قوستاناي وبلىسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى «قاراسورا-2021» جەدەل الدىن الۋ ءىس-شاراسى بارىسىندا قوستاناي قالاسىندا, رۋدنەنسكي كوشەسىندە وبلىس ورتالىعىنىڭ 19 جاسار تۇرعىنىن ۇستادى.
«ول شاڭسورعىش سالىنعان قوراپتى قولىنا ۇستاعان, تەكسەرۋ بارىسىندا شاڭسورعىش ىشىنەن جالپى سالماعى 250 گراممنان اساتىن ۇنتاق زات سالىنعان پاكەت تابىلدى. ساراپتاما كورسەتكەندەي, بۇل زات گەروين بولىپ شىقتى», دەپ حابارلادى پوليتسيادان.
قوستاناي وبلىسى پد باستىعىنىڭ ورىنباسارى پوليتسيا پولكوۆنيگى دۇيسەمباي بايبوسىنوۆتىڭ ايتۋىنشا, قازىرگى ۋاقىتتا قر قك-ءنىڭ 296-بابىنىڭ 4-بولىگىندە «اسا ءىرى مولشەردە ەسىرتكى زاتتارىن ساقتاۋ» كوزدەلگەن سوتقا دەيىنگى تەرگەۋ باستالدى.
كۇدىكتى قاماۋعا الىنىپ, تەرگەۋ امالدارى جۇرگىزىلۋدە.
جىل باسىنان بەرى وبلىستا زاڭسىز اينالىمنان 105 كگ استام ءتۇرلى ەسىرتكى قۇرالدارى, ونىڭ ىشىندە 645 گرامم گەروين الىندى.
