اگەنتتىك توراعاسىنىڭ ايتۋىنشا, اتالعان سالالار بويىنشا مونوپولياعا قارسى قابىلدانعان شارالاردىڭ ناتيجەسىندە بىرقاتار ءىرى قۇرىلىس كومپانيالارى باستاپقى تۇرعىن ءۇي باعاسىن ماۋسىم-تامىز ايلارىندا ورتا ەسەپپەن 7-20 پايىزعا تومەندەتكەن, قۇرىلىس ماتەريالدارى باعاسىنىڭ ءوسۋى ءساۋىر ايىنداعى 10,9 پايىزدان, تامىز ايىندا 3,2 پايىزعا دەيىن, بەنزين باعاسى ءساۋىر ايىنداعى 8,4 پايىزدان, مامىر ايىندا 0,2 پايىزعا دەيىن ارزانداعان. بۇگىنگى تاڭدا وسى باعالار ساقتالىپ وتىر.
الەۋمەتتىك ماڭىزى بار ازىق-ت ۇلىك ونىمدەرى باعاسىنىڭ اپتا سايىنعى قىمباتتاۋ كورسەتكىشى ءساۋىر ايىنداعى 0,6 پايىزدان 0,1 پايىزعا دەيىن ازايعان.
مەملەكەت باسشىسىنا تاۋار بيرجالارىنداعى كوممۋنالدىق-تۇرمىستىق كومىر ساۋداسىنىڭ بارىسى تۋرالى باياندالدى. وندا جەرگىلىكتى وپەراتورلار وتىندى شاعىن پارتيالارمەن تىكەلەي ساتىپ الۋعا مۇمكىندىك الادى.
پرەزيدەنتكە اگەنتتىكتىڭ دارىلىك زاتتاردىڭ باعاسىن قايتا رەتتەۋ, راديوجيىلىكتەردى اۋكتسيونعا شىعارۋ ارقىلى ءموبيلدى بايلانىس نارىعىندا باسەكەلەستىك قالىپتاستىرۋعا جاعداي جاساۋ, جولاۋشىلار تاسىمالى 2 ميلليون ادامنان اساتىن اۋەجايلارداعى جەردە قىزمەت كورسەتۋ تۇرلەرىنە تاۋەلسىز تاسىمالداۋشىلاردىڭ قول جەتكىزۋىن قامتاماسىز ەتۋ, سونداي-اق فارماتسەۆتيكا, جول قۇرىلىسى, مەديتسينا سالالارىندا جۇرگىزىپ جاتقان مونوپولياعا قارسى باقىلاۋ شارالارى تۋرالى مالىمەت بەرىلدى.
سونىمەن قاتار, سەرىك جۇمانعارين مەملەكەت باسشىسىنا اگەنتتىكتىڭ كەدەرگىلەر جونىندەگى كەڭەس الاڭدارىندا باسەكەلەستىكتى دامىتۋعا قاتىستى شەكتەۋلەردى جويۋ قىزمەتى, باسەكەلەستىك ماسەلەلەرى جونىندەگى زاڭ جوباسى, باسەكەلەستىكتى دامىتۋ تۇجىرىمداماسىنىڭ ازىرلەمەسى, ەكونوميكالىق ىنتىماقتاستىق جانە دامۋ ۇيىمىنا مۇشە ەلدەردەگى باسەكەلەستىكتى دامىتۋدىڭ سوڭعى ۇردىستەرى تۋرالى ايتتى.
كەزدەسۋ سوڭىندا مەملەكەت باسشىسى الەۋمەتتىك ازىق-ت ۇلىك پەن تاۋارلاردىڭ باعاسىن باقىلاۋدا ۇستاۋدى تاپسىردى.
