شاراينا
نيۋ-يورك قالاسىنىڭ پوليتسياسى اكتەر فيليپ سەيمۋر حوففماننىڭ ءولىمىن تەرگەۋ ىسىنە قاتىستى ءۇش ەر ادام مەن ءبىر ايەلدى تۇتقىندادى. قۇقىق قورعاۋ ورگاندارى وكىلىنىڭ ايتۋىنشا, قاماۋعا الىنعانداردىڭ مەكەنجايىن تەكسەرۋ كەزىندە گەروين سالىنعان 350 شاعىن پاكەت تابىلعان.
46 جاستاعى حوففمان وسى جىلدىڭ 2 اقپانىندا گەرويندى مولشەردەن ارتىق قولدانعانى ءۇشىن قايتىس بولعان ەدى. ونىڭ جانىنان, سونداي-اق, گەروين سالىنعان پاكەتتەر دە تابىلىپتى. اكتەر, راسىندا دا, ەسىرتكىگە تاۋەلدى بولعان كورىنەدى. كەزىندە ول ەسىرتكىدەن ەمدەلىپتى دە. حوففمان «وسكار» سىيلىعىن العان «كاپوتە» كينوفيلمىندەگى ءرولى ءۇشىن دە تانىمال.
مەتروپوليتەن سالۋ نيەتىندە
تۇركىمەنستان پرەزيدەنتى گۋربانگۋلى بەردىمۇحامەدوۆ ەل استاناسى – اشعابادتا مەترو سالۋ مۇمكىندىگىن تالداۋدى ۇسىندى. «ينتەرفاكس» اگەنتتىگىنىڭ حابارلاۋىنشا, وسىنداي ۇسىنىستى پرەزيدەنت ۋكراينالىق «ينتەربۋدمونتاج» كومپانياسىنا بىلدىرگەن كورىنەدى.
كومپانيانىڭ باسقارما توراعاسى ۆ.پەترۋك بۇل ۇسىنىس جان-جاقتى زەرتتەلەتىنىن ايتقان ەكەن. ماماندار تارتىلاتىنى, جوبانىڭ قاشان قولعا الىناتىنى, وعان قانشا قارجى جۇمسالاتىنى جونىندە اقپارات جوق. مۇنداي ماسەلە بۇرىن دا كوتەرىلگەن بولاتىن. ءتۇرلى سەبەپتەرمەن ول جۇزەگە اسىرىلمادى. بۇگىندە ەل استاناسى – اشعابادتا 700 مىڭنان استام ادام تۇرادى. مەتروپوليتەن كەرەك تە سياقتى.
ميللياردەرلەردى سوتقا بەردى
رەسەي فەدەراتسياسى كەڭەسىنىڭ مۇشەسى لەونيد لەبەدەۆ ل.بلاۆاتنيك پەن ۆ.ۆەكسەلبەرگتەن 2 ميلليارد دوللار ءوندىرۋ جونىندە سوتقا شاعىم ءتۇسىردى. ارىزدانۋشىنىڭ سوزىنە قاراعاندا, بۇل ميللياردەرلەر «روسنەفتي» كومپانياسىن ساتۋدان قىرۋار پايدا تاپقان.
بۇقارالىق اقپارات قۇرالدارىنىڭ جازۋىنشا, مۇنىڭ توركىنى 1997 جىلدان باستالادى. سول جىلدارى ءۇش كاسىپكەر اتالعان كومپانيانى بىرلەسە باسقارعان. ال ل.لەبەدەۆ كومپانياعا جالپى كولەمى 25 ميلليون دوللار قۇيعان سياقتى. بىراق, ميللياردەرلەر لەبەدەۆتىڭ اكتسيالارىن قايتارىپ بەرمەپتى. بلاۆاتنيك پەن ۆەكسەلبەرگ كومپانيانى ساتۋ ارقىلى 27 ميلليارد دوللار پايدا تاپقان ەكەن.
وتىز جەتى جىلدان سوڭ ۇستالدى
وسىدان 37 جىل بۇرىن ميچيگان (اقش) تۇرمەسىنەن قاشىپ كەتكەن قىلمىسكەر ۇستالدى. «اسسوشەيەيتەد پرەسس» اگەنتتىگىنىڭ حابارلاۋىنشا, ول سان-ديەگو قالاسىندا تۇرىپ كەلىپتى.
