نيۋ-يوركتە بۇۇ جانىنداعى قازاقستان رەسپۋبليكاسى مەن سالۆادور رەسپۋبليكاسىنىڭ تۇراقتى وكىلدەرى قايرات ءابدىراحمانوۆ پەن كارلوس ەنريكە گارسيا گونزالەس قازاقستان رەسپۋبليكاسى مەن سالۆادور رەسپۋبليكاسى اراسىندا ديپلوماتيالىق قاتىناستار ورناتۋ جونىندەگى بىرلەسكەن كومميۋنيكەگە قول قويدى.
سالۆادور – تىنىق مۇحيتتىڭ جاعالاۋىندا ورنالاسقان, ورتالىق امەريكاداعى اۋماعى بويىنشا شاعىن, حالقىنىڭ سانى كوپ مەملەكەت. ونىڭ ەكونوميكاسىنىڭ نەگىزىن كوفەنىڭ, قانت قۇراعىنىڭ, تاماق جانە تەڭىز ونىمدەرىنىڭ ەكسپورتى قۇرايدى. سالۆادور بۇۇ-نىڭ دۇنيەجۇزىلىك ساۋدا ۇيىمىنىڭ, سونداي-اق, باسقا دا حالىقارالىق جانە وڭىرلىك ۇيىمداردىڭ مۇشەسى بولىپ تابىلادى.
قازاقستاننىڭ سىرتقى ىستەر مينيسترلىگى ەلدىڭ سىرتقى ساياساتىن ءارتاراپتاندىرۋ بويىنشا جۇمىسىن جالعاستىرۋدا. جاڭا باسىمدىقتاردىڭ ءبىرى لاتىن امەريكاسى مەن كاريب باسسەينى ءوڭىرى بولىپ وتىر. حالقىنىڭ سانى 600 ملن.-عا جۋىق جانە ءىجو-ءسى 4,5 ترلن. دوللاردى قۇرايتىن ءوڭىر حالىقارالىق ساياسات جانە ەكونوميكالىق قارىم-قاتىناس جۇيەسىندە ماڭىزدى ءرول اتقارادى.
2013 جىلى قازاقستان سىرتقى ىستەر ءمينيسترى ەرلان ىدىرىسوۆتىڭ چيليگە, ارگەنتينا مەن برازيلياعا العاشقى ساپارى بولىپ, ونىڭ بارىسىندا وسى ەلدەردىڭ قازاقستانمەن ءارىپتەستىگىنە, سونداي-اق, بۇۇ شەڭبەرىندەگى, جاھاندىق پروبلەماتيكا ماسەلەلەرى بويىنشا ساۋدا-ەكونوميكالىق جانە گۋمانيتارلىق ىنتىماقتاستىقتى دامىتۋعا مۇددەلىلىگى انىقتالعان ەدى.
باستالعان ۇنقوسۋلاردىڭ العاشقى ناتيجەلەرى جامان ەمەس. وڭتۇستىك امەريكانىڭ بىرقاتار ەلدەرىمەن ۆيزالىق رەجىمنىڭ جەڭىلدەتىلۋىنە جانە جويىلۋىنا قول جەتكىزىلدى.
وتكەن جىلى قازاقستان مەن لاتىن امەريكاسى جانە كاريب باسسەينىنە جاتاتىن ءۇش ءىرى ەكونوميكامەن تاۋار اينالىمى جارتى ميلليارد اقش دوللارىن قۇرادى.
بۇگىندە قازاقستان لاتىن امەريكاسى مەن كاريب باسسەينىنىڭ 9 ەلىمەن ديپلوماتيالىق قارىم-قاتىناس ورناتسا, وڭىردەگى 33 ەلدىڭ 31-ىمەن ديپلوماتيالىق بايلانىسى بار.
«ەگەمەن-اقپارات».
