بۇگىن XXII قىسقى وليمپيا ويىندارى سالتاناتتى جاعدايدا اشىلادى
قازاقستان قارىمى
بىردەن ايتىپ قويايىق, الداعى الامان كۇندەرىنىڭ ناقتىلى قالاي وتەتىنىن تاپ باسىپ, بولجاي قويماسپىز, بىراق وعان دەگەن دايىندىقتىڭ وتە جوعارى دەڭگەيدە ەكەنىنە ءدال قازىر-اق قينالماي ءباس تىگە الامىز. بۇعان ءبىز بۇرناعى كۇنى ءسوچيدىڭ حالىقارالىق اۋەجايىنا تۇسكەن ساتتەن كوز جەتكىزدىك. «ءبىز» دەپ وتىرعان قازاقستان رەسمي سپورت دەلەگاتسياسىنىڭ قۇرامىنا ىلىنگەن بۇقارالىق اقپارات قۇرالدارىنىڭ وكىلدەرى – «KAZSport» تەلەارناسىنىڭ ديرەكتورى دياس احمەتشارىپ, بەلگىلى ءفوتوتىلشى نيكيتا باسوۆ, تانىمال جۋرناليست ارداق توعىموۆ, «كازاحستانسكايا پراۆدا» گازەتىنىڭ سپورت شولۋشىسى اسقار بەيسەنباەۆ جانە وسى جولداردىڭ اۆتورى – اقپاننىڭ 5-ءى كۇنى تاڭنىڭ تالما تۇسىندا استانادان ماسكەۋگە ۇشىپ شىعىپ, كرەملدى قالا ارقىلى ءتۇس اۋا كراسنودار ولكەسىنە كەلىپ جەتكەن بولاتىن.
جالپى, بۇل وليمپياداعا ەرەكشە ءمان بەرىپ, ەكپىن ەلەتكەن قازاقستان تاراپى وعان 104 ادامنان تۇراتىن مەملەكەتتىك دەلەگاتسيا اتتاندىردى. ونىڭ ساپىنا جوعارىداعى بەس جۋرناليستەن بولەك, سپورتتىڭ 58 ءتۇرى بويىنشا جارىس جولدارىنا شىعىپ, ەلىمىزدىڭ نامىسىن قورعايتىن 52 سپورتشى بار. بۇعان قوسا, كەشە سپورت جانە دەنە-شىنىقتىرۋ اگەنتتىگى ۇيىمداستىرعان ارنايى دەلەگاتسياسىنىڭ شەڭبەرىندە ەلۋ شاقتى تەلە جانە گازەت جۋرناليستەرى تاعى كەلدى. وسى توپقا «ەگەمەن قازاقستاننىڭ» ەكى بىردەي ءتىلشىسى – داستان كەنجالين مەن وڭداسىن ەلۋباي ەندى. بۇدان بولەك, بۇگىنگى كەرۋەن كەرەتىن وليمپيادانىڭ اشىلۋ سالتاناتىنا قازاقستان پرەزيدەنتى نۇرسۇلتان نازارباەۆ قاتىسادى دەپ كۇتىلۋدە. وليمپيالىق ويىندار بارىسىنان «KAZSport» تەلەارناسى 168 مارتە, «حابار» اگەنتتىگى 53 رەت رەپورتاجدار مەن حابارلار بەرەدى. سول ماقساتتا دەلەگاتسيالاردىڭ ەكىنشى تولقىنىمەن مۇندا الدىڭعى ارنانىڭ 7 بىردەي ءجۋرناليسى كەلىپ, جۇمىسقا كىرىستى. وسىنىڭ ءوزى-اق قازاق ەلىنىڭ بۇل اق وليمپياداعا قانشالىقتى دارەجەدە كوڭىل ءبولىپ, نازار اۋدارىپ وتىرعانىن بايقاتسا كەرەك.
