سوعان الدانعان قازىرگى ادامدار اراسىندا «بۇل نە دەگەن قاپتاپ كەتكەن باتىرلار, ايتەۋىر اركىم ءوز اتاسىن باتىر قىلىپ شىعارۋدا» دەگەن سياقتى سوزدەر بار.
شىن مانىندە بارلىق رۋدان باتىر شىعىپ, ءوز وڭىرلەرىندە جاساقتالعان شاعىن قولدارىن باستاعان. ولاردىڭ ءبارى بىردەي بوگەنباي, قابانباي سياقتى التى الاشقا اتى شىققان باتىر بولماسا دا «اتتان» دەگەن حان جارلىعى كەلگەندە ءوز قوسىنىن باستاپ, ۇلكەن قولعا كەلىپ قوسىلعان. ءسويتىپ ەل قورعاۋدا تىزە قوسىپ, ورتاق جاۋدى تالقانداۋعا ۇلەس قوسقان.
باتىر بولۋ كەڭ دالاداعى ەڭ ماڭىزدى ماقسات بولعانى دا بەلگىلى. قازاق بالاسىن ەڭ الدىمەن باتىر بولماققا تاربيەلەگەن.
بۇگىنگى سولتۇستىك قازاقستان وبلىسىنىڭ اۋماعىنان دا ونداعان باتىر شىققان. سونىڭ ىشىندە قوجابەرگەن جىراۋ, بالتا تۇرسىنباي, قۇلەكە مەن قۇلسارى, بايان مەن سارى سياقتى باتىرلاردىڭ ەسىمى التى الاشقا ايان. ال جانسۇگىر, سۇيىندىك, جاناتاي, مىقتىباي, قانتاي, مەدەباي جانە ت.ب. باسقا باتىرلاردىڭ ەسىمىن كوبىنەسە تاريحشى عالىمدار مەن جەرگىلىكتى ولكەتانۋشىلار ءبىلىپ, قازىر ولاردىڭ جاساعان ەرلىك ىستەرىن جاڭعىرتىپ, جاس ۇرپاققا تانىتۋدا.
جۋىردا «ابىلاي حان رەزيدەنتسياسى» مۋزەي كەشەنىندە قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان «قازاق حالقىنىڭ باتىرلارى» تاقىرىبىندا جەرگىلىكتى باتىرلاردىڭ ەسىمىن جاڭعىرتۋعا ارنالعان عىلىمي-
پراكتيكالىق كونفەرەنتسيا بولىپ ءوتتى. كونفەرەنتسيانى اشقان مۋزەي كەشەنىنىڭ ديرەكتورى ايان ساداەۆ «رۋحاني جاڭعىرۋ» باعدارلاماسىنىڭ شەڭبەرىندە ەلدىك پەن وتانشىلدىق جولىندا ايقاسىپ وتكەن باتىرلاردىڭ ەسىمدەرىن جاڭعىرتۋ قولعا الىنىپ جاتقانىن اتاپ ءوتتى. سونىڭ ىشىندە ءبىزدىڭ وبلىستىڭ اۋماعىندا ءومىر سۇرگەن باتىرلاردىڭ ەسىمدەرى دە جاڭعىرىپ جاتقانى ايتىلدى. كونفەرەنتسيادا الدىمەن, قالىڭ قازاقتىڭ باسىن قوسىپ, ەلدىڭ ىرگەسىن بۇتىندەگەن ابىلاي حاننىڭ ءوزىنىڭ باتىرلىعى تۋرالى ايتىلدى. تاريحي ساحناعا الدىمەن ەرەن ەرلىگى ارقىلى شىعىپ, بۇرىن قارسىلاستارىن شاق كەلتىرمەگەن جوڭعاردىڭ باس باتىرى شارىشتى جيىرماعا تولماعان جاسىندا جەڭىپ, قالىڭ قولعا رۋح بەرىپ جەڭىسكە جەتكەن ءساتى ەسكە الىندى. سول بەتىمەن حالىققا تانىلىپ, اعاسى ابىلمامبەت حاننىڭ تورگە شاقىرىپ, سۇلتان اتاعىن بەرۋىمەن ارعىننىڭ اتىعاي-قاراۋىل رۋلارىنا كىشى حان بولىپ تاعايىنداعانى ايتىلدى.
سونداي-اق تاريح عىلىمدارىنىڭ كانديداتتارى, زەرتتەۋشىلەر ساۋلە مالىكوۆا, اناتولي پلەشاكوۆ, اسكەري ينستيتۋتتىڭ پروفەسسورى جانباتىر سارتاەۆ, پەداگوگيكا سالاسىنىڭ ارداگەرلەرى جانگەلدى ءتاجين, قاراقات شالاباەۆ, ابىلاي بالعاباەۆ جانە وسى جولداردىڭ اۆتورى جوعارىدا اتالعان باتىرلاردىڭ ەسىمدەرىنىڭ قالاي تانىلعانى جانە زەرتتەلگەنى تۋرالى باياندادى. بۇرىن قالىڭ كوپشىلىككە بەيمالىم بولىپ كەلگەن دەرەكتەر العا تارتىلدى. مىسالى, قۇلەكە باتىر تۋرالى رەسەي مەن قىتايدان تابىلعان 32 قۇجاتتا ونىڭ ەسىمى ايتىلاتىنى جەتكىزىلدى.
قازىر بۇرىن بەلگىسىز بولىپ كەلگەن كوپتەگەن باتىردىڭ ەسىمدەرى ۇلىقتالىپ جاتىر. سونىڭ ىشىندە قۇلەكە باتىردىڭ تۋعان جەرىندەگى اۋدان ورتالىعىندا ونىڭ اتىنداعى سپورت سارايى اشىلعانى, جانسۇگىر مەن سۇيىندىك باتىرلاردىڭ باسىنا كەسەنە ورناتىلعان.
پەتروپاۆل
