الەمدە ءوز ەلىنەن تىنىشتىق تاپپاعان ميلليونداعان ادام وزگە مەملەكەتتەردى پانالاۋعا ءماجبۇر. دۇنيەجۇزىلىك بانكتىڭ مالىمەتىنشە, 2050 جىلى ولاردىڭ قاتارىنا تاعى 216 ميلليون ادام قوسىلۋى مۇمكىن. بىراق وعان سەبەپ – قارۋلى قاقتىعىستار ەمەس. بۇل ادامدار كليماتتىڭ وزگەرۋى سالدارىنان بوسقىنعا اينالاتىن ءتۇرى بار. ولار ورمان ءورتى, سۋ تاسقىنى, داۋىل مەن قۋاڭشىلىق كەسىرىنەن تۋعان جەرىن تاستاپ, ءومىر سۇرۋگە قولايلى ورتا ىزدەۋگە ءماجبۇر. ماماندار بۇگىننىڭ وزىندە جەر بەتىندەگى ورتاشا تەمپەراتۋرا يندۋسترياعا دەيىنگى كەزەڭمەن سالىستىرعاندا, 1,2 گرادۋسقا جوعارى ەكەنىن ايتادى. سونىڭ سالدارىنان اسىرەسە افريكا ەلدەرىندە «كليماتتىق بوسقىندار» كوبەيۋى مۇمكىن. سونداي-اق ازيادا, لاتىن امەريكاسى مەن شىعىس ەۋروپادا دا تابيعات اپاتتارىنان قونىس اۋدارۋعا ءماجبۇر بولعاندار قاتارى ارتۋى ىقتيمال.
اقش-تا مۇنداي جاعداي قازىردىڭ وزىندە بايقالىپ وتىر. ماسەلەن, امەريكالىقتاردىڭ 79 پايىزى تابيعي اپاتتار ءجيى بولىپ تۇراتىن اۋداننان ءۇي المايتىندارىن ايتادى.
«بىلتىرعى ستاتيستيكانى كەلتىرەيىن. وتكەن جىلى تابيعات اپاتتارى سالدارىنان 31 ميلليون ادام قونىس اۋدارعان. جىل سايىن كورسەتكىشتەر تەك ارتىپ بارادى. ءسويتىپ كليماتتىق بوسقىنداردىڭ قارۋلى قاقتىعىستان قاشقان ازاماتاردان اسىپ كەتەتىن ءتۇرى بار. تابيعات اپاتتارىنان اشقۇرساق جۇرگەندەر قاتارى دا ارتىپ بارادى. كوروناۆيرۋسقا دەيىن ونداي 26 ميلليون ادام بولعان. قازىر بۇل كورسەتكىش ودان دا كوپ. ساراپشىلار اۋاعا بولىنەتىن زياندى زاتتاردىڭ مولشەرىن ازايتۋ كەرەكتىگىن ايتادى. نەگىزى كوروناۆيرۋس پاندەمياسى كەزىندە الەمدە ەكولوگيالىق احۋال ءبىرشاما جاقسارىپ قالدى دەگەن اقپارات پايدا بولعان ەدى. الايدا بۇۇ-نىڭ سوڭعى بايانداماسىنا سايكەس, كارانتين شارالارى ۋاقىتشا اسەر بەرگەن ەكەن. ءسويتىپ كومىرشقىشقىل گازىنىڭ مولشەرى قايتادان بۇرىنعى كورسەتكىشتەرگە جەتىپ قالىپتى. اتمسوفەراداعى پارنيكتىك گازداردىڭ مولشەرى ءالى دە رەكوردتىق دەڭگەيدە», دەيدى بۇۇ باس حاتشىسىنىڭ اپات قاۋپىن ازايتۋ جونىندەگى ارنايى وكىلى مامي ميزۋتوري.