قۋاندىرعان قالاشىق
ءبىز كەلگەندە الداعى اق وليمپيادانىڭ استاناسى – ابات سوچي ەرتە كوكتەمنىڭ ەرنەۋىنە جەتىپ قالعانداي كۇي كەشىپ جاتىر ەكەن. اينالادا ءتونىپ تۇرعان تاۋلاردىڭ اعاراڭداعان باستارى بولماسا, تابانداعى توپىراقتىڭ تانابىندا ءىلىپ الارلىق شوكىم قار جوق. مۇنىڭ ورنىنا جەردەن بۋلىعا كوتەرىلىپ, كوزدىڭ جاۋىن الاتىنداي قالىپقا جەتكەن كوك مايسا شالعىن جەتكىلىكتى كورىندى. مۇنىسى بىزگە ناۋرىز ايىنىڭ باسىندا كوك بۇيرالانىپ قالاتىن الماتىنى كوز الدىمىزعا ەلەستەتتى. كەلگەن بەتتە سوچي سونىمەن بىرگە, اقجارىلقاپ تويى بولعالى جاتقان ءۇيدىڭ اۋلاسىندا ورىن الاتىن ابىر-سابىر قالىپتى دا تانىتتى. مۇنى قالانىڭ اۋە قاقپاسىنا قادام باسقان مەزەتتەن سەزىنە باستادىق. اۋەلى وسى جەردە ۇشىراسقان ويىنداردىڭ ۇيىمداستىرۋ كوميتەتىنىڭ مۇشەلەرى اككرەديتاتسيا قاعازىمىزدى تىركەپ, مويىنعا ىلەتىن ۆيزيتتىك كارتامىزدى جاساپ بەردى. سودان شىعا بەرگەندە, ءبىر توپ ەرىكتىلەر اينالامىزدى دۋمانعا ءبولەپ, اندەتىپ ءارى تاقپاقتاتىپ قارسى الدى. ءبىر بايقالعانى, قالانىڭ قاي مەكەن, قاي مۇيىسىنە كوز سالساڭ دا, الدىڭنان ۆولونتەرلەر قاپتاپ شىعا كەلەدى. سولاردىڭ كومەگىمەن وزىمىزگە بەلگىلەنگەن مەكەنجايعا باراتىن اۆتوبۋسقا دا وتىردىق. سويتسەك, ويىن كۇندەرىندە مۇندا وليمپيادانىڭ ارنايى قوناقتارى مەن جۋرناليستەرگە ارنالعان «تم» دەگەن بەلگىسى بار 28 مارشرۋت شىعارىلىپ قويىلىپتى. ولار ءار 10 مينۋت سايىن ءجۇرىپ جاتىر. ىشىندە جولاۋشى بولسىن-بولماسىن, اۆتوبۋس جۇمىس كەستەسىنە قاراي ءجۇرىپ كەتەدى. بىراق وندا وتىرۋعا قۇقى بار جولاۋشىلاردان كىرە پۇل سۇرالمايدى, ياعني ولاردى تەگىن جەتكىزىپ تۇرۋعا شىعارىلىپ قويىلعان. ءبىز سولاردىڭ بىرىمەن ۋاقىتشا قونىسىمىزعا جەتىپ العاننان كەيىن دە ۆولونتەرلەردىڭ جاردەمىنە سۇيەندىك. بۇل جەردەگى تۇرعىلىقتى تۇراعىمىز, نەگىزگى توپتىڭ قۇرامىندا بولعاندىقتان, ەندى عانا سالىنىپ بىتكەن وليمپيالىق قالاشىقتان سايلانعان ەكەن. ال وليمپيالىق قالاشىقتى ءبىز ءبىر كورگەننەن جاڭا قونىس تويىن تويلاپ جاتقان ابىر-سابىر تۇرعىن ۇيلەردىڭ پاتەرلەرىنە ۇقساتتىق. ازىرگە اتاۋى «رۋسسكي دوم» دەپ اتالاتىن بۇل مەكەن كەيىن قىسقى وليمپيالىق ويىنداردىڭ سوڭىن الا پاراليمپيالىق جارىستار بولىپ بىتكەسىن, ناۋرىزدىڭ 24-ىنەن ارى جاپپاي پاتەر رەتىندە ساتىلاتىن كورىنەدى. جالپى, وليمپيالىق قالاشىقتارداعى تۇرعىنجايلاردىڭ ءبارى سوڭىنان ءتۇرلى الەۋمەتتىك نىساندارعا اينالاتىنعا ۇقسايدى. ماسەلەن, جوعارعى جانە تاۋ ەتەگىندەگى قالاشىقتاردا مەيمانحانا ەسەبىندە سالىنعان عيماراتتار شىنىندا بەس جۇلدىزدى وتەلدەر بولىپ شىعا كەلمەك.
