جاپونيا سىرتقى ىستەر مينيسترلىگىنىڭ بۇرىنعى باسشىسى فۋميو كيسيدا سارسەنبىدە وتكەن ەكىنشى تۋرداعى داۋىس بەرۋ قورىتىندىسى بويىنشا ەلدەگى بيلەۋشى ليبەرالدى-دەموكراتيالىق پارتيانىڭ (لدپ) جاڭا توراعاسى بولىپ سايلاندى.
كيسيدا ەكىنشى تۋردا 427 داۋىستىڭ 257-ءىن جينادى, بۇل داۋىس جەڭىسكە جەتۋگە جەتكىلىكتى بولدى. ونىڭ قارسىلاسى – جاپونيانىڭ بۇرىنعى سىرتقى ىستەر جانە قورعانىس ءمينيسترى تارو كونو 170 داۋىس جينادى. وسىلايشا, كيسيدا لدپ-نىڭ جاڭا توراعاسى لاۋازىمىنا يە بولدى جانە كوپ ۇزاماي ول جاپونيانىڭ جاڭا, 100-ءشى پرەمەر-ءمينيسترى بولادى.
كونو مەن كيسيدادان باسقا, سايلاۋعا بۇرىندارى مينيستر لاۋازىمىندا بولعان ساناە تاكايتي مەن سەيكو نودا دا قاتىستى, بىراق ولار ءبىرىنشى تۋردا جەتكىلىكتى داۋىس جيناي الماي دودادان شىعىپ قالدى. جاڭا ۇكىمەت باسشىسىنىڭ كانديداتۋراسىن بەكىتەتىن پارلامەنت سەسسياسى 4 قازاندا وتەدى دەپ كۇتىلۋدە.
لدپ توراعاسىن سايلاۋ پرەمەر-مينيستر ەسيحيدە سۋگا وكىلەتتىگىنىڭ اياقتالۋىنا بايلانىستى ءوتىپ جاتىر. ول بۇل لاۋازىمدى وتكەن جىلى سيندزو ابەنىڭ كەنەتتەن وتستاۆكاعا كەتۋىنە بايلانىستى قابىلداعان. قازىرگى ۇكىمەت باسشىسى سۋگا سايلاۋ الدىنداعى جارىسقا قاتىسۋدان باس تارتتى. ول بۇل شەشىمدى قىزمەتىنىڭ قالعان بولىگىن كوروناۆيرۋسپەن كۇرەسۋگە ارناۋ نيەتىمەن ءتۇسىندىردى.
پارتيانىڭ زاڭ شىعارۋشىلارىنىڭ جينالىسىندا سويلەگەن سوزىندە كيسيدا ارىپتەستەرىن قاراشا ايىندا وتەتىن جالپى سايلاۋعا جانە كەلەسى جىلى جوعارعى كەڭەسشىلەر پالاتاسىنا سايلاۋ قارساڭىندا بىرلىككە شاقىردى.
ء«بىز حالىققا قايتا جاڭعىرعان پارتيانى كورسەتىپ, ونىڭ قولداۋىنا يە بولۋعا ءتيىسپىز. سايلاۋ اياقتالدى. بىزدە ەندى تاراپتار جوق, كانديداتتار اراسىندا باسەكە جوق», دەدى جەڭىسكە جەتكەن كيسيدا سايلاۋ قورىتىندىسى بويىنشا. ول سونىمەن قاتار كۇزدە پارلامەنتتىك سايلاۋ بولاتىنىن جانە ءتيىستى ناتيجەگە جەتۋ ءۇشىن لدپ-نىڭ بارلىق مۇشەسى بىرىگۋى كەرەك ەكەنىن ەسكە سالدى.
پارتيانىڭ جاڭا توراعاسى ءوزى دەرەۋ قىزمەتىنە كىرىسۋگە دايىن ەكەنىن ايتتى. باسىم مىندەتتەردىڭ ءبىرى رەتىندە ول كوروناۆيرۋستىڭ سالدارىمەن كۇرەسۋدىڭ ەكونوميكالىق تۇسىن, الەۋمەتتىك ماسەلەلەردى شەشۋدى اتادى.
ليبەرالدى فراكتسيانى باسقاراتىن كيسيدا بۇل جولى كوپتەگەن ارداگەر زاڭ شىعارۋشىلاردىڭ قولداۋىنا يە بولىپ, پارتيا پرەزيدەنتتىگىنە تۇسكەن ەكىنشى دوداسى ءساتتى اياقتالدى. ول وتكەن جىلى سۋگادان جەڭىلىپ قالعان ەدى.
كيسيدا 2007-2008 جىلدارى وكيناۆا جانە «سولتۇستىك اۋماقتار» (جاپونيادا وڭتۇستىك كۋريل ارالدارىن وسىلاي اتايدى) ىستەرى جونىندەگى مينيستر بولدى. 2012 جىلدىڭ جەلتوقسانىنان 2017 جىلدىڭ تامىزىنا دەيىن سيندزو ابە كابينەتىندە ءسىم باسشىسى بولدى. سودان كەيىن ول LDP پارتياسىنىڭ ساياسي كەڭەسىن باسقاردى. سودان بەرى كيسيدا ءوزىن پارتيا توراعاسى لاۋازىمىنا كانديدات رەتىندە بەلسەندى تۇردە ۇسىنىپ كەلدى. الايدا وتكەن جىلى ابە وتستاۆكاعا كەتكەننەن كەيىن پارتيانىڭ باسشىلىعى ەسيحيدە سۋگاعا وتكەن بولاتىن. كيسيدانىڭ پارتيادا 46 پارلامەنتتىك دەپۋتاتتان تۇراتىن جەكە فراكتسياسى دا بار.
ول جاڭا مينيسترلەر كابينەتىن قۇرىپ, قازان ايىنىڭ باسىندا لدپ باسشىلىعىندا وزگەرىستەر جاسايدى دەپ كۇتىلۋدە.
جاپونيادا سايلاۋمەن قاتار, ىندەتكە بايلانىستى قابىلدانعان قاتاڭ شارالار دا جەڭىلدەي باستادى. بۇل پروتسەسس بۇگىننەن باستالادى. جاپون بيلىگى 2021 جىلدىڭ ساۋىرىنەن باستاپ لوكداۋندا بولعان ۇلتتىق ەكونوميكانى قالپىنا كەلتىرۋ ءۇشىن وسىنداي قادامعا بارماقشى. شەشىم شەنەۋنىكتەردىڭ ساراپشىلارمەن كەڭەسۋىنەن كەيىن قابىلداندى.
ۇكىمەت شەكتەۋ شارالارىنىڭ ورنىنا كوروناۆيرۋسپەن كۇرەسۋدىڭ باسقا تاسىلدەرىن قولدانادى. ۆاكتسينا پاسپورتتارىن جانە ىندەتتى انىقتاۋ ءۇشىن مىندەتتى تەست ەنگىزۋ قاراستىرىلۋدا. شەكتەۋلەر بارلىق 27 پرەفەكتۋرادا جەڭىلدەيدى. ىندەتتىڭ جاڭا تولقىنىنىڭ العاشقى بەلگىلەرى پايدا بولعان جاعدايدا جاپونياداعى توتەنشە جاعداي دەرەۋ قالپىنا كەلتىرىلەتىنى ايتىلدى.
