قوعام • 28 قىركۇيەك، 2021

ءبىرتانوۆتىڭ ادۆوكاتتارى پرەزيدەنتتەن كومەك سۇرادى

215 رەت كورسەتىلدى

بۇرىنعى دەنساۋلىق ساقتاۋ ءمينيسترى ەلجان ءبىرتانوۆتىڭ ادۆوكاتتارى مەملەكەت باسشىسى قاسىم-جومارت توقاەۆقا ۇندەۋ جولدادى. ولار پرەزيدەنتتەن بۇرىنعى ءمينيستردى قۋدالاۋدى توقتاتۋدى سۇرادى، دەپ حابارلايدى Egemen.kz.

ەكس-ءمينيستردىڭ ۇلكەن اعاسى، قوعامدىق ادۆوكات ەرجان ءبىرتان جۋرناليستەر الدىنا ZOOM ارقىلى شىعىپ، ۇندەۋ جولدادى. ول ەلجان ءبىرتانوۆ پەن بۇرىنعى دەنساۋلىق ساقتاۋ ۆيتسە-ءمينيسترى ولجاس ابىشەۆكە قاتىستى قىلمىستىق ءىس وتىرىك پەن بولجامدارعا نەگىزدەلگەنىن مالىمدەدى.

ء«بىز بۇرىنعى دەنساۋلىق ساقتاۋ ءمينيسترى ەلجان بىرتانوۆقا قاتىستى قىلمىستىق قۋدالاۋدى مەرزىمىنەن بۇرىن توقتاتۋ بويىنشا كومەك سۇراپ، وزىڭىزگە شىن جۇرەكتەن ءوتىنىش بىلدىرەمىز. قارجىلىق مونيتورينگ اگەنتتىگىنىڭ (قما) مالىمەتىنشە، Ericsson Nikola Tesla كومپانياسى كەلىسىمشارتتىق مىندەتتەمەلەرىن ورىنداماعان. دەگەنمەن ENت جازباشا تۇردە، كەرىسىنشە دالەل كەلتىرەدى، كەلىسىمگە سايكەس پلاتفورمانىڭ تەحنيكالىق قولداۋىن 2021 جىلدىڭ 5 قاراشاسىنا دەيىن جۇرگىزدىك دەپ كورسەتەدى. ENT پيعىلىنىڭ دۇرىس ەمەستىگىن بەتكە باسۋ حالىقارالىق اربيتراجعا جۇگىنۋ سەبەبى بولا الادى»، دەدى ەرجان ءبىرتان.

ءبىرتانوۆتىڭ ۇلكەن اعاسى قما 2020 جىلدىڭ 31 ناۋرىزىنداعى اۋديتورلىق ەسەپكە سۇيەنە وتىرىپ، ۇرلىق بابى بويىنشا تەرگەۋدى باستاعانىن اتاپ ءوتتى.

«بىراق 14 اي وتكەن سوڭ، ۇرلىقتى دالەلدەمەي-اق، «جوبانىڭ ءمانى مەن كەلىسىمشارت تالاپتارى ادەيى بۇرمالانىپ»، كۇدىككە تاعىلعان ايىپ قىزمەت بابىن تەرىس پايدالانۋ دەپ قايتا وزەرتىلدى»، دەدى ول.

ەرجان ءبىرتان 2018 جىلدىڭ سوڭىندا Ericsson Nikola Tesla پلاتفورمانى ازىرلەۋ جانە جەتكىزۋ بويىنشا جۇمىستىڭ ءبىر بولىگىن اياقتاعانىن، ال دەنساۋلىق ساقتاۋ مينيسترلىگى ونى كەلىسىمشارتقا جانە قازاقستان رەسپۋبليكاسىنىڭ زاڭناماسىنا سايكەس قابىلداپ العانىن ايتتى. كەلىسىمشارتتا قازاقستاندىق ۆەدومستۆولار پلاتفورمانى باسقا اقپاراتتىق جۇيەلەرمەن ينتەگراتسيالاۋى كەرەك ەكەندىگى كورسەتىلگەن. كەيبىر جۇيەلەر 2019-2020 جىلدارى ينتەگراتسياعا دايىندالىپ، سىناقتان ءوتتى. بىراق 2020 جىلدىڭ مامىرىندا قما ونى ەنگىزۋ جۇمىستارىن ورتا جولدان توقتاتتى.

پلاتفورما پرەزيدەنتتىڭ 2020 جىلدىڭ قازانىنداعى تالابىنان كەيىن بۇعاتتان شىعارىلدى. ال قازىر دەنساۋلىق ساقتاۋ مينيسترلىگى مەن قر ءتسدياوم ونى ەنگىزۋدى جالعاستىرۋدا.