وليمپيالىق قالاشىقتار جايىنا كەلسەك, وسىندا كەلگەسىن عانا ءبىلىپ جاتىرمىز, ولاردىڭ سانى جالپى ۇشەۋ ەكەن. ءبىز سونىڭ ەڭىستەگى اۋماعىنا جايعاسساق, قالعان ەكەۋدىڭ ءبىرى تاۋدىڭ بوكتەرىنە, ال ەكىنشىسى ودان دا ارعى بيىك جوتالاردىڭ جوندارىنا قانات جايىپتى. وسى ۇشەۋى قوسىلا كەلىپ, ءبىرتۇتاس «وليمپيالىق قالاشىق» ءانسامبلىن قۇرايدى. بۇلاردىڭ ءبىرىنشىسى «جاعالاۋ كلاستەرى» دەپ اتالسا, قالعان ەكەۋىنە «تاۋ كلاستەرى» دەگەن اتاۋ بەرىلگەن. ال تۇتاس قالاشىق قاڭتاردىڭ 30-ى كۇنى رەسمي تۇردە اشىلىپ, ونىڭ مەرى قىزمەتىنە بەلگىلى جەڭىل اتلەت, سىرىقپەن سەكىرۋدەن وليمپيالىق ويىنداردىڭ ەكى دۇركىن چەمپيونى ەلەنا يسينباەۆا تاعايىندالعان.
جالپى, سوچي قالاسىنىڭ ءوزى وسى وليمپيالىق قالاشىق ءانسامبلى سەكىلدى كوپتەگەن قونىستاردان قۇرالعان ۇلكەن ءبىر وركەسترگە ۇقسايدى. ءبىزدىڭ بۇرىن گەوگرافيالىق كارتادان كورىپ جۇرگەن ادلەر, حوستا, ماتسەستا, داگومىس دەگەن ەلدى مەكەندەردىڭ ءبارى قازىرگى سوچي قالاسىنىڭ قۇرامداس ءبىر بولىگى رەتىندە ونىڭ اۋماقتىق-اكىمشىلىك بولىنىسىنە كىرەدى ەكەن. قالا سوندىقتان ادلەر, حوستا, ورتالىق جانە لازارەۆ دەگەن ءتورت اۋدانعا بولىنگەن. بۇلاردىڭ ورتالىق اۋدانى ەسەپتى نەگىزگى قالا «ۇلكەن سوچي» دەپ اتالاتىن بولىپ شىقتى. ءبىزدىڭ مەكەنىمىز سونىڭ ىشىندەگى حالىقارالىق اۋەجاي ورنالاسقان ادلەر بولىگىندە تۇر. تاۋدىڭ اڭعارلارى مەن تەڭىزدىڭ جاعالاۋىن قۋالاپ, بىرىنە-ءبىرى ىركەس-تىركەس جالعاسىپ كەتە بەرەتىن بۇل قالانىڭ ۇزىندىعى 148 شاقىرىمعا سوزىلادى. بۇل جاعىنان كەلگەندە, ول ۇزىنا بويعى قاشىقتىعى 200 شاقىرىمنان اساتىن مەكسيكانىڭ استاناسى – مەحيكودان كەيىن الەمدە ەكىنشى ورىن الاتىن قالا سانالادى. سوچي مەملەكەتتىك ستاتيستيكا ءبولىمىنىڭ مالىمەتى بويىنشا, وسىنشالىقتى اۋماقتى الاتىن ونىڭ تۇتاس اۋدانىندا قازىرگى تاڭدا 406,8 مىڭ ادام تۇرادى. قالا ەكونوميكاسى مەن ونداعى حالىقتى جۇمىسپەن قامتۋدا جەتەكشى ءرولدى تۋريزم مەن دەمالىس سالالارى قۇرايدى. سوندىقتان دا, سوچي رەسمي ەمەس تۇردە رەسەيدىڭ جازعى, وڭتۇستىك جانە كۋرورتتى «استاناسى» بولىپ ەسەپتەلەدى. تاعى ءبىر دەرەك, 43-ءشى سولتۇستىك ەندىككە ورنالاسقان قالا الەمدەگى نيتستسا, تورونتو, الماتى جانە ۆلاديۆوستوك قالالارىمەن ءبىر گەوگرافيالىق بەلدەۋدە جاتىر.
