جەلدەي جۇيتكىگەن جاستار

وبلىستا ۇلتتىق سپورت تۇرلەرىن دامىتۋدا ىلكىمدى ىزدەنىستەر بار. سونىڭ ءبىر دالەلى بالالار مەن جاسوسپىرىمدەرگە ارنالعان №10 ات سپورتى مەكتەبىنىڭ جۇمىس ىستەۋى دەۋ ورىندى بولماق. ات سپورتى مەكتەبىنە جاڭادان عيمارات سالىنىپ, پايدالانۋعا بەرىلگەنىنە كوپ ۋاقىت بولا قويعان جوق. جاقىندا وسىندا بولۋدىڭ ءساتى ءتۇستى.  ەكى قاباتتى جاڭا عيماراتتىڭ ات سپورتىمەن اينالىسۋىنا ارنالعان سپورتتىق زالى, 250 ورىندىق كورەرمەنگە ارنالعان ورىنمەن جاراقتاندىرىلعان  اۋماعى 50ح25 بولاتىن جابىق مانەجى, قازاق كۇرەسى, توعىزقۇمالاق سپورتى جاتتىعۋ زالدارى بار. قازىر مۇندا 376 بالا اۋدارىسپاق, تەڭگە ءىلۋ, بايگە, قىز قۋ, كوكپار سىندى ۇلتتىق ات سپورتىمەن اينالىسادى, سونداي-اق, كۇرەس پەن توعىزقۇمالاق سەكىلدى ۇلتتىق سپورتتىق ويىن تۇرلەرىنىڭ قىر-سىرىن ۇيرەنىپ ءجۇر. وسىندا ارنايى اتباسىن تىرەگەن وبلىس اكىمى ارحيمەد مۇحامبەتوۆ ات سپورتى مەكتەبىنىڭ ماتەريالدىق-تەحنيكالىق بازاسىمەن تانىستى. جاس سپورتشىلار ءوڭىر باسشىسىنا اتپەن كەدەرگىلەردەن سەكىرۋ مەن اۋدا­رىسپاق ويىنىن كورسەتتى. اتالعان مەكتەپ ديرەكتورىنىڭ وقۋ ءىسى جونىندەگى ورىنباسارى ابات ايماعامبەتوۆتىڭ ايتۋىنشا, ات سپورتىمەن اينالىسۋعا بالالار 9-10 جاستان باستاپ تەگىن قابىلدانادى, بارلىق سپورت تۇرلەرى بويىنشا جاتتىقتىرۋشىلار جەتكىلىكتى. ات سپورتى مەكتەبى 2005 جىلى اشىلعان-دى. بۇرىن قىستىڭ سالقىن كۇندەرىندە بالالار دالادا جاتتىعا المايدى ەكەن. جەرگىلىكتى بيلىكتىڭ قولداۋىمەن وتكەن جىلى جەلتوقسان ايىندا جاڭا عيمارات پايدالانۋعا بەرىلدى. ەندى مۇندا ۇلتتىق ات سپورتىنىڭ بارلىق تۇرىمەن اينالىسۋعا مۇمكىندىك تۋدى. بولاشاقتا وسىنداي ات سپورتى مەكتەپتەرىن اۋدانداردا اشۋ كوزدەلۋدە. سوندا ات سپورتىنىڭ باعى جانىپ, ءباسى ارتارى ءسوزسىز. – قازىر مەكتەپتە 18 ات بار. الداعى ۋاقىتتا ودان دا كوبەيمەك. ەردىڭ دە سپورتتىق, كونكۋرلىق, كوكپارعا ارنالعان, كاۆالەرلىك تۇرلەرى بار. مەكتەپ قاجەتتى قۇرالدارمەن تولىق جابدىقتالعان. سوعان ساي بالالاردىڭ دا جەتىس­تىكتەرى جاقسى. بۇرىن اقتوبەلىك كوكپارشىلار ەلىمىزدە سوڭعى ورىنداردا جۇرگەن بولسا, بىلتىر ەل بىرىنشىلىگىندە سەگىزىنشى ورىنعا تابان تىرەدى. بۇل جامان كورسەتكىش ەمەس. ءبىزدىڭ كوكپار كومانداسىنىڭ مۇشەلەرى ىلعي جاستاردان قۇرالعان. سوندىقتان ولاردىڭ بولاشاعىنان ۇلكەن ءۇمىت كۇتەمىز. جاستار اراسىندا ات سپورتىنىڭ تۇرلەرىنەن سپورت شەبەرلەرى, رەسپۋبليكالىق جارىس­تاردا جۇلدەلى ورالىپ جۇرگەندەرى بار, – دەيدى ول. ساتىبالدى ءساۋىرباي, «ەگەمەن قازاقستان». اقتوبە وبلىسى.