قوعام • 20 قىركۇيەك، 2021

101 جاستاعى كەيۋانا ونلاين ساناقتان ءوتتى

بالا تاربيەسى مەن قوعامدىق ەڭبەكتەردەن دە تاسادا قالماعان اياۋلى انالاردىڭ ءبىرى – تۇركىستان وبلىسى، جەتىساي اۋدانى، ج.ەراليەۆ اۋىلدىق وكرۋگىنە قاراستى بايتەرەك ەلدى مەكەنىنىڭ تۇرعىنى زابيرا سمايلوۆا. اۋىلدىق وكرۋگ ماماندارىنىڭ كومەگىمەن زابيرا اجەيدىڭ اۋلەتى حالىق ساناعىنا ونلاين تىركەلدى، دەپ جازادى Egemen.kz .

گۇلبارشىن ايتجانبايقىزى

101 جاستاعى زابيرا سمايلوۆا اجەي بۇگىندە اۋىل تۇرعىندارىنىڭ تۇتاستىق ءومىرىنىڭ وزەكتى مانىنە اينالعان. 1920 جىلى دۇنيە ەسىگىن اشىپ اشارشىلىق پەن جوقشىلىقتى، ەكىنشى دۇنيەجۇزىلىك سوعىستى باسىنان وتكىزگەن كەيۋانا 9 پەرزەنتتىڭ اناسى. بەلى قاتىپ، بۇعاناسى بەكىمەي جاتىپ تىڭ يگەرۋگە قاتىسىپ، كەيىننەن ەكىنشى دۇنيەجۇزىلىك سوعىستا قان مايدانداعى جاۋىنگەرلەرگە قولىنان كەلگەنشە كومەك بەرگەن زابيرا اجەي سوعىستان كەيىنگى جىلدارى تۇرالاپ قالعان اۋىلداردى قالپىنا كەلتىرۋ ىسىنە اتسالىسقان. قولىنا كەتپەن الىپ شابىق شاۋىپ، ماساق تەرگەن. ديىرمەندە ۇن وتكىزىپ، مال دا باققان. ادال ەڭبەگىنىڭ ارقاسىندا ەلدىڭ قۇرمەتىنە بولەنىپ، كەڭەس داۋىرىندە ءومىر بويى كولحوزدا قاراپايىم جۇمىسشى بولىپ، بەلى تالماي ەڭبەك ەتكەن قاريانىڭ ءومىر جولى كوپكە ۇلگى بولارلىقتاي. بۇگىندە 101 جاسقا كەلگەن قارت انا ەلدە جاقسىلىقتىڭ تولاستاماۋىن تىلەيدى.

«وسىنداي توقشىلىقتا، بەيبىت ەلدە ءومىر ءسۇرىپ جاتقان سەندەر باقىتتى ۇرپاقسىڭدار عوي. وق پەن وتتىڭ قاتەرى جوق. سوندىقتان، قولدا بار قۇندىلىقتاردى باعالاي ءبىلۋ كەرەك. كەزىندە اش تا بولدىق، جاۋتەڭدەپ ۇرەيمەن ءومىر سۇردىك. بۇگىن مىنە، ءوز ەركىمىز وزىمىزدە. تاۋەلسىز ەلمىز. بارىمىزعا قاناعات جاساپ، بولاشاققا جاقسى ۇمىتتەرمەن ءومىر سۇرە بىلەيىك. قاشان دا ەلىمىز امان، جۇرتىمىز تىنىش بولسىن»، دەگەن زابيرا اجەي ەلدەگى بولىپ جاتقان جاعىمدى جاڭالىقتاردان دا حاباردار ەكەنىن ءبىلدىرىپ، ەلدى ىنتىماق-بىرلىككە شاقىردى.

ءزابيرا انانىڭ 9 پەرزەنتتەن تاراعان 40 نەمەرە مەن 120 شوبەرەنىڭ ۇلكەن اۋلەتكە اينالعانىن ايتۋعا بولادى. كەزىندە قولىمەن كانال قازىپ، جەر جىرتىپ، ماقتا تەرگەن، تۇيەكەش تە بولعان اجەيدىڭ ۇلكەن ۇلى تولەگەن سمايلوۆتىڭ ءوزى بۇگىندە 70-تەن اسقان. مەملەكەتتىك ەسەپ – حالىق ساناعىنىڭ جۇرگىزىلۋىن دۇرىس دەپ بىلەدى. ءوز وتباسىمەن بەلسەنە قاتىسىپ وتىر.

«ساناقتىڭ جۇرگىزىلۋى ءوزىمىز ءۇشىن ماڭىزدى. ويتكەنى، وسى ساناق ارقىلى ءبارىمىزدىڭ ەسەبىمىز جۇرگىزىلەدى. جالپىمەملەكەتتىك ەسەپكە الىنعان سوڭ ءبىزدىڭ دەموگرافيالىق، ەكونوميكالىق، الەۋمەتتىك جاعدايىمىزعا، وسىمىمىزگە قاراپ مەكتەپ، بالاباقشا، اۋرۋحانا، ءۇي سالادى. ونىڭ يگىلىگىن ءوزىمىزدىڭ پەرزەنتتەرىمىز، حالقىمىز كورەدى»، دەيدى تولەگەن ابدىقادىر ۇلى.

ايتا كەتەيىك، بۇگىندە جەتىساي اۋدانىندا جاسى 100-دەن اسىپ، عاسىردى عاسىرعا جالعاعان 6 قاريا تۇرادى. ۇزاق جاساۋشىلاردىڭ 5-ءى قارت اجەلەر بولسا، 1-ءى اقساقال قاريا. ءبارى دە تىل ارداگەرى. ماڭداي تەرىمەن ءشول دالانى گۇلدەندىرگەن ۇزاق جاساۋشىلار جەرگىلىكتى جەردەگى اكىمدىكتەر ارقىلى جالپىمەملەكەتتىك ساناقتان ونلاين ءوتىپ وتىر.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز