«ماسلو-دەل» كومپانيالار توبىنىڭ ديرەكتورى پاۆەل سەليۆانوۆتىڭ ايتۋىنشا, جاڭا زاۋىت مايلى داقىلداردى قايتا وڭدەۋ, زىعىر جانە راپس مايىن, سونداي-اق ءىرى قارا مالعا ارنالعان جەمدى (كۇنجارا) ءوندىرۋ كولەمىن ەداۋىر ارتتىرۋعا مۇمكىندىك بەرمەك. كاسىپورىن تولىق جوبالىق قۋاتتىلىققا شىققان سوڭ جىلىنا 180-300 مىڭ توننا مايلى داقىلدار تۇقىمىن قايتا وڭدەۋدى جوسپارلاپ وتىر. بۇل مايلى تۇقىمداردىڭ جىلدىق جالپى ءتۇسىمىنىڭ 7,6-12,7 پايىزىن قۇراماق.
جوبا تولىعىمەن ەكسپورتقا باعدارلانعان. نەگىزگى باعىت – قىتاي. ال جەمشوپ ەكسپورتى ءۇشىن ەۋروپا, رەسەي جانە قىتاي نارىعى تاڭدالىپ وتىر. زاۋىت 2023 جىلى پايدالانۋعا بەرىلمەك.
– ءوندىرىس بارىسىندا سىرتقى نارىقتاردىڭ سۇرانىسىن ارتتىرۋ ءۇشىن سۋىقتاي سىعۋ تەحنولوگياسىن پايدالانۋدى كوزدەپ وتىرمىز. ويتكەنى جوبا رەسپۋبليكانىڭ ەكسپورتتىق الەۋەتىن دامىتۋعا باعىتتالعان. الەمدىك ستاندارتتارعا سايكەس بولۋ ءۇشىن وندىرىستىك جابدىقتار جەتەكشى ەۋروپالىق كومپانيالاردان ساتىپ الىناتىن بولادى. سونىمەن قاتار كىرىس شيكىزاتىنىڭ ساپاسىن باقىلاۋعا ارنالعان زەرتحانا كەڭەيتىلمەك, – دەيدى پ.سەليۆانوۆ.
كاسىپورىننىڭ باسەكەگە قابىلەتتىلىگى جوعارى. بۇعان وڭ اسەر ەتەتىن بىرنەشە فاكتور بار. ولار – شيكىزات رەسۋرستارىنىڭ جاقىندىعى, زاماناۋي ەۋروپالىق جابدىقتار مەن جاڭا تەحنولوگيالاردى پايدالانۋ, جوعارى بىلىكتى كادرلاردىڭ جانە ۇقساس جوبالاردى ىسكە اسىرۋدا كومپانيانىڭ مول تاجىريبەسىنىڭ بولۋى. سونداي-اق «ماسلو-دەل پەتروپاۆل» سەرىكتەستىگىندە مايلى داقىلدار تۇقىمىن ساقتاۋعا ارنالعان جەكە ەلەۆاتور بار. بۇل وزىندىك قۇندى ايتارلىقتاي تومەندەتۋگە جانە ماي تۇقىمدارىن نەعۇرلىم قولايلى باعامەن ساتىپ الۋعا مۇمكىندىك بەرەدى.
جوبانىڭ جالپى قۇنى – 15 ملرد تەڭگە. ونىڭ 73 پايىزىن نەمەسە 11 ملرد تەڭگەسىن قازاقستاننىڭ دامۋ بانكى ۇسىنادى. قارجى ينستيتۋتى قارىزدى 12 جىلعا بەرىپ وتىر. جوبا «بيزنەستىڭ جول كارتاسى – 2025» جانە 2015-2019 جىلدارعا ارنالعان يندۋستريالىق-يننوۆاتسيالىق دامۋ باعدارلامالارى اياسىندا ىسكە اسىرىلۋدا. بانكتىڭ كرەديتتىك قاراجاتى ىسكە قوسۋ-رەتتەۋ جۇمىستارىنا, جابدىقتى ساتىپ الۋعا جانە مونتاجداۋعا جۇمسالماق.
– «ماسلو-دەل» كومپانيالار توبى – ءبىزدىڭ سەنىمدى سەرىكتەسىمىز. پەتروپاۆلداعى جاڭا زاۋىتتى قارجىلاندىرۋدان بولەك, قازاقستاننىڭ دامۋ بانكى كاسىپورىنعا 20 مىڭ توننا وسىمدىك مايىن ءوندىرۋ ءۇشىن ماي تۇقىمدارىن ساتىپ الۋ جوباسى بويىنشا قولداۋ كورسەتۋدە. بانك قولداۋىمەن وندىرىلگەن ماي تولىق كولەمدە ەكسپورتقا, نەگىزىنەن قىتايعا جەتكىزىلەدى. «ماسلو-دەل» برەندىنىڭ وسىمدىك مايى O'live, «جايلاۋ» جانە تاعى دا باسقا ساۋدا ماركاسىمەن ساتىلادى, – دەدى قازاقستان دامۋ بانكىنىڭ باسقارۋشى ديرەكتورى ءادىل يسماعامبەتوۆ.
زاۋىتتى ىسكە قوسۋ مايلى داقىلدار تۇقىمىن وندىرۋدە كوشباسشى سانالاتىن سولتۇستىك قازاقستان وبلىسى ءۇشىن ۇلكەن الەۋمەتتىك ماڭىزعا يە. زاۋىت جەرگىلىكتى اۋىل شارۋاشىلىعى ونىمدەرىن وندىرۋشىلەردى كۇنباعىس, زىعىر, راپس سەكىلدى مايلى داقىلداردى سەبۋدى ۇلعايتۋعا ىنتالاندىرماق. جوبا اياسىندا قوسىمشا 217 جۇمىس ورنى قۇرىلادى. سونداي-اق ءوندىرىس كولەمىن جانە ءونىم ەكسپورتىن جىلىنا 300 مىڭ تونناعا دەيىن ۇلعايتۋعا جول اشادى. بۇل وڭىردەگى وڭدەۋ ۇلەسىن 30 پايىزدان 60 پايىزعا دەيىن ۇلعايتۋعا مۇمكىندىك بەرەدى.
دەرەكتەرگە سۇيەنسەك, «ماسلو-دەل» كومپانياسىنىڭ ەكسپورتى جىل وتكەن سايىن ءوسىپ كەلەدى. ماسەلەن, 2015 جىلى ءونىم ەكسپورتى 2,44 ملرد تەڭگەنى, 2020 جىلى 10,16 ملرد تەڭگەنى قۇرادى. وسى جىلدىڭ قاڭتار-تامىزىنداعى كورسەتكىش 11,48 ملرد تەڭگەگە تەڭ. 2015 جىلدان بەرى ەكسپورت 5 ەسە وسكەن. ال جاڭا زاۋىت ىسكە قوسىلعاننان كەيىن ەكسپورت قازىرگى دەڭگەيمەن سالىستىرعاندا تاعى 2 ەسە ۇلعايادى دەپ كۇتىلۋدە. ءوندىرىس كولەمىنىڭ ۇلعايۋى بيۋدجەتكە تۇسەتىن سالىقتىق تۇسىمدەردى ارتتىرادى. بۇل رەتتە جىلىنا شامامەن 1,2 ملرد تەڭگە سالىق تۇسەدى دەپ كۇتىلۋدە.
بۇگىندە قازاقستاننىڭ دامۋ بانكى ازىق-ت ۇلىك باعىتىندا 3 ينۆەستيتسيالىق جوبا مەن 7 ەكسپورتتىق وپەراتسيانى جۇزەگە اسىرۋدا. تاعى بىرنەشە جوبا دايىندىق ۇستىندە. جالپى, بانك ىسكە قوسىلعان ساتتەن باستاپ بۇل باعىتتا 16 ينۆەستيتسيالىق جوبا مەن 52 ەكسپورتتىق وپەراتسيا ىسكە اسىرىلعان. بانكتىڭ كرەديتتىك قورجىنىنداعى اۋىل شارۋاشىلىعى جوبالارىنىڭ ۇلەسى 2,5 پايىزدى قۇراپ وتىر. بۇل دەگەنىمىز – 46 ملرد تەڭگە.
«ماسلو-دەل پەتروپاۆل» جشس 2006 جىلى ءسۇت وڭدەيتىن وندىرىستىك كاسىپورىن رەتىندە قۇرىلعان. 2013 جىلى قىزمەت ءتۇرىن مايلى تۇقىمداردى كەپتىرۋ, تازالاۋ جانە ساقتاپ وڭدەۋ باعىتىنا وزگەرتكەن. جەكەمەنشىك استىق ساقتاۋ قويماسىنىڭ قۋاتتىلىعى 58 مىڭ توننانى قۇرايدى. ول Buhler جانە Petkus كومپانياسىنىڭ زاماناۋي قۇرىلعىلارىمەن جابدىقتالعان. مۇندا 29 ادام جۇمىس ىستەيدى. كاسىپورىن «ماسلو-دەل» كومپانيالار توبىنىڭ قۇرامىنا كىرەدى.
