«تۇڭعىش پرەزيدەنتىمىز – ەلباسى نۇرسۇلتان نازارباەۆتىڭ كەمەڭگەرلىگى مەن كورەگەندىگىنىڭ جاە حالقىمىزدىڭ تاعاتتىلىعى مەن ىنتىماق-بىرلىگىنىڭ ارقاسىندا اسقار اسۋلار مەن بيىك بەلەستەردى باعىندىردىق. ەڭسەلى ەلگە اينالدىق. ادام ساناسى تۇڭعيىعىنا جەتىپ بولمايتىن, ۇشى-قيىرسىز تاريحتىڭ اسىل قازىناسى ول ارحيۆ. ارحيۆ – شەجىرە-كەنىش, شەجىرە-سىر. ارحيۆتەگى دالەلدەر مەن دەرەكتەر قورى وتكەننىڭ وشپەس ونەگەسىن وشىرمەي, وسكەلەڭ ۇرپاققا اماناتتايتىن اقيقات ايناسى.
ولاي بولسا مەرەيلى مەرەكەمىز تاۋەلسىزدىكتىڭ 30 جىلدىعىمەن تۇسپا-تۇس كەلىپ وتىرعان تاريحتىڭ قارا شاڭىراعى ۇلتتىق ءارحيۆتىڭ 15 جىلدىق مەرەيتويى قۇتتى بولسىن. ەلىمىزدىڭ بايتاق تاريحي شەجىرەسىنەن سىر شەرتەتىن ارحيۆتەگى ءار قۇجات قۇندى. مۇنداعى ءار ءىس-قاعاز وسكەلەڭ ۇرپاققا شاشاۋى شىقپاعان كۇيدە جەتكىزىلەدى», دەلىنگەن قىرىمبەك كوشەرباەۆتىڭ «تاۋەلسىزدىك جانە ەلباسى: جاسامپازدىقتىڭ جاڭا تاريحى» حالىقارالىق عىلىمي-پراكتيكالىق كونفەرەنتسيا قاتىسۋشىلارىنا ارنالعان العى سوزىندە.
ونىڭ ايتۋىنشا, ارحيۆ ماماندارىنا جۇكتەلەتىن جاۋاپكەرشىلىكتىڭ ءجونى بولەك.
«كەز كەلگەن ادام تاريحىمىزدىڭ اقتاڭداقتارىن ايعاقتايتىن كونەدەن جەتكەن قولجازبالاردان باستاپ, قازىرگى زامانعى رەسمي جانە بەيرەسمي قۇجاتتار ارقىلى اتا-بابا شەجىرەسىنە ءۇڭىلىپ, تىڭ دەرەكتەرگە قانىق بولادى, وتكەندى سارالاپ, كەلەشەكتى تۋرالاۋعا مۇمكىندىك الادى. وتكەندى زەردەلەمەي, كەلەشەكتىڭ وركەندەمەيتىنى بەلگىلى. تاريح قويناۋىنا تەرەڭدەپ ەنگەن ءاربىر عاسىردىڭ, ءاربىر كەزەڭنىڭ وزىندىك ماڭىزى مەن ەرەكشەلىكتەرى, ايقىندالاتىن ايتۋلى وقيعالارى جانە جىلنامالارى بار. وسى رەتتە ارحيۆ ىسىنە جۇكتەلەتىن جاۋاپكەرشىلىك وراسان زور.
ارحيۆ – اتا-بابالارىمىزدىڭ تاريحىن عانا ەمەس ولاردىڭ ارمان تىلەگىن, اقىل-ويىن, دانالىعى مەن دارالىعىن, پاراساتى مەن ونەگە وسيەتتەرىن ساقتاپ وتىراتىن كيەلى ورىن», دەيدى ول.
سونداي-اق مەملەكەتتىك حاتشى ارحيۆ سالاسىنداعى زەرتتەۋلەردى قولعا الۋ كەرەكتىگىن ەسكە سالدى.
«ارحيۆ قورىنداعى ءاربىر قۇجات وتكەندى سارالايتىن, تاريحتى تۇگەندەيتىن, ەكىنشى نۇسقاسى جوق اقپارات. ايعاقتار مەن دايەكتەر ارقىلى كومكەرىلگەن تاريحي سانا. تۇپتەپ كەلگەندە ۇلتتىق سانانى قالىپتاستىراتىن قۇندى قۇرال. تاريحىمىزدىڭ تەرەڭدىگىن, تاۋەلسىزدىگىمىزدىڭ تۇعىرىن, مەملەكەتتىلىگىمىزدىڭ باياندىلىعىن تورتكۇل دۇنيەگە مويىنداتۋداعى قازاقستان ارحيۆتەرىنىڭ ءرولى وتە زور. وسى ورايدا ءبىز عالىمداردان ەجەلگى داۋىردەن قازىرگى زامانعا دەيىنگى كەزەڭدى قامتيتىن بارلىق وتاندىق جانە شەتەلدىك مۇراعاتتار دۇنيەسىنە ەلەۋلى, ىرگەلى زەرتتەۋلەردى كۇتەمىز», دەدى ق. كوشەرباەۆ.
قۇرمەتتى كونفەرەنتسياعا قاتىسۋشىلار, سىزدەرگە شىعارماشىلىق تابىس تىلەيمىن. ەلىمىزدىڭ ءوسىپ-وركەندەۋى مەن كەلەشەگىمىزدىڭ كەمەلدىگى جولىنداعى جاسامپاز ىستەرىڭىز ناتيجەلى بولسىن.
