كەشە ۇلتتىق عارىش اگەنتتىگىندە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆتىڭ قاتىسۋىمەن كەڭەيتىلگەن القا وتىرىسى ءوتتى. باسقوسۋدا اتالعان ۆەدومستۆونىڭ وتكەن جىلعى قىزمەتىنىڭ قورىتىندىلارى مەن بيىلعى مىندەتتەرى تۋرالى نەگىزگى باياندامانى اگەنتتىك توراعاسى تالعات مۇساباەۆ جاسادى.
«مەملەكەت باسشىسى ءوزىنىڭ بيىلعى قازاقستان حالقىنا جولداۋىندا وتاندىق عارىشتىق سالانى قۇرۋدىڭ ماڭىزدىلىعىنا ەرەكشە كوڭىل ءبولدى. پرەزيدەنتتىڭ «قازاقستان-2050» ستراتەگيياسىندا عارىش سالاسىن دامىتۋ جونىندە بەرىلگەن تاپسىرمالارىن ورىنداي وتىرىپ, ەسەپ بەرۋ كەزەڭىندە قازعارىش ستراتەگيالىق جوسپارىنىڭ «عارىش ينفراقۇرىلىمىن قۇرۋ جانە دامىتۋ» جانە «عارىش قىزمەتىنىڭ عىلىمي جانە عىلىمي-تەحنولوگيالىق بازاسىن دامىتۋ» سىندى ەكى نەگىزگى باعىتى بويىنشا بىرقاتار عارىشتىق جوبالار مەن باعدارلامالاردى جۇزەگە اسىرۋ جۇمىستارىن جالعاستىردى», دەدى ۇلتتىق عارىش اگەنتتىگىنىڭ توراعاسى تالعات مۇساباەۆ.
«KazSat» بايلانىس جانە حابار تاراتۋ عارىشتىق جۇيەسىن قۇرۋ اياسىندا ءۇش جوبا جۇزەگە اسىرىلۋدا. قازىرگى تاڭدا «KazSat-2» قالىپتى جۇمىس ىستەپ تۇرسا, ونىڭ جۇكتەمەسى 63 پايىزدان اسقان. سپۋتنيكتىڭ رەسۋرسىن قازاقستاننىڭ 11 بايلانىس وپەراتورى پايدالانىپ, 2 ملرد. تەڭگەدەن استام سومادا قىزمەت كورسەتىلگەن. «KazSat-3» سپۋتنيگىن قۇرۋ مەن ۇشىرۋ جوباسى بويىنشا جۇمىستار «اكادەميك م.ف.رەشتەنيوۆ اتىنداعى اقپاراتتىق سپۋتنيكتىك جۇيەلەر» رەسەيلىك جەتەكشى عارىش كومپانياسىمەن جاسالعان كەلىسىمشارت اياسىندا جۇرگىزىلۋدە.
2013 جىلى «KazSat-3» سپۋتنيگىن جالپى قۇراستىرۋ مەن سىناۋ جۇمىستارى اياقتالعان. «KazSat-3» عارىش اپپاراتىن «بايقوڭىر» عارىش ايلاعىنان 2014 جىلدىڭ 30 ساۋىرىنە دەيىن ۇشىرۋ جوسپارلانىپ وتىر. «KazSat» سپۋتنيكتەرىن باسقارۋ بويىنشا رەزەرۆتى جەرۇستى كەشەنىن قۇرۋ جۇمىستارى اياقتالىپ, ول وتكەن جىلعى ماۋسىم ايىندا ىسكە قوسىلعان.
دالدىگى جوعارى سپۋتنيكتىك ناۆيگاتسيا جۇيەسى جوباسى شەڭبەرىندە وتكەن جىلى تەڭىز لوكالدى ديففەرەنتسيالدى ستانساسى قۇراستىرىلىپ, تۇراقتى پايدالانۋعا بەرىلگەن. ديففەرەنتسيالدى تۇزەتۋ جانە مونيتورينگ ورتالىعى ىسكە قوسىلىپ, ول ءتاجىريبەلىك پايدالانۋدان وتكىزىلگەن. ديففەرەنتسيالدى ستانسالاردا 50 وتاندىق تاجىريبە جاسالىپ, ولار قازاقستان اۋماعى بويىنشا ورنالاستىرىلعان.
تاعى ءبىر اسا ماڭىزدى جوبا «بايتەرەك» عارىشتىق زىمىران كەشەنىن قۇراستىرۋى بولسا, قازاقستان مەن رەسەي ۇكىمەتتەرىنىڭ دەڭگەيىندە «بايتەرەك» كەشەنىن «زەنيت» زىمىرانتاسىعىشى نەگىزىندە قۇرۋ جوباسىن جۇزەگە اسىرۋ بويىنشا بىرلەسكەن ءىس-شارالار جوسپارى ماقۇلدانعان. سونىمەن قاتار, 2014-2016 جىلدارعا ارنالعان «بايقوڭىر» كەشەنىن بىرلەسىپ پايدالانۋ بويىنشا «جول كارتاسىنا» قول قويىلعان.
قازاقستان عالىمدارى عارىشتىق زەرتتەۋلەرگە الەمدىك دەڭگەيدە ۇلەس قوساتىن بىرقاتار ءىرى عىلىمي ناتيجەلەرگە قول جەتكىزگەن. العاش رەت عارىشتىق تەحنيكا مەن تەحنولوگيالاردىڭ وتاندىق ۇلگىلەرى قۇراستىرىلعان.
بايانداماسى سوڭىندا اگەنتتىك توراعاسى ت.مۇساباەۆ ەلباسىنىڭ العا قويعان ستراتەگيالىق ماقساتتارىنىڭ ماڭىزىن اتاپ ءوتتى. وعان قول جەتكىزۋ ءۇشىن ەڭبەك ونىمدىلىگى مەن جۇمىس ساپاسىن ەداۋىر ارتتىرۋ قاجەت ەكەنىن دە نازاردان تىس قالدىرمادى. «2014 جىل ءبىز ءۇشىن وتە ماڭىزدى ءارى كۇردەلى بولماق. ماسەلەن, تاۋەلسىز قازاقستان تاريحىندا العاش رەت ءبىر جىلدا 3 عارىشتىق اپپارات, ياعني ءبىر بايلانىس جاساندى سەرىگى مەن جەردى قاشىقتىقتان زوندتاۋدىڭ ەكى اپپاراتى ۇشىرىلاتىن بولادى», دەدى ول.
القا وتىرىسىن قورىتىندىلاعان پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ قازاقستاننىڭ الەمدەگى ەڭ وزىق 30 ەل قاتارىنا كىرۋ ماقساتى اياسىندا ۆەدومستۆونىڭ جۇمىسى وتە ماڭىزدى ەكەنىن اتاپ ءوتتى. سونداي-اق, ەلدىڭ عارىش قىزمەتىن دامىتۋ جونىندە مەملەكەت باسشىسى العا قويعان مىندەتتەردى جۇزەگە اسىرۋ بويىنشا قازعارىشقا ناقتى تاپسىرمالار بەردى.
ءابدىراحمان قىدىربەك,
«ەگەمەن قازاقستان».
سوڭعى جاڭالىقتار
قوعام • كەشە
مويىنقۇم اۋدانىندا ءورت ءسوندىرۋ ءبولىمى اشىلدى
ايماقتار • كەشە
ەينشتەين ءوزىن «الاياق» سەزىنگەن بە؟
قوعام • كەشە