ءبارى دە جۋرناليستەر ءۇشىن
مۇنداي قىزۋ تىرشىلىكتى ءبىز كەلگەن كۇنى دە, كەشە دە باس ءباسپاسوز ورتالىعىنان دا بايقادىق. ورتالىق ءبىز ورنالاسقان «وليمپيالىق قالاشىقتان» تاياق تاستام جەردە, ءۇش ايالدامادان كەيىن جەتىپ باراسىڭ. ال وعان بولىنگەن عيماراتتىڭ ءوزى اتشاپتىرىم اۋماقتى الىپ جاتىر. ونىڭ ىشىندە جۋرناليستەردىڭ جۇمىس جاساۋى ءۇشىن بولىنگەن بىرنەشە زال بار. بۇدان بولەك, فوتوتىلشىلەر ءۇشىن دە ارنايى بولمەلەر جابدىقتالعان ەكەن. مۇندا تىلشىلەر قاۋىمى ءۇشىن اشىلعان بايلانىس پەن بانك ءمىنسىز قىزمەت جاساپ جاتىر. وسىنى پايدالانىپ, ءبىز دە بايلانىسقا دۇرىس ءارى باعاسى ارزان بولۋى ءۇشىن ۇيالى تەلەفوندارىمىزعا رەسەيلىك نومىرلەر ورناتىپ الدىق. بۇل ءبىر جاعى وسىنداي نومىرلەرى بار ارىپتەستەردىڭ ءبىر-بىرىمەن تەگىن سويلەسۋلەرىن دە قامتاماسىز ەتەدى ەكەن. ال وسىندا قىم-قۋىت تىرلىكپەن جۇمىس جاساپ جاتقاندار ءۇشىن تاۋلىك بويىنا كىدىرىسسىز بىرنەشە اسحانا مەن كافە تاعى جۇمىس ىستەپ تۇر. بىلايشا ايتقاندا, بۇقارالىق اقپارات قۇرالدارى وكىلدەرى ءۇشىن. ءبىز مۇندا قىتاي, جاپونيا, فرانتسيا, گەرمانيا, ۇلىبريتانيا, شۆەتسيا سياقتى ەلدەردەن كەلگەن كوپتەگەن ارىپتەستەرىمىزدى جولىقتىردىق. ولاردىڭ الدى وليمپيادا استاناسىنا ۇلتتىق دەلەگاتسيالار العاش ات ءىزىن سالا باستاعان 24 قاڭتاردا-اق كەلىپ قويىپتى.ءۇش كۇندىك كەڭەس
ءسوچيدىڭ XXII قىسقى وليمپيالىق ويىندارعا دايىندىعىنىڭ وتە جوعارى ەكەنىن حالىقارالىق وليمپيالىق كوميتەتتىڭ پرەزيدەنتى توماس باح مۇندا 4 اقپان كۇنى كەلىپ, نىسانداردى تۇگەل ارالاپ شىققاننان كەيىن جەدەعابىل جەتكىزگەن. ول ءسوچيدىڭ «وليمپيادانىڭ تاريحىنداعى ەڭ ۇزدىك دايىندالعان قالا» ەكەنىن اتاپ ءوتىپتى. سونىمەن بىرگە, پرەزيدەنتتى, اسىرەسە, سپورتشىلاردىڭ 80 پايىزىنىڭ «توسەكتەن تۇرا سالىپ, جارىس وتەتىن جەرگە جاياۋ بارا الاتىنى» قاتتى قۋاندىرىپتى. «ءبارىنىڭ وتە جوعارى دەڭگەيدە وتەتىنىنە ەش كۇمان جوق», دەپتى ول جۋرناليستەرمەن كەزدەسكەنىندە. ءوزىنىڭ سوزىندە توماس باح, سونداي-اق, رەسەيدەگى XXII قىسقى وليمپيادادان بۇدان كەيىنگى وليمپيالىق قوزعالىستىڭ جاڭا ۆەكتورىن كۇتەتىنىن اشىپ ايتتى. اقپاننىڭ 5-ءى كۇنى سوچيدە حالىقارالىق وليمپيالىق كوميتەتتىڭ 126-سەسسياسى باستالدى. ءۇش كۇن بويى ءماجىلىسىن جالعاستىراتىن كەلەلى كەڭەس بۇگىن اياقتالادى. وسى جيىندى اشاردا رەسەي پرەزيدەنتى ۆلاديمير پۋتين ءوز ءسوزىنىڭ كىرىسپەسىن تازا اعىلشىن تىلىندە سويلەپ اشىپ, تالايدىڭ تاڭدانىسىن تۋعىزدى. ال توماس باح بۇكىل وليمپيادا كۇندەرىندە ءوزىنىڭ سپورتشىلار تۇسكەن وليمپيالىق قالاشىقتا تۇرماقشى نيەتتە ەكەنىن ءبىلدىرىپ, جۇرتتى ودان بەتەر تاڭعالدىردى. ءوتكەن جىلعى قىركۇيەك ايىندا عانا حوك پرەزيدەنتى قىزمەتىنە كىرىسكەن وليمپيالىق قوزعالىستىڭ جاڭا باسشىسى مۇنى: «مەنىڭ ءوزىم دە سپورتشىمىن عوي» دەگەن ءبىر اۋىز سوزبەن ءتۇسىندىردى.
14 سپورت نىسانى سالىنعان
وليمپيادا قۇشاعىنداعى سوچي قازىردىڭ وزىندە بىرنەشە رەكوردتى جاڭارتىپ ۇلگەردى. بۇلاردىڭ ءبارىن كەلەسى ماقالادا سانامالاپ بەرگىمىز كەلىپ وتىر. ال قازىر بۇلاردىڭ ساناتىنداعى كورنەكتىلەرىنىڭ ءبىرى رەتىندە وسى الامان جارىسقا ارنالىپ بۇل وڭىردە 14 بىردەي سپورت نىسانىنىڭ سالىنعانىن ايتىپ وتەيىك. ولار جاعالاۋ جانە تاۋ كلاستەرى اتالاتىن ەكى بولىكتەن تۇرادى. بۇلاردىڭ ءبىر-بىرىنەن ارا قاشىقتىعى 48 شاقىرىمعا تەڭ. ال وسى ەكى ورتاعا تارتىلىپ قويىلعان تەمىرجولمەن جۇرەتىن پويىز ءبىر كلاستەردەن ەكىنشى كلاستەرگە جارتى ساعاتقا جۋىق ۋاقىتتا جەتىپ بارادى. «جاعالاۋ» دەپ اتالاتىن كلاستەر قارا تەڭىز جيەگىندەگى يمەرەتيا جازىعىن جارىپ اعاتىن مزىمتا جانە پسوۋ وزەندەرىنىڭ ارالىعىنداعى وليمپيالىق ساياباقتا جاعالاي بوي كوتەرىپتى. بۇل كەڭىستىكتەگى نىساندار تۇگەلدەي جابىق ارەنادا وتەتىن جارىستار ءۇشىن سالىنعان ەكەن. بۇلاردىڭ دا ىشىندەگى ەڭ باستىسى بولىپ «فيشت» ورتالىق ستاديونى سانالادى. اتاۋىن ۇلكەن ءسوچيدىڭ ادىگەياعا جاقىن شىعىس قاپتالىنداعى تاۋدىڭ اتىنان الاتىن بۇل سپورت كەشەنى شىنىندا دا ادەمى دە الەۋەتتى كورىندى. ءار قىرىنان كوز سالعاندا ءار قيلى بولىپ شاپاق شاشاتىن وسى توتىدايىن تارانعان سۇلۋ عيماراتتا بۇگىن وليمپيالىق ويىنداردىڭ اشىلۋ سالتاناتى دا جاپىراعىن جايقالتادى. ءوزىنىڭ اتىن كاباردى, چەركەس جانە ادىگە دەگەن تارماقتان قۇرالاتىن ادىگ حالقىنىڭ «اق باس», «باسىن اق شالعان», «اق سامايلى» دەيتىن ۇعىمدى بەرەتىن «فيشت» سوزىنەن العان تاۋدىڭ تاريحى تىم تەرەڭدە جاتقانعا