توپ مۇشەلەرىنىڭ ايتۋلارىنا قاراعاندا, قازىر ناسيحات توبىنىڭ ازاماتتىق شتابىنا 200-گە جۋىق جوعارى بىلىكتى مامان ەنىپ وتىر. ولاردىڭ قاتارىندا مەديتسينا, كاسىپكەرلىك جانە قوعامدىق سالالاردا ەل نازارىنا ءىلىنىپ جۇرگەن بەلسەندىلەر, اتاپ ايتقاندا, ۆياچەسلاۆ لوكشين, جىبەك جولداسوۆا, رافايل روزەنسون, دينارا ءساتجان, راحىم وشاقباەۆ جانە ت.ب. بار.
ر.وشاقباەۆ جامان ىندەتتى قۇرىقتاۋ جولىندا ۆاكتسينانىڭ ءرولى زور ەكەنىنە ءتۇرلى دالەل كەلتىردى. كوروناۆيرۋسپەن سىرقاتتانۋ ءالى دە ازايماي تۇر. سولتۇستىك قازاقستان وبلىسىندا 26 تامىزدا انتيرەكوردتىق كورسەتكىش تىركەلىپ, ءبىر تاۋلىكتە 171 ادامنىڭ بويىنان كوۆيد ىندەتى تابىلعان. قازىرگى جاعداي ودان ەكى ەسە تومەن بولعانىنا قاراماستان, سىرقاتتانۋ سەرپىنىنىڭ تومەندەمەۋى الاڭداتادى. ۆيرۋستى جۇقتىرۋ قارقىنى بويىنشا قازاقستان قازىرگى ۋاقىتتا 100 مىڭ ادامعا شاققاندا الەمدە 30-ورىندى يەلەنەدى. ەڭ كوپ جۇقتىرۋ 2021 جىلعى 7 تامىزدا تىركەلدى, ول كەزدە جۇقتىرۋ كورسەتكىشى 8 325 ادام بولعان. ال ءبىر عانا 19 تامىزدا ەلدە 163 ادام ىندەتتەن قايتىس بولعان. قازىرگى ۋاقىتتا اۋرۋدىڭ شارىقتاۋ شىڭى ءوتتى, بىراق ءولىم سانى ءالى دە جوعارى دەڭگەيدە. وسى سەكىلدى دەرەكتەردى العا تارتا كەلىپ, ازاماتتىق شتابتىڭ بەلسەندىلەرى ۆاكتسينا الۋ پاندەميانى توقتاتۋدىڭ جالعىز جولى ەكەنىن جەتكىزدى.
شتاب بەلسەندىلەرى قازىر ەلىمىزدە ۆاكتسينا الۋ قارقىنىنىڭ تومەندەگەنىن اتاپ ءوتتى. ماسەلەن, شىلدە ايىنىڭ ورتاسىندا تاۋلىگىنە 130 مىڭ ادامعا دەيىن ۆاكتسينا السا, قازىر نەبارى 30 مىڭ قازاقستاندىق يممۋندالۋدا. سولتۇستىك قازاقستان وبلىسىندا ۆاكتسينالاۋ قارقىنى جالپى رەسپۋبليكالىق دەڭگەيدەن ءبىرشاما ارتتا قالىپ وتىر. بۇگىنگى تاڭدا ۆاكتسينانىڭ تولىق كۋرسىن 209 مىڭ ادام العان. بۇل ۆاكتسينا الۋعا نيەت بىلدىرگەندەردىڭ 67%-ى.
«ەلدەگى جاعداي وتكەن جىلمەن سالىستىرعاندا اۋىر. بيىلعى كورسەتكىش تاۋلىگىنە 8,3 مىڭ بولىپ, التى ەسەگە دەيىن ءوستى. بىلتىر 15 تامىزدا امبۋلاتوريالىق جانە ستاتسيونارلىق ەمدەلۋدە جۇرگەن 20 مىڭ ادام رەسمي تۇردە تىركەلسە, بيىل وسى كورسەتكىش 117,8 مىڭعا دەيىن ۇلعايىپ وتىر. وتكەن جىلى ستاتسيوناردا 3,4 مىڭ ادام ەمدەلسە, بيىل بۇل كورسەتكىش 31,5 مىڭ ادامعا دەيىن جەتتى. ءبىز قازاقستاندا ۆاكتسينالاۋ قارقىنىنىڭ وتە تومەن ەكەنىن كورىپ وتىرمىز. بۇل پاندەميانىڭ جوعارى كورسەتكىشتەرىنە جانە ءولىم-ءجىتىمنىڭ كوبەيۋىنە اسەر ەتەدى. قازىرگى ۋاقىتتا ەلىمىزدە ۆاكتسينالاۋعا جاتاتىن 10 ملن ادامنىڭ 7 ملن-ى عانا ۆاكتسينالاندى», دەدى ر.وشاقباەۆ.
ازاماتتىق قوعام وكىلدەرى ەت جاقىندارىنىڭ دەنساۋلىعى ءۇشىن وتانداستارىمىزدى سانالى تاڭداۋ جاساپ, ەكپە الۋعا بايلانىستى بىرىگۋگە شاقىردى. كەزدەسۋگە قاتىسۋشىلار بۇل ءۇشىن بەلسەندى اقپاراتتىق جۇمىس قاجەت دەگەن ورتاق پىكىرگە كەلدى, ويتكەنى وبەكتيۆتى اقپاراتتىڭ جەتكىلىكسىزدىگى حالىقتىڭ يممۋنداۋعا سەنىمسىزدىگىنە اكەپ سوقتىرادى.
سولتۇستىك قازاقستان وبلىسى