«قۇرمەتتى قاسىم-جومارت كەمەل ۇلى، ءبىزدىڭ الدىمىزداعى بۇل سيۋررەاليزم ستيلىندەگى كارتينا. ۇكىمەت پلاتفورمانى ەنگىزۋ بويىنشا جۇمىستى ءالى جالعاستىرىپ جاتىر. ENT وعان تەحنيكالىق قولداۋ كورسەتۋدە. بىراق قما مەن باس پروكۋراتۋرا ەلجان ءبىرتانوۆتى زاڭسىز قولعا الىنعان تەرگەۋدى، ۇستاۋدى جانە تۇتقىنداۋدى اقتاپ الۋ ءۇشىن اتالعان پلاتفورما جۇمىس ىستەمەيدى، ال ENT ءوز مىندەتتەمەلەرىن ورىندامادى دەگەنگە قوعامدى سەندىرۋ ءۇشىن جانتالاسىپ باعۋدا. 2021 جىلدىڭ 5 قاراشاسىندا پلاتفورمانى قامسىزداندىرۋ بويىنشا بەرىلگەن ءۇش جىلدىق كەپىلدىك مەرزىمى اياقتالادى»، دەدى ەرجان ءبىرتان.

ونىڭ ايتۋىنشا، قما مەن باس پروكۋراتۋرانىڭ ارقاسىندا قازاقستاننىڭ پلاتفورمانى ازىرلەۋشىلەردىڭ تەحنيكالىق قولداۋىنان ايىرىلۋ قاۋپى بار. ەگەر قۇقىق قورعاۋ ورگاندارى ENT نيەتى دۇرىس ەمەس دەگەندى العا تارتا بەرسە، كومپانيا زاڭدى شارا قولدانا الادى. حالىقارالىق سوت پروتسەستەرى ەل بيۋدجەتىنە ۇلكەن شىعىن اكەلۋى مۇمكىن.

«سىزدەن كونستيتۋتسيانىڭ كەپىلى رەتىندە وسى زاڭسىزدىقتى توقتاتىپ، ەلىمىزگە زيان كەلتىرمەۋدى سۇرايمىز»، دەدى ەكس-ءمينيستردىڭ ۇلكەن اعاسى ەلجان ءبىرتان.

سونىمەن قاتار جۋرناليستەر سۇراق قويۋعا شاقىرىلدى. ادۆوكات دميتري كۋرياچەنكو ادۆوكاتتار مەملەكەت باسشىسىنا نەگە شاعىمدانۋعا شەشىم قابىلداعانىن سۇراعاندا، ول بىلاي دەپ جاۋاپ بەردى:

«تەرگەۋ مەن باس پروكۋراتۋرانى ءىستىڭ وبەكتيۆتىلىگى قىزىقتىرمايتىنىن تۇسىندىك. سوندىقتان ءبىز كومەك سۇراپ، پرەزيدەنتكە جۇگىنەمىز»، دەدى.

ەكس-ءمينيستردىڭ ۇلكەن اعاسى ەلجان ءبىرتان وزىنە، ءوز وتباسىنا، تۋىستارىنا، ءتىپتى ارىپتەستەرىنە تەرگەۋ تاراپىنان قىسىم كورسەتىلىپ جاتقانىن ايتتى.

تەرگەۋ ورگانى بەلگىلى ءبىر ادامعا قىزىعۋشىلىق تانىتىپ، جاۋاپ الۋعا شاقىرادى، ال ول ادام وسى ىستەگى فيگۋرانتقا اينالادى جانە وعان ەلجان امانتاي ۇلىمەن بايلانىسۋعا تىيىم سالىنادى.

ول ادۆوكاتتاردا ەكس-ءمينيستردىڭ كىناسىز ەكەندىگىنە قاتىستى جەتكىلىكتى دالەلدەر بار ەكەنىن اتاپ ءوتتى. بۇل رەتتە ەرجان ءبىرتان زاڭ بويىنشا كۇدىكتىنىڭ كىناسىن قۇقىق قورعاۋ ورگاندارى دالەلدەۋى ءتيىس ەكەنىن ەسكە سالدى.

ء«بىز ءوزىمىزدى باسقا الەمدە جۇرگەندەي سەزىنەمىز. بارلىعى كىناسىزدىك پرەزۋمپتسياسى ءپرينتسيپىن ۇمىتىپ كەتكەندەي، ءبىز تۇيە ەمەس ەكەنىمىزدى دالەلدەۋىمىز كەرەك. ايىپتاۋشى تاراپ كىنانى دالەلدەۋى كەرەك»،  دەدى ەرجان ءبىرتان.

بۇرىنعى دەنساۋلىق ساقتاۋ ءمينيسترى ەلجان ءبىرتانوۆ دەنساۋلىق ساقتاۋ مينيسترلىگىندە جۇمىس ىستەمەيتىن اقپاراتتاندىرۋ پلاتفورماسىن قابىلداپ، قولدانىسقا ەنگىزىپ، قىزمەت بابىن اسىرا پايدالاندى دەگەن كۇدىككە ىلىنگەن.

ءبىرتانوۆ ءبىر جىلعا جۋىق ءۇي قاماقتا وتىر.

سوڭعى جاڭالىقتار

ۇقساس جاڭالىقتار