ۇقسايدى. وسىندا ەستىگەن اڭىزدارىمىزعا قاراعاندا, بۇل تاۋعا ەجەلگى گرەكتىڭ پرومەتەي اتتى الىبى وليمپ شىڭىنداعى قۇدايلاردان ادامدار ءۇشىن الاۋ ۇرلاپ, الىپ شىققانى ءۇشىن شىنجىرلانىپ بايلانىپ قويىلعان ەكەن. ال ۇشار باسىن اپپاق قارلى بورىك كومكەرىپ تۇراتىن ۇلتتىق ستاديون ءبىر جاعىنان قاراعاندا, ۇزىننان ۇزاق تۇرعان سول پرومەتەيگە دە ۇقساپ كەتەدى. سىرتقى كەلبەتى جارتىلاي ءمولدىر كەسكىندى بۇل كەشەننىڭ تاعى ءبىر ەرەكشەلىگى, ونىڭ جينامالى-قۇراستىرمالى قاڭقاسى رەتىنە قاراي ارەنا تريبۋناسىن 25 مىڭدىقتان 45 مىڭدىق ادامدىق مولشەرگە دەيىن وزگەرتىپ تۇرۋعا ءمۇمكىندىك بەرەدى. بىزگە مۇنداعى مامانداردىڭ ايتۋلارىنشا, ححII وليمپيادا مەن پاراليمپيالىق ويىندار بىتكەننەن كەيىن بۇل عيمارات فۋتبول ماتچتارىن وتكىزىپ تۇراتىن ستاديونعا اينالىپ شىعا كەلەدى. ول 2018 جىلى رەسەيدە وتەتىن الەم چەمپيوناتىن قابىلدايتىن كەشەندەردىڭ ءبىرى بولادى. كەلەسى كەلىستى ارەنانىڭ اتى «ۇلكەن» («بولشوي») مۇز ايدىنى» دەپ اتالادى. شامامەن 12 مىڭعا دەيىن كورەرمەندى قامتي الاتىن عيماراتتا نەگىزىنەن حوككەي شايقاستارى وتەدى. شايبالى حوككەيدىڭ جانكۇيەرلەرى وسى كۇندەرى, سونداي-اق, «ءۇلكەننىڭ» شاعىن ارەناسى بولىپ تابىلاتىن «شايبا» سپورت سارايىندا دا اتالمىش سپورت ءتۇرى بويىنشا سايىستار كورە الادى. وسى ءۇش سۋ جاڭا نىساننىڭ قاتارىنا «مۇز تەكشەسى» («لەديانوي كۋب») دەگەن اتاۋى بار 3 مىڭ ورىندىق تاعى ءبىر مۇز ايدىنى قوسىلادى. بۇل جەردە كيورلينگ ويىنىنىڭ باسەكەلەرى وتۋىمەن بىرگە, رەسەيدىڭ حوككەي قۇراماسى جاتتىعادى. بۇلاردان باسقا, 12 مىڭ ورىندىق ارەنا «ايسبەرگ» ارەناسى تاعى بار. وندا مانەرلەپ سىرعاناۋشىلار مەن شورت-ترەك سايىستارى دودانىڭ دۋمانىن قىزدىرادى. سوچيدەگى سۋ جاڭا مۇز ايدىندارىنىڭ سانى مۇنىمەن دە ءبىتپەيدى. كەلەسى كەشەنى – «ادلەر-ارەنا» جابىق كونكي ورتالىعى 8 مىڭ كورەرمەندى قابىلداي الادى. جاعالاۋ كلاستەرىنە وسى 8 ارەنا كىرسە, تاۋ كلاستەرىن 6 كەشەن قۇرايدى. اشىق اسپان استىندا وتەتىن سايىستار ءۇشىن سالىنعان بۇل سپورت الاڭدارى ءسوچيدىڭ كراسنايا پوليانا اۋماعىنا قونىس تەپكەن. ال كراسنايا پوليانا قازىر ءبىز تۇرىپ جاتقان ادلەر اۋدانىنا باعىنىستاعى ەلدى مەكەن بولىپ تابىلادى. ولار قارا تەڭىز جاعالاۋىنان 45 شاقىرىم قاشىقتىقتا, مزىمتا وزەنىنىڭ اڭعارىندا, تەڭىز دەڭگەيىنەن 550-600 مەتر بيىكتەگى جازىقتاردا بوي كوتەرگەن. بۇلاردىڭ ءبىرىنشىسىن مانا اتاپ وتكەن تاۋداعى وليمپيالىق قالاشىق قۇرايدى. وسى الاپتا بۇدان ءارى «لاۋرا» اتتى شاڭعى-بياتلون كەشەنى ساپ تۇزەگەن. ونىڭ قۇرامىندا بياتلون مەن شاڭعى جارىسىنا ارنالعان ەكى ستاديون بار. ەكەۋى ءبىر مەزگىلدە 9,6 كورەرمەنگە پانا بولادى. ال سوچي وليمپياداسى ەڭ ءىرى نىساندارىنىڭ تىزبەگىندە «روزا حۋتور» شاڭعى كەشەنى الدىڭعى لەكتەردە اتالادى. مۇنىڭ اۋقىمىنا تاۋ شاڭعىسى ورتالىعى, سنوۋبورد پەن فريستايل ورتالىعىن قۇرايتىن ەكستريم-پارك جانە تاۋداعى ەكىنشى وليمپيالىق قالاشىق بىرىكتىرىلگەن. «سانكي» اتتى شانا-بوبسلەي تراسساسى مەن «رۋسسكيە گوركي» اتتى ترامپلين كەشەنى وسى نىسانداردىڭ جەلىسىن تياناقتايدى. كەشە, 6 اقپان كۇنى كەشكە بىزگە وسىلاردىڭ اراسىنداعى ءبىرىنشى بولىپ «روزا حۋتورعا» قاراي جول تارتۋدىڭ رەتى كەلدى. بۇل كۇنى مۇندا ءفريستايلدىڭ موگۋل دەپ اتالاتىن جاتتىعۋى بويىنشا جارىس باستالدى. وندا ءبىزدىڭ يۋليا گالىشەۆا جانە داريا رىبالوۆا اتتى سپورتشىلارىمىز كۇش سىناستى. بۇلار ازىرگە ىرىكتەۋ سىناقتارى بولعاندىقتان, ءبىز ولاردىڭ ناتيجەلەرىنە توقتالىپ وتىرعان جوقپىز. مۇنداعى جۇلدەگەرلەر 8 اقپان كۇنى انىقتالادى. ال فريستايلدىڭ اكروباتيكا دەپ اتالاتىن كەلەسى ءبىر ءتۇرى بويىنشا ءسال كەيىنىرەك جىبەك اراپباەۆا جانە جانبوتا الدابەرگەنوۆا ەسىمدى قىزدارىمىز جارىس جولىنا شىققالى تۇر. وسىلايشا وليمپيادانىڭ قىزىعى كۇن سايىن ارتا تۇسپەكشى. بۇگىنگى كۇن, مىسالى, ويىنداردىڭ اشىلۋ سالتاناتىنا ارنالسا, ەرتەڭ دودا ءدۇبىرىن جوعارىدا ايتىلعان موگۋل-فريستايشىلاردان باسقا اتلەتتەرىمىز جالعاپ اكەتەدى. بۇل كۇنى قازاقستاندىقتاردىڭ قاتىسۋىمەن «لاۋرا» كەشەنىندە بياتلون, «رۋسسكيە گوركي» الاڭىندا ترامپليننەن سەكىرۋ سايىستارى وتەدى. سونىڭ ىشىندە بياتلونشىلار يان ساۆيتسكي, سەرگەي ناۋميك, انتون پانتوۆ جانە الەكساندر تريفونوۆ 10 شاقىرىمدىق سپرينتتەن فينالدىق ايقاسقا شىعادى. ال ترامپليننەن سەكىرۋشى الەكسەي پچەلينتسەۆ ىرىكتەۋ سىناعىن باستان كەشەدى. سەرىك ءپىرنازار, «ەگەمەن قازاقستان» – سوچيدەن.
