پەتروپاۆلعا قازاقستانداعى رەسەي فەدەراتسياسى ەلشىلىگىنىڭ جانە قر اۋعان جانە جەرگىلىكتى سوعىس ارداگەرلەرى وداعىنىڭ وكىلدەرى كەلىپ, قارتتاردى قولداۋ ايلىعى اياسىندا ارداگەرلەردى قۇتتىقتادى. سونداي-اق 60-تان استام ادامعا 100 مىڭ تەڭگەنىڭ سەرتيفيكاتىن سىيلادى.
ماراپاتقا يە بولعانداردىڭ ءبىرى – پەتروپاۆلدىق الەكساندر كۋركين. ول 1979 جىلى اسكەر قاتارىنا الىنىپ, اۋعانستانعا سوعىسقا جىبەرىلەدى. ارداگەردىڭ ايتۋىنشا, كابۋلدا 345 پولك قۇرامىندا سوعىسىپ, جارتى جىلدان كەيىن جاراقات الۋىنا بايلانىستى ەلگە قايتارىلعان. كەيىن دەنساۋلىعى سىر بەرگەنشە دەيىن كولىك جۇرگىزۋشىسى بولعان.
جالپى بۇل كۇنى الەكساندر سياقتى اۋعان سوعىسىنىڭ 30 ارداگەرى, ەكىنشى دۇنيەجۇزىلىك سوعىسىنىڭ كوزى ءتىرى 23 ارداگەرى جانە تاجىك-اۋعان شەكاراسىنداعى سوعىسقا قاتىسقان 10 ادام سىياقى الدى.
«نۇر-سۇلتان قالاسىنان ارنايى كەلىپ وڭىردەن سوعىسقا اتتانعان, جاۋىنگەرلىك ارەكەتتەرگە قاتىسقان ارداگەرلەردى قۇتتىقتاپ جاتىر. اۋعان سوعىسىنىڭ 30 ارداگەرىن تىزىمنەن تاڭداپ الدىق, ولار كومەككە مۇقتاج جاندار. سونداي-اق ۇلى وتان سوعىسىنىڭ ارداگەرلەرى دە ۇمىت قالعان جوق», دەيدى وبلىستىق ارداگەرلەر كەڭەسىنىڭ توراعاسى ەسكەندىر ەلەۋسىزوۆ.
وڭىردەگى ەكىنشى دۇنيەجۇزىلىك سوعىس ارداگەرلەرىنىڭ ونعا جۋىعى – عاسىر قۇرداستارى. اراسىندا وزدىگىنەن جۇرە المايتىندارى دا بار. ولارعا سىياقىنى دەلەگاتسيا مۇشەلەرى ۇيلەرىنە اپارىپ بەردى.
