تۇساۋكەسەر باسەكەسىندە يتاليانىڭ مىقتى ويىنشىسى, الەمنىڭ بۇرىنعى 18-راكەتكاسى اندرەاس سەپپيگە سان سوقتىرىپ, جەرگىلىكتى جانكۇيەرلەردى قۋانتقان جەرلەسىمىز كەشە يليا يۆاشكومەن كەزدەستى. 27 جاستاعى بەلارۋس ەلىنىڭ وكىلى بۇل كۇندەرى اتر رەيتينگىندە 52-ورىندا تۇر. بيىل ول ۋيمبلدوننىڭ ءتورتىنشى كەزەڭىنە دەيىن جەتسە, اقش-تىڭ اشىق بىرىنشىلىگىننىڭ ءۇشىنشى اينالىمىندا ونەر كورسەتتى. بۇل كەزدەسۋدە يۆانشكونىڭ شەبەرلىك دەڭگەيى سكاتوۆتان ءبىر باس جوعارى ەكەنى انىق بايقالدى. باسەكە 6:2, 6:3 ەسەبىمەن بەلارۋسسيالىق تەننيسشىنىڭ پايداسىنان شەشىلدى. وسىلايشا, ول Astana Open دوداسىنا قاتىسۋشىلار اراسىنداعى العاشقى بولىپ شيرەك فينالعا جولداما الدى.
دميتري پوپكو مەن اۋستراليالىق دجون ميللمانمەن اراسىنداعى باسەكەدە وتانداسىمىز وسالدىق تانىتتى – 6:3, 1:6, 4:6. كەشكە كەشكىسىن ميحايل كۋكۋشكين جاسىل قۇرلىقتىڭ تاعى ءبىر وكىلى دجەيمس داكۆوردپەن كۇش سىناستى. بۇگىن الەكساندر بۋبليك سەربيالىق ميومير كەتسمانوۆيچپەن سايىسقا تۇسەدى. ەندى وسى قوس جەرلەسىمىزدەن جەڭىس كۇتەمىز. كۋكۋشكين دە, بۋبليك تە اتر دودالارى مەن «ۇلكەن دۋىلعا» ساناتىنداعى تۋرنيرلەرگە ۇزدىكسىز قاتىسىپ كەلە جاتقان ساقا سپورتشىلار.
ەستەرىڭىزگە سالا كەتەيىك, Astana Open ءتۋرنيرى 26-قىركۇيەككە دەيىن جالعاسادى. الەمدىك كورتتاردا ءبىراز بەدەل جيعان ويىنشىلاردىڭ باسىن قوسىپ وتىرعان ايتۋلى جارىستىڭ جۇلدە قورى بيىلىعى جىلى 480 000 اقش دوللارىن قۇراپ وتىر.
نۇر-سۇلتانداعى تۋرنيردەن بولەك, تاعى بىرنەشە جەرلەسىمىز ءتۇرلى باسەكەلەردە باق سىناسۋدا. اتاپ ايتساق, چەحيانىڭ وستراۆا قالاسىنداعى WTA دوداسىنىڭ تۇساۋكەسەر كەزدەسۋىندە ەلەنا رىباكينا رەسەيلىك ۆەرونكا كۋدەرمەتوۆانى 6:1, 6:3 ەسەبىمەن قاپى قالدىردى. يۋليا پۋتينتسەۆا اسا شيەلەنستى وتكەن ويىندا قىتايلىق چجان شۋايعا شاڭ قاپتىردى – 5:7, 7:6, 6:4. بۇل باسەكە 3 ساعات 24 مينۋتقا سوزىلدى. ەكىنشى كەزەڭدە رىباكينا پولشالىق ماگدا لينەتپەن جولىقسا, پۋتينتسەۆا دا ايتۋلى مەملەكەتتىڭ وكىلى يگا سۆەنتەكپەن سايىسقا تۇسەدى.
