ەليزابەت ينستاگرامداعى ءوز اككاۋنتىندا: «قۇرمەتتى جانكۇيەرلەر, كاسىبي سپورتشى رەتىندە مەن ءوز كارەرامدى اياقتادىم. وسىنداي شەشىم قابىلداۋ ماعان وڭاي بولعان جوق. وزدەرىڭىز بىلەسىزدەر, ۇزاق ۋاقىت بويى ارقامنان العان جاراقات قاتتى مازالادى. وكىنىشكە قاراي, سول سىرقاتتان تولىقتاي ايىعا المادىم. سونىڭ سالدارىنان تولىققاندى جاتتىعۋلار جاساۋ مۇمكىن بولمادى. قازىرگى كەزدە مەن قازاقستاندامىن. جىلدىڭ سوڭىنا دەيىن ەلدە بولىپ, وسى سپورت ءتۇرىن تاڭداعان بالالارعا كومەكتەسىپ, تاجىريبەممەن بولىسەمىن. قازاقستاندا مانەرلەپ سىرعاناۋدى دامىتسام دەپ مەن ۇنەمى ارماندايتىنمىن. مىنە, ەندى سونداي مۇمكىندىك تۋىنداپ وتىر» – دەي كەلە, ءوزىنىڭ اتا-اناسى مەن باپكەرلەرىنە, قولداۋ كورسەتكەن ازاماتتار مەن جانكۇيەرلەرگە, مادەنيەت جانە سپورت ميسترىلىگى مەن ۇلتتىق وليمپيادا كوميتەتىنە جانە قىزىلوردا وبلىسىنىڭ اكىمشىلىگىنە زور العىسىن ءبىلدىردى.
سپورتتىق ماناسبىن ماسكەۋدە باستاپ, بىرەر جىل كانادادا شەبەرلىگىن شىنداعان ەليزابەتتىڭ ەل سپورتىنا سىڭىرگەن ەڭبەگى وراسان زور ەكەنى ەش داۋ تۋعىزبايدى. ءار جىلدارى يرينا ستراحوۆا, الەكساندر شۋبين, ناتاليا دۋبينسكايا, سۆەتلانا سوكولوۆسكايا, ەلەنا بۋيانوۆا, برايان ورسەر, ەتەري تۋتبەريدزە جانە سەرگەي دۋداكوۆ سىندى مايتالمان مامانداردىڭ قول استىندا جاتتىققان ول مۇز ايدىندا جاسىنداي جارقىرادى. ەڭ ەلەۋلى تابىستارىنا توقتالاتىن بولساق, 2016 جىلى نورۆەگيانىڭ حامار قالاسىندا وتكەن جاسوسپىرىمدەردىڭ دۇنيەجۇزىلىك وليمپياداسىندا قولا مەدال يەلەندى. 2017 جىلى ساپپوروداعى ازيا ويىندارىندا دا ءدال سول مەجەدەن كورىندى. 2018 جىلى پحەنچحاندا الاۋى تۇتانعان وليمپيا ويىندارىنا قاتىسىپ, 12-ورىنعا تابان تىرەدى. 2019 جىلى ءتورت قۇرلىقتىڭ چەمپيوناتى مەن دۇنيەجۇزىلىك ۋنيۆەرسيادادا كۇمىس جۇلدەنى ولجالادى. باسقا دا تولىپ جاتقان تابىستارى تاعى بار. جالپى, رەسپۋبليكالىق جانە حالىقارالىق جارىستاردى قوسا العاندا, قازاقتىڭ قارشىعاداي قىزى بارلىعى 39 مەدالعا يەلىك ەتكەن ەكەن.
ەليزابەت تۇرسىنباەۆانىڭ سپورتتىق عۇمىرىنداعى ەڭ كەرەمەت كورسەتكىشى – الەم چەمپيوناتىنىڭ كۇمىس مەدالى ەكەنى ءسوزسىز. ءالى ەسىمىزدە, جاپونيانىڭ سايتاما قالاسىندا وتكەن جارىستىڭ قىسقا باعدارلاماسىندا ول ليۋدۆيگ ۆان بەتحوۆەننىڭ «اي سوناتاسىن» ءمىنسىز ورىنداپ, ءۇشىنشى ورىندى ەنشىلەدى. كەلەسى كۇنى ەركىن باعدارلامادا باق سىنادى. بۇل جولى دا تۇرسىنباەۆا تاماشا ونەر كورسەتتى. ارگەنتينالىق استور پياتسوللانىڭ «بۋەنوس-ايرەستەگى جىل مەزگىلدەرىن» اسقان شەبەرلىكپەن ورىنداعان ول الەم چەمپيوناتىنىڭ كۇمىس جۇلدەگەرى اتاندى. ءبىزدىڭ ارۋ تەك رەسەيدىڭ ايگىلى مانەرلەپ سىرعاناۋشىسى, وليمپيادا جانە ەۋروپا چەمپيونى, تاتار قىزى الينا زاگيتوۆادان عانا قالىپ قويدى. ال ەكى دۇركىن الەم جانە ەۋروپا چەمپيونى, وليمپيا ويىندارىنىڭ كۇمىس جۇلدەگەرى ەۆگەنيا مەدۆەدەۆانىڭ قولا مەدالدى قاناعات تۇتۋدان باسقا امالى قالمادى. وسى ورايدا, ەكى بىردەي تاريحي ساتكە ايىرىقشا توقتالا كەتكەن ءجون. ءبىرىنشىسى, ەليزابەت ايەلدەر اراسىنداعى دۇنيەجۇزىلىك دودادا «سالحوۆ تورتىگىن» ورىنداعان تۇڭعىش سپورتشى. ەكىنشىسى, تۇرسىنباەۆانىڭ ەسىمى سپورتتىق شەجىرەدە الەم چەمپيوناتىندا جۇلدە العان قازاقتىڭ تۇڭعىش مانەرلەپ سىرعاناۋشىسى رەتىندە التىن ارىپتەرمەن جازىلدى.
نەسىنە جاسىرايىق, تۇرسىنباەۆادان ءبىز بۇدان دا زور ناتيجە كۇتتىك. الداعى الەم چەمپيوناتتارى مەن وليمپيا ويىندارىندا تاڭداي قاعارلىقتاي تابىستارعا قول جەتكىزىپ, بارشا جانكۇيەردى ءالى تالاي رەت قۋانىش پەن شاتتىققا بولەيتىنىنە ەش كۇمانىمىز جوق ەدى. بىراق ەسكى جاراقاتى ءجيى مازالاعاننان سوڭ ول نەبارى 21 جاسىندا ۇلكەن سپورتپەن قوش ايتىسۋعا بەل بۋدى. ەندى ءبىز قازاق قىزىنىڭ باپكەرلىككە بەت بۇرعانىن قالايمىز. بۇل كاسىپتە دە ونىڭ ەلىنە بەرەرى كوپ. ەل ماقتاعان ەليزابەت قازاقستانداعى مانەرلەپ سىرعاناۋ دەپ اتالاتىن ادەمىلىك پەن اسەمدىككە, سۇلۋلىق پەن سىمباتتىلىققا نەگىزدەلگەن سپورت ءتۇرىن جاڭا بەلەسكە كوتەرەدى دەپ ۇمىتتەنىمىز.
