رەسپۋبليكا اۋماعىندا اياز اقپاننىڭ ورتاسىنا دەيىن بولادى

قاڭتاردىڭ سوڭىن الا كۇشىنە مىنگەن ايازدىڭ سالدارىنان 1-11سىنىپ وقۋشىلارى مەن كوللەدجدىڭ 1-2 كۋرس ستۋدەنتتەرىنە ساباق توقتاتىلدى. بۇل تۋرالى «قازاقستان» تەلەارناسى حابارلادى . قارلى بۇرقاسىن مەن قاتتى ايازدان رەسپۋبليكا توڭىرەگىندەگى بىرنەشە  جولدار جابىلدى. ماسەلەن, اقتوبە وبلىسىندا «اقتوبە-استراحان», «اقتوبە-ورسك», «قاندىاعاش-ەمبى-شالقار-ىرعىز» باعىتتارى بويىنشا كولىك قوزعالىسى توقتاتىلدى. سونداي-اق «الماتى-ەكاتەرينبۋرگ», «قىزىلوردا-پاۆلودار», «جەزقازعان-پەتروپاۆل» باعىتتارى بويىنشا دا جولداردىڭ جابىلعانى حابارلاندى. ال قوستاناي وبلىسىندا كولىكتەردىڭ بارلىق تۇرلەرىنىڭ «قارابۇتاق-دەنيسوۆكا-رۋدنىي-قوستاناي», «جەزقازعان-پەتروپاۆل», «جەتىقارا-قامىستى-لەرمونتوۆكا», «دەنيسوۆكا-جەتىقارا-رف شەكاراسى» باعىتتارى بويىنشا كولىك قوزعالىسى شەكتەلدى. «اركتيكالىق اۋا ماسسالارى ىقپالىنىڭ قازاقستانعا ەنۋىنە بايلانىستى قاڭتار ايىنىڭ سوڭعى كۇندەرى باتىس ايماقتاردا تۇندە تەمپەراتۋرا -28, -36 گرادۋس, سولتۇستىك جانە ورتالىقتا -35, -40 گرادۋس, قىزىلوردادا جانە وڭتۇستىك قازاقستان وبلىستارىندا -23, -28, شىعىستا -25 -36 گرادۋسقا دەيىن تومەندەدى. جامبىل جانە الماتى وبلىستارى وڭتۇستىك تسيكلوننىڭ اسەرىندە بولعاندىقتان, بۇل ايماقتاردا قار جاۋىپ, بۇرقاسىن سوعىپ, جەل كۇشەيدى, تۇنگى تەمپەراتۋرا -10 -15 گرادۋسقا دەيىن جەتتى», - دەدى «قازگيدرومەت» رمك جەتەكشى ينجەنەر-سينوپتيگى نۇرساۋلە قۋاندىقوۆا. «قازگيدرومەت» ماماندارىنىڭ بولجاۋىنشا, قاتتى اياز اقپاننىڭ ورتاسىنا دەيىن ساقتالادى. سوندىقتان توتەنشە جاعدايلار قىزمەتكەرلەرى جەكە باستىڭ قاۋىپسىزدىگى ءۇشىن بوراندى ۇسكىرىك ايازدى كۇنى الىس جولعا شىقپاۋ كەرەكتىگىن ايتادى. ويتكەنى, قوستاناي, قاراعاندى, شىعىس قازاقستان مەن اقمولا وبلىستارىنىڭ كەي جەرلەرىندە بۇرقاسىن بولىپ, جەل تۇرۋى ىقتيمال.سونىمەن بىرگە, الماتى, جامبىل, وڭتۇستىك قازاقستان, قىزىلوردا جانە ماڭعىستاۋ وبلىستارىندا كۇن كۇرت سۋىتادى. اقتوبە, سولتۇستىك قازاقستان, اتىراۋ مەن ماڭعىستاۋ وبلىستارىنىڭ كەي جەرلەرىندە دە اياز كۇشەيەدى. ءامىرحان الماعانبەتوۆ. دەرەككوز: «قازاقستان» تەلەارناسى. فوتو: Trend.az.