جىل سايىنعى جىر

كەيدە ەرىكسىز باس شايقاتار جايلار بار. وتكەن كۇز بەرەكەسىنە ءوندىرىستى ءوڭىر جۇرتشىلىعىنىڭ قۋانىشىندا شەك بولماعانداي ەدى. سوڭعى شيرەك عاسىردا ۇشىراسىپ كورمەگەن كول-كوسىر استىق  جينالۋى ەل كوڭىلىن ءبىر وسىرسە, كارتوپتان دا بۇرىن-سوڭدى بولماعان ءونىم الىنۋى تاعى مەرەيلەندىرگەن-ءدى. ازىق-ت ۇلىك تۇرلەرىنە كەنەلۋگە بايلانىستى, ەڭ باس­تىسى, باعاسى شاماعا شاق بولۋى كۇتىلگەن-ءتىن. ءيا, نە نارسە جەتكىلىكتى بولۋىنا وراي ساۋدانىڭ ەجەلدەن بار زاڭدىلىعى بويىنشا قۇنى قالىپتان اسپاۋعا ءتيىس  ەمەس  پە؟ تۇتىنۋشىلار ءۇمىتى دە سول بولاتىن. ولاي بولمادى. كەرىسىنشە, باعا تاعى شىرقاپ شىعا كەلدى. ۇن, كارتوپ, كوكونىس, ەت جانە باسقا دا تاعامدار دۇكەندەر مەن بازارلاردا اسىپ-توگىلگەنىمەن, باعاسى قازىر بىلتىرعىدان 15-20 پايىزعا قىمبات. مۇنىمەن دە قويماي كۇننەن-كۇنگە ءوسۋى توقتالار ەمەس. استارىندا نە سىر بارىن ءبىلۋ قيىن, ونى باقىلاۋشىلاردىڭ قاۋقارسىزدىعى تۇسىنىكسىز. مۇنى ايتۋ سەبەبىمىز, بۇگىندە باعانى تۇراقتاندىرۋ جونىندە كوميسسيالار قۇرىلعان ۇستىنە  قۇرىلىپ, ونىڭ تىزگىنىن  بوساتپاۋ ءۇشىن ءتيىستى تاراپتار اراسىندا مەموراندۋمدارعا قول قويىلىپ جاتىر. بۇل جىل سايىنعى ءۇردىس. بىراق قايىرى شامالى. بيىل دا سولاي بولىپ قالماقتىعى الدەن-اق بەلگىلى جاعداي. الەۋمەتتىك دۇكەندەر اشۋ سياقتى باستالماي جاتىپ اياقسىز قالاتىن شالاجانسار شارالار بىرىنە ءبىرى ۇلاسۋدا. جىل قورىتىندىسى تالقىعا سالىنعان وبلىستىق  جيىندا دا بۇل ماسەلە ايتىلماي قالمادى. جىل سايىنعى جىر وسى. ايتىلادى دا قالادى. ايقىن نەسىپباي, «ەگەمەن قازاقستان». قاراعاندى.