ۋكراينا كونستيتۋتسياعا وزگەرىس ەنگىزبەكشى

كەشە ۋكراينا پارلامەنتى كونستيتۋتسياعا پرەزيدەنتتىڭ وكىلەتىن شەكتەيتىن وزگەرىستەر ەنگىزۋ جايىن تالقىلادى. بۇل تۋرالى Azattyg.org حابارلادى. كيەۆتە ۇكىمەتكە قارسى شەرۋلەر وتكىزىپ جاتقان وپپوزيتسيا ۆيكتور يانۋكوۆيچتىڭ وتستاۆكاعا كەتۋىن, سونداي-اق ەلدە مەرزىمىنەن بۇرىن پارلامەنت جانە پرەزيدەنت سايلاۋلارىن وتكىزۋدى تالاپ ەتۋدە. 3 اقپاندا پارلامەنت فراكتسيالارى مەن كوميتەتتەرىنىڭ جەتەكشىلەرى رادانىڭ كۇن تارتىبىنە قاتىستى كەلىسىمگە كەلە الماعان. وپپوزيتسيا باسقارۋدىڭ پارلامەنتتىك-پرەزيدەنتتىك فورماسىن ەنگىزۋگە مۇمكىندىك بەرەتىن 2004 جىلعى كونستيتۋتسيانى قايتا قالپىنا كەلتىرەتىن اكت قابىلداۋدى تالاپ ەتەدى. الايدا, «ايماقتار پارتياسى» فراكتسياسىنىڭ جەتەكشىسى الەكساندر ەفرەموۆ زاڭ جۇزىندە كونستيتۋتسيانى مەحانيكالىق جولمەن وزگەرتۋ مۇمكىن ەمەس ەكەنىن العا تارتتى. ونىڭ ايتۋىنشا, كونستيتۋتسياعا تەك رەفەرەندۋم ارقىلى عانا وزگەرىس ەنگىزۋگە بولادى. ۋكراينا پرەزيدەنتى ۆيكتور يانۋكوۆيچ سىرقاتتانىپ قالۋىنا بايلانىستى ءتورت كۇن دەمالىس الىپ, 3 اقپاندا عانا جۇمىسقا شىققان بولاتىن. ايدار ورىسباەۆ. دەرەككوز: Azattyg.org. فوتو: Thekievtimes.ua.