جۋىردا قازاقستاننىڭ ءابسوليۋتتى چەمپيونى اتانىپ, وسى جارىسقا شاقىرتۋ العان ت.سكاتوۆ العاشقى اينالىمدا الەمنىڭ 87-راكەتكاسى, 37 جاستاعى يتاليالىق اندرەاس سەپپيمەن شەبەرلىك سىناستى. ءبىر قىزىعى, ا.سەپپي 2002 جىلى كاسىپقوي سپورتتاعى جولىن باستاعان كەزدە ت.سكاتوۆ 1 جاستا ەدى.
تاجىريبەلى تەننيسشى ءبىرىنشى پارتيادا 3:0 ەسەبىمەن العا كەتكەنىمەن, تيموفەي قارىمتا قايتارىپ, تارازى باسىن تەڭەستىردى. تاي-برەيكتە قازاقستاندىق سپورتشى ءساتتى وينادى – 7:6 (7:3). ەكىنشى سەتتە سكاتوۆ 3:0 ەسەبىمەن العا شىققانىمەن, سەپپي الىسقا ۇزاتپاي, قاتارىنان بەس گەيم الدى – 5:3. اقىرى ول ءوز مۇمكىندىگىن ءمۇلت جىبەرگەن جوق – 6:4. ءۇشىنشى, شەشۋشى پارتيادا قازاقستاندىق تەننيسشى 5:0 ەسەبىمەن العا كەتتى.
سودان كەيىن ماتچقا دوپ بەرگەندە, قاتەلەسپەدى – 6:1. تارتىستى وتكەن باسەكە 2 ساعات 56 مينۋتقا سوزىلدى. ماتچ بارىسىندا ت.سكاتوۆ 2 ەيس جاساپ, 7 برەيك-پوينتتىڭ تورتەۋىن پايدالانا ءبىلدى. قارسىلاسى 6 ەيس, 3 برەيككە (10 برەيك-پوينت) قول جەتكىزدى.
ت.سكاتوۆ ەكىنشى اينالىمدا الەمنىڭ 52-راكەتكاسى, بەلارۋس وكىلى يليا يۆاشكا نەمەسە رەيتينگتە 169-ساتىداعى شۆەتسيالىق ەلياس يمەردىڭ بىرەۋىمەن شەبەرلىك بايقاسادى.
