وقيعا • 21 قىركۇيەك، 2021

«جەر الىپ بەرەمىن» دەگەن الاياق ۇستالدى

52 رەت كورسەتىلدى

«جەر الىپ بەرەمىن» دەپ الاياقتىق جاساعان تۇركىستاندىق ۇستالدى، دەپ حابارلايدى Egemen.kz Polisia.kz سايتىنا سىلتەمە جاساپ.

تۇركىستان قپب-عا جەرگىلىكتى تۇرعىن ارىزدانىپ كەلگەن. جابىرلەنۋشىنىڭ ايتۋىنشا، ەسكى تانىسى 2019 جىلدىڭ شىلدە ايىندا «تانىستارىم بار. 10 سوتىق جەر الىپ، زاڭداستىرىپ بەرەمىن» دەپ سەندىرىپ، الاياقتىق جولمەن 200 000 تەڭگەسىن جىمقىرعان. الايدا ءبىر جىلدان استام ۋاقىت وتسە دە نە جەرىن الا الماعان، نە اقشاسىن قايتارماعان. اتالعان جايتتى پوليتسيا قىزمەتكەرلەرى اپب-عا قر قك-ءنىڭ 190-بابى (الاياقتىق) بويىنشا تىركەدى. 

قالالىق تاجىريبەلى پوليتسەيلەردەن قۇرىلعان جەدەل-تەرگەۋ توبى جەرگىلىكتى تۇرعىندى ارباۋىنا تۇسىرگەن الاياقتى ۇستاۋعا قاجەتتى شارالاردى جاسادى. كۋالاردان جاۋاپ الۋ بارىسىندا، جيناقتالعان اقپارات كوزدەرى ارقىلى كۇدىكتىنىڭ جەكە-باسى انىقتالىپ، ول پوليتسيا باسقارماسىنا جەتكىزىلدى.

ۇستالعان ەر ادام جەرگىلىكتى تۇرعىن بولىپ شىقتى. سونداي-اق تۇركىستاندىق پوليتسەيلەر الاياقتىق جولمەن الىنعان اقشانى ءوز قاجەتتىلىگىنە جاراتىپ جىبەرگەنىن انىقتادى. قازىرگى تاڭدا كۇدىكتىگە قاتىستى سوتقا دەيىنگى تەرگەۋ امالدارى جۇرگىزىلۋدە.

سوڭعى جاڭالىقتار

ۇقساس جاڭالىقتار