگە سۋعا ءجۇزۋدى, اتپەن سەرۋەندەۋدى, كۇرەسۋدى, ساداق اتۋدى ناسيحاتتاعان. اللا ەلشىسى (س.ع.س.) ءبىر حاديسىندە: «ءالسىز مۇسىلماننان كۇشتى مۇسىلمان قايىرلى. بىراق ەكەۋىندە دە قايىر بار», دەگەن. حاديستەن ءتۇسىنگەنىمىزدەي, كۇشتى مۇسىلمان ارقاشان سەرگەكتىك قاسيەتىمەن قوعامعا وڭ اسەرى مەن جاقسى ىستەرگە ۇلەسىن كوبىرەك قوسا الادى.جولداۋ جانە وتباسى قۇندىلىعى
پرەزيدەنتىمىز بيىلعى جولداۋىندا وتباسى قۇندىلىقتارىن, ادامدار اراسىنداعى مەيىرىم مەن سۇيىسپەنشىلىكتى ەرەكشە اتاپ ءوتتى. «وتان – وتباسىنان باستالادى», دەگەن ۇلاعاتتى ۇعىم بار. وتباسىندا تىنىشتىق پەن تاتۋلىق ساقتالسا, وندا وتانىمىز كوركەيىپ, ىزگى نيەتىمىزگە جەتەمىز. وتباسى – وتاعاسىنا امانات. پايعامبارىمىزدىڭ (س.ع.س.) حاديسىندە ءاربىر ادام ءوز ورتاسىنا, وتباسىنا جاۋاپتى ەكەنىن ايتقان. ال قاسيەتتى كىتابىمىز – قۇراندا: «سەندەرگە, وعان تۇراقتاۋلارىڭ ءۇشىن ءوز جىنىستارىڭنان جۇبايلار جاراتىپ, ارالارىڭا سۇيىسپەنشىلىك, مەيىرىمدىلىك پايدا قىلعاندىعى دا ونىڭ بەلگىلەرىنەن. ءسوز جوق, وسىلاردا ويلانعان ەلگە بەلگىلەر بار» (رۇم سۇرەسى, 21-ايات), دەپ باياندالعان. يسلام ءدىنى وتباسىندا, قوعامدا, مەملەكەتتە بىرلىك پەن ىنتىماق ورناتۋعا ۇندەيدى.جولداۋ جانە سپورت
ەلباسى جولداۋىنا ءمان بەرەتىن تاعى ءبىر جايت: ول – سپورتپەن شۇعىلدانۋ, دۇرىس تاماقتانۋ. پرەزيدەنت بىلاي دەدى: «دەنساۋلىق ساقتاۋ سالاسىنداعى باستى باسىمدىق – العاشقى مەديتسينالىق-سانيتارلىق كومەكتى دامىتۋ. مىندەتتى مەديتسينالىق ساقتاندىرۋ ەنگىزۋ ماسەلەسىن زەرتتەگەن ءجون. مەملەكەتتىڭ, جۇمىس بەرۋشىلەردىڭ جانە قىزمەتكەردىڭ دەنساۋلىق ءۇشىن ورتاق جاۋاپكەرشىلىگى – مەديتسينالىق قىزمەتتىڭ بارلىق جۇيەسىنىڭ باستى قاعيداتى. سپورتپەن شۇعىلدانۋ, دۇرىس تاماقتانا ءبىلۋ, جۇيەلى پروفيلاكتيكالىق تەكسەرىلۋ – اۋرۋدىڭ الدىن الۋدىڭ نەگىزى». جۋىردا ءدىني باسقارما مەن الماتى قالاسى ورتالىق مەشىتى وكىل يمامدار اراسىندا فۋتبولدان جولداستىق كەزدەسۋ وتكىزدى. مۇنداعى ماقسات – ءدىندارلار اراسىندا سپورتتى ناسيحاتتاۋ, سالاماتتى ءومىر سالتىن قالىپتاستىرۋ. وسىنداي ءىس-شارالار الداعى ۋاقىتتا دا ءجيى ۇيىمداستىرىلا بەرەدى دەگەن سەنىمدەمىز. بارشا ادام بالاسى جالعىز جاراتۋشىنىڭ بار ەكەنىن مويىندايدى جانە ودان اسقان قۇدىرەت يەسى جوقتىعىنا كۇمان كەلتىرمەيدى. بارىمىزگە جەر, دۇنيە, اسپان, عالامشار ورتاق. ەندەشە, قىسقا ومىردە ارازداسىپ ەمەس, ارداقتاسىپ, دۇشپانداسىپ ەمەس, دوستاسىپ, بەرەكە مەن بىرلىكتە عۇمىر كەشكەنىمىز ابزال. ويتكەنى, يماندىلىق سالتانات قۇرعان قوعامدا ازعىندىق پەن ارسىزدىقتىڭ قايسى تۇرىنە دە ورىن قالماسى انىق. جاراتۋشى يەمىز بارشامىزدى جاقسىلىقتا, ساۋاپتى ىستەردە, ەل يگىلىگى جولىنداعى جۇمىستاردا, بەرەكەلى باسقوسۋلاردا جولىقتىرعاي! ءامين! ەرجان قاجى مالعاجى ۇلى, قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي.
