«قىزىلجار اۋدانىندا 14 قىركۇيەككە قاراعان ءتۇنى سوگوروۆكا قورىقشاسىنىڭ اۋماعىندا تابيعاتتى قورعاۋ پوليتسياسىنىڭ اعا ينسپەكتورى, قورىقشانىڭ باس اڭشىسى جانە «كوكشەتاۋ» مەملەكەتتىك ۇلتتىق تابيعي پاركىنىڭ ينسپەكتورى وق اتىلعانىن ەستيدى. رەيد قاتىسۋشىلارى ايماقتى ارالاپ, ءسىبىر ەلىگىن ولتىرگەن ءۇش ەر ادامدى تاپتى», دەپ حابارلادى سقو پد.
تاعى ءبىر جانۋاردىڭ ۇشاسى كۇدىكتىلەردىڭ Toyota Prado ماركالى كولىگىنەن تابىلدى.
اتالعان فاكت قر قك 337-بابىنىڭ 4-بولىگى «زاڭسىز اڭشىلىق» بويىنشا سوتقا دەيىنگى تەرگەۋدىڭ بىرىڭعاي تىزىلىمىنە ەنگىزىلدى.
قىلمىس جاسادى دەگەن كۇدىكپەن 52 جانە 39 جاستاعى ەكى پەتروپاۆلدىق, سونداي-اق مامليۋت اۋدانىنىڭ 51 جاستاعى تۇرعىنى ۇستالدى.
كۇدىكتىلەردىڭ بىرىنەن 308 كاليبرلى Steyr Mannlicher مىلتىق كارابينى تاركىلەندى.
«تابيعاتتى قورعاۋ پوليتسياسىنىڭ قىزمەتكەرلەرى ۇنەمى اڭ اۋلاۋ جانە بالىق اۋلاۋ ەرەجەلەرىن ساقتاۋ, براكونەرلىك فاكتىلەرىنىڭ الدىن الۋ بويىنشا رەيدتەر جۇرگىزەدى. بۇل ءىس-شارالار مۇددەلى ۇيىمداردىڭ وكىلدەرىمەن بىرلەسىپ وتكىزىلەدى. جىل باسىنان بەرى وبلىستا زاڭسىز اڭ اۋلاۋدىڭ 10 فاكتىسى تىركەلىپ, اڭ اۋلاۋ ەرەجەلەرىن بۇزۋدىڭ 405 فاكتىسى انىقتالدى», دەدى سقو پد جپق تابيعاتتى قورعاۋ پوليتسياسى توبىنىڭ ەرەكشە تاپسىرمالار جونىندەگى اعا ينسپەكتورى اسحات قوجاباەۆ.