دجۋدا ليني حەيمەن ەسىمدى قىلمىسكەر قازىر 60 جاسقا جۋىقتاپتى. قۇقىق قورعاۋ ورگاندارىنىڭ قىزمەتكەرلەرى ونىڭ ۇيىنە كەلگەندە دجەمي ءليۋيستىڭ اتىنا بەرىلگەن قۇجاتتى كورسەتكەن ەكەن. ال ول تۇرمەدەن 1977 جىلى قاشىپ كەتكەن. ونى ۇرلىق جاساعانى ءۇشىن 18 ايعا باس بوستاندىعىنان ايىرعان.
ەلەكتر جارىعىنسىز قالدى
برازيليانىڭ ون ءبىر شتاتىندا ەنەرگوجۇيەنىڭ اپاتتى جاعدايىنا بايلانىستى ەلدىڭ 5,5 ميلليوننان استام تۇرعىنى جارىقسىز قالعان. «رەيتەر» اقپارات اگەنتتىگىنىڭ حابارلاۋىنشا, اپاتقا ەلەكتر جەلىلەرىنىڭ تۇيىقتالۋى سەبەپ بولعان.
ەنەرگەتيكا مينيسترلىگىنىڭ تاراتقان اقپاراتتارى بويىنشا, ەلەكتر جارىعىنسىز قالعانداردىڭ اراسىندا وسى جىلدىڭ ماۋسىمىندا فۋتبولدان الەم چەمپيوناتىن قابىلدايتىن اسا ءىرى قالالار – سان-پاۋلۋ مەن ريو-دە-جانەيرو دا بار. بۇل ەلدە ەلەكتر ەنەرگياسىنا دەگەن تاپشىلىق جاز ايلارىندا ەرەكشە سەزىلەدى. ويتكەنى, جاز ماۋسىمىندا سۋ دەڭگەيى ەداۋىر تومەندەيدى.
سوققى جاساۋدى ۋاقىتشا توقتاتتى
پاكىستان ۇكىمەتىنىڭ ءوتىنىشى بويىنشا, اقش اسكەرلەرى وسى ەل اۋماعىندا ۇشقىشسىز باسقارىلاتىن ۇشاقتان سوققى بەرۋدى ۋاقىتشا توقتاتتى. اقپارات كوزدەرىنە قاراعاندا, بۇل «ءۇزىلىس» يسلامابادتىڭ «تاليبان» قوزعالىسىمەن كەلىسسوز جۇرگىزۋى ءۇشىن قاجەت.
دەگەنمەن, اقش اسكەرلەرى «ال-كايدانىڭ» سودىرلارى نەمەسە باسشىلارى ورنالاسقان جەردى انىقتاعان جاعدايدا ولارعا قارسى ارەكەتتەر قولدانىلاتىنىن العا تارتىپ وتىر. پاكىستاندا ۇشقىشسىز باسقارىلاتىن ۇشاقتان سوققى بەرۋ وپەراتسياسى وتكەن جىلدىڭ جەلتوقسانىنان بەرى قولدانىلىپ كەلەدى. وسىنداي وپەراتسيا بارىسىندا جەرگىلىكتى «تاليبان» قوزعالىسىنىڭ جەتەكشىسى حاكيمۋللا مەحسۋد ولتىرىلگەن بولاتىن.
وتباسىلار قاۋىشا الا ما؟
وڭتۇستىك كورەيا مەن سولتۇستىك كورەيا ءبىر ەلدى ەكى مەملەكەتكە بولگەن 1950-1953 جىلدارداعى سوعىستا ءبىر-بىرلەرىنەن اجىراپ قالعان وتباسىلاردىڭ قاۋىشۋىن ۇيىمداستىرۋعا كەلىستى.
«فرانس-پرەسس» اقپارات اگەنتتىگىنىڭ جازۋىنا قاراعاندا, اتالعان ءىس-شارا وسى جىلدىڭ 20-25 اقپانىندا سولتۇستىك كورەيانىڭ تۋريستىك كىمگانسان ايماعىندا وتپەك. مۇنداي قاۋىشۋ وسىدان ءۇش جىل بۇرىن بولعان ەدى. ساياساتكەرلەر بۇل ءىس-شارانىڭ بولماي قالۋىن دا جوققا شىعارمايدى. سەبەبى, وڭتۇستىك كورەيا ۇستىمىزدەگى جىلعى اقپان ايىنىڭ سوڭىندا اقش-پەن بىرلەسىپ, اسكەري جاتتىعۋ وتكىزۋدى جوسپارلاپ قويعان.
ينتەرنەت ماتەريالدارى نەگىزىندە ازىرلەندى.